២. បុចិមន្ទវគ្គោ

៣១១. បុចិមន្ទជាតកំ (៤-២-១)

៤១. ឧដ្ឋេហិ ចោរ កិំ សេសិ, កោ អត្ថោ សុបនេន [សុបិតេន (សី.), សុបិនេន (បី. ក.)] តេ;

មា តំ គហេសុំ [គណ្ហេយ្យុំ (ក.)] រាជានោ, គាមេ កិព្ពិសការកំ.

៤២. យំ នុ [នូន (ស្យា.)] ចោរំ គហេស្សន្តិ, គាមេ កិព្ពិសការកំ;

កិំ តត្ថ បុចិមន្ទស្ស, វនេ ជាតស្ស តិដ្ឋតោ.

៤៣. ន ត្វំ អស្សត្ថ ជានាសិ, មម ចោរស្ស ចន្តរំ;

ចោរំ គហេត្វា រាជានោ, គាមេ កិព្ពិសការកំ;

អប្បេន្តិ [អច្ចេន្តិ (ស្យា.)] និម្ពសូលស្មិំ, តស្មិំ មេ សង្កតេ មនោ.

៤៤. សង្កេយ្យ សង្កិតព្ពានិ, រក្ខេយ្យានាគតំ ភយំ;

អនាគតភយា ធីរោ, ឧភោ លោកេ អវេក្ខតីតិ.

បុចិមន្ទជាតកំ បឋមំ.

៣១២. កស្សបមន្ទិយជាតកំ (៤-២-២)

៤៥. អបិ កស្សប មន្ទិយា, យុវា សបតិ ហន្តិ [សម្បដិហន្តិ (ក.)] វា;

សព្ពំ តំ ខមតេ ធីរោ, បណ្ឌិតោ តំ តិតិក្ខតិ.

៤៦. សចេបិ សន្តោ វិវទន្តិ, ខិប្បំ សន្ធីយរេ បុន;

ពាលា បត្តាវ ភិជ្ជន្តិ, ន តេ សមថមជ្ឈគូ.

៤៧. ឯតេ ភិយ្យោ សមាយន្តិ, សន្ធិ តេសំ ន ជីរតិ;

យោ ចាធិបន្នំ ជានាតិ, យោ ច ជានាតិ ទេសនំ.

៤៨. ឯសោ ហិ ឧត្តរិតរោ, ភារវហោ ធុរទ្ធរោ;

យោ បរេសាធិបន្នានំ, សយំ សន្ធាតុមរហតីតិ.

កស្សបមន្ទិយជាតកំ ទុតិយំ.

៣១៣. ខន្តីវាទីជាតកំ (៤-២-៣)

៤៩. យោ តេ ហត្ថេ ច បាទេ ច, កណ្ណនាសញ្ច ឆេទយិ;

តស្ស កុជ្ឈ មហាវីរ, មា រដ្ឋំ វិនសា [វិនស្ស (ក. សី. ស្យា. ក.)] ឥទំ.

៥០. យោ មេ ហត្ថេ ច បាទេ ច, កណ្ណនាសញ្ច ឆេទយិ;

ចិរំ ជីវតុ សោ រាជា, ន ហិ កុជ្ឈន្តិ មាទិសា.

៥១. អហូ អតីតមទ្ធានំ [អហុ អតីតមទ្ធានេ (ស្យា. បី. ក.)], សមណោ ខន្តិទីបនោ;

តំ ខន្តិយាយេវ ឋិតំ, កាសិរាជា អឆេទយិ.

៥២. តស្ស កម្ម [កម្មស្ស (សី. បី.)] ផរុសស្ស, វិបាកោ កដុកោ អហុ;

យំ កាសិរាជា វេទេសិ, និរយម្ហិ សមប្បិតោតិ.

ខន្តីវាទីជាតកំ តតិយំ.

៣១៤. លោហកុម្ភិជាតកំ (៤-២-៤)

៥៣. ទុជ្ជីវិតមជីវិម្ហ, យេ សន្តេ [យេសំ នោ (ស្យា. ក.)] ន ទទម្ហសេ;

វិជ្ជមានេសុ ភោគេសុ, ទីបំ នាកម្ហ អត្តនោ.

៥៤. សដ្ឋិ [សដ្ឋិំ (ស្យា.)] វស្សសហស្សានិ, បរិបុណ្ណានិ សព្ពសោ;

និរយេ បច្ចមានានំ, កទា អន្តោ ភវិស្សតិ.

៥៥. នត្ថិ អន្តោ កុតោ អន្តោ, ន អន្តោ បដិទិស្សតិ;

តទា ហិ បកតំ បាបំ, មម តុយ្ហញ្ច មារិសា [មារិស (សី. ស្យា. បី.)].

៥៦. សោហំ នូន ឥតោ គន្ត្វា, យោនិំ លទ្ធាន មានុសិំ;

វទញ្ញូ សីលសម្បន្នោ, កាហាមិ កុសលំ ពហុន្តិ.

លោហកុម្ភិជាតកំ ចតុត្ថំ.

៣១៥. សព្ពមំសលាភជាតកំ (៤-២-៥)

៥៧. ផរុសា វត តេ វាចា, មំសំ [សម្ម (បី. ក.)] យាចនកោ អសិ [ចសិ (បី.)];

កិលោមសទិសី [កិលោមស្ស សទិសា (បី.)] វាចា, កិលោមំ សម្ម ទម្មិ តេ.

៥៨. អង្គមេតំ មនុស្សានំ, ភាតា លោកេ បវុច្ចតិ;

អង្គស្ស សទិសី វាចា [អង្គស្សទិសី តេ វាចា (ក.)], អង្គំ សម្ម ទទាមិ តេ.

៥៩. តាតាតិ បុត្តោ វទមានោ, កម្បេតិ [សម្មេតិ (ក.)] ហទយំ បិតុ;

ហទយស្ស សទិសី [ហទយស្សទិសី (ក.)] វាចា, ហទយំ សម្ម ទម្មិ តេ.

៦០. យស្ស គាមេ សខា នត្ថិ, យថារញ្ញំ តថេវ តំ;

សព្ពស្ស សទិសី វាចា, សព្ពំ សម្ម ទទាមិ តេតិ.

សព្ពមំសលាភជាតកំ [មំសជាតកំ (សី. ស្យា. បី.)] បញ្ចមំ.

៣១៦. សសបណ្ឌិតជាតកំ (៤-២-៦)

៦១. សត្ត មេ រោហិតា មច្ឆា, ឧទកា ថលមុព្ភតា;

ឥទំ ព្រាហ្មណ មេ អត្ថិ, ឯតំ ភុត្វា វនេ វស.

៦២. ទុស្ស មេ ខេត្តបាលស្ស, រត្តិភត្តំ អបាភតំ;

មំសសូលា ច ទ្វេ គោធា, ឯកញ្ច ទធិវារកំ;

ឥទំ ព្រាហ្មណ មេ អត្ថិ, ឯតំ ភុត្វា វនេ វស.

៦៣. អម្ពបក្កំ ទកំ [អម្ពបក្កោទកំ (សី. បី.)] សីតំ, សីតច្ឆាយា មនោរមា [សីតច្ឆាយំ មនោរមំ (សី. ស្យា. បី.)];

ឥទំ ព្រាហ្មណ មេ អត្ថិ, ឯតំ ភុត្វា វនេ វស.

៦៤. ន សសស្ស តិលា អត្ថិ, ន មុគ្គា នបិ តណ្ឌុលា;

ឥមិនា អគ្គិនា បក្កំ, មមំ [មំសំ (ក.)] ភុត្វា វនេ វសាតិ.

សសបណ្ឌិតជាតកំ ឆដ្ឋំ.

៣១៧. មតរោទនជាតកំ (៤-២-៧)

៦៥. មតំ មតំ ឯវ [មតមតមេវ (សី. ស្យា. បី.)] រោទថ, ន ហិ តំ រោទថ យោ មរិស្សតិ;

សព្ពេបិ [សព្ពេវ (សី. ស្យា. បី.)] សរីរធារិនោ, អនុបុព្ពេន ជហន្តិ ជីវិតំ.

៦៦. ទេវមនុស្សា ចតុប្បទា, បក្ខិគណា ឧរគា ច ភោគិនោ;

សម្ហិ [យម្ហិ (ស្យា.), អស្មិំ (បី. ក.)] សរីរេ អនិស្សរា, រមមានាវ ជហន្តិ ជីវិតំ.

៦៧. ឯវំ ចលិតំ អសណ្ឋិតំ, សុខទុក្ខំ មនុជេស្វបេក្ខិយ;

កន្ទិតរុទិតំ និរត្ថកំ, កិំ វោ សោកគណាភិកីររេ.

៦៨. ធុត្តា ច សោណ្ឌា [ធុត្តា សោណ្ឌា (សី.), ធុត្តា សោណ្ឌា ច (ស្យា.)] អកតា, ពាលា សូរា អយោគិនោ [ពាលា សូរា វីរា អយោគិនោ (បី.)];

ធីរំ មញ្ញន្តិ ពាលោតិ, យេ ធម្មស្ស អកោវិទាតិ.

មតរោទនជាតកំ សត្តមំ.

៣១៨. កណវេរជាតកំ (៤-២-៨)

៦៩. យំ តំ វសន្តសមយេ, កណវេរេសុ ភាណុសុ;

សាមំ ពាហាយ បីឡេសិ, សា តំ អារោគ្យមព្រវិ.

៧០. អម្ភោ ន កិរ សទ្ធេយ្យំ, យំ វាតោ បព្ពតំ វហេ;

បព្ពតញ្ចេ វហេ វាតោ, សព្ពម្បិ បថវិំ វហេ;

យត្ថ សាមា កាលកតា [កាលង្កតា (ក.)], សា មំ អារោគ្យមព្រវិ.

៧១. ន ចេវ សា កាលកតា, ន ច សា អញ្ញមិច្ឆតិ;

ឯកភត្តិកិនី [ឯកភត្តា កិរ (សី. ស្យា.), ឯកភត្តកិនី (បី.)] សាមា, តមេវ អភិកង្ខតិ.

៧២. អសន្ថុតំ មំ ចិរសន្ថុតេន [អសន្ធតំ មំ ចិរសន្ធតេន (ក.)], និមីនិ សាមា អធុវំ ធុវេន;

មយាបិ សាមា និមិនេយ្យ អញ្ញំ, ឥតោ អហំ ទូរតរំ គមិស្សន្តិ.

កណវេរជាតកំ អដ្ឋមំ.

៣១៩. តិត្តិរជាតកំ (៤-២-៩)

៧៣. សុសុខំ វត ជីវាមិ, លភាមិ ចេវ ភុញ្ជិតុំ;

បរិបន្ថេវ តិដ្ឋាមិ, កា នុ ភន្តេ គតី មម.

៧៤. មនោ ចេ តេ នប្បណមតិ, បក្ខិ បាបស្ស កម្មុនោ;

អព្យាវដស្ស ភទ្រស្ស, ន បាបមុបលិម្បតិ.

៧៥. ញាតកោ នោ និសិន្នោតិ, ពហុ អាគច្ឆតេ ជនោ;

បដិច្ច កម្មំ ផុសតិ, តស្មិំ មេ សង្កតេ មនោ.

៧៦. ន បដិច្ច កម្មំ ផុសតិ, មនោ ចេ នប្បទុស្សតិ;

អប្បោស្សុក្កស្ស ភទ្រស្ស, ន បាបមុបលិម្បតីតិ.

តិត្តិរជាតកំ នវមំ.

៣២០. សុច្ចជជាតកំ (៤-២-១០)

៧៧. សុច្ចជំ វត នច្ចជិ, វាចាយ អទទំ គិរិំ;

កិំ ហិតស្ស ចជន្តស្ស, វាចាយ អទទ បព្ពតំ.

៧៨. យញ្ហិ កយិរា តញ្ហិ វទេ, យំ ន កយិរា ន តំ វទេ;

អករោន្តំ ភាសមានំ, បរិជានន្តិ បណ្ឌិតា.

៧៩. រាជបុត្ត នមោ ត្យត្ថុ, សច្ចេ ធម្មេ ឋិតោ ចសិ;

យស្ស តេ ព្យសនំ បត្តោ, សច្ចស្មិំ រមតេ មនោ.

៨០. យា ទលិទ្ទី ទលិទ្ទស្ស, អឌ្ឍា អឌ្ឍស្ស កិត្តិម [កិត្តិមា (សី. ស្យា. បី.)];

សា ហិស្ស បរមា ភរិយា, សហិរញ្ញស្ស ឥត្ថិយោតិ.

សុច្ចជជាតកំ ទសមំ.

បុចិមន្ទវគ្គោ ទុតិយោ.

តស្សុទ្ទានំ –

អថ ចោរ សកស្សប ខន្តីវរោ, ទុជ្ជីវិតតា ច វរា ផរុសា;

អថ សស មតញ្ច វសន្ត សុខំ, សុច្ចជំវតនច្ចជិនា ច ទសាតិ.