៣១៦. សសបណ្ឌិតជាតកំ (៤-២-៦)

៦១. សត្ត មេ រោហិតា មច្ឆា, ឧទកា ថលមុព្ភតា;

ឥទំ ព្រាហ្មណ មេ អត្ថិ, ឯតំ ភុត្វា វនេ វស.

៦២. ទុស្ស មេ ខេត្តបាលស្ស, រត្តិភត្តំ អបាភតំ;

មំសសូលា ច ទ្វេ គោធា, ឯកញ្ច ទធិវារកំ;

ឥទំ ព្រាហ្មណ មេ អត្ថិ, ឯតំ ភុត្វា វនេ វស.

៦៣. អម្ពបក្កំ ទកំ [អម្ពបក្កោទកំ (សី. បី.)] សីតំ, សីតច្ឆាយា មនោរមា [សីតច្ឆាយំ មនោរមំ (សី. ស្យា. បី.)];

ឥទំ ព្រាហ្មណ មេ អត្ថិ, ឯតំ ភុត្វា វនេ វស.

៦៤. ន សសស្ស តិលា អត្ថិ, ន មុគ្គា នបិ តណ្ឌុលា;

ឥមិនា អគ្គិនា បក្កំ, មមំ [មំសំ (ក.)] ភុត្វា វនេ វសាតិ.

សសបណ្ឌិតជាតកំ ឆដ្ឋំ.