៣១៣. ខន្តីវាទីជាតកំ (៤-២-៣)

៤៩. យោ តេ ហត្ថេ ច បាទេ ច, កណ្ណនាសញ្ច ឆេទយិ;

តស្ស កុជ្ឈ មហាវីរ, មា រដ្ឋំ វិនសា [វិនស្ស (ក. សី. ស្យា. ក.)] ឥទំ.

៥០. យោ មេ ហត្ថេ ច បាទេ ច, កណ្ណនាសញ្ច ឆេទយិ;

ចិរំ ជីវតុ សោ រាជា, ន ហិ កុជ្ឈន្តិ មាទិសា.

៥១. អហូ អតីតមទ្ធានំ [អហុ អតីតមទ្ធានេ (ស្យា. បី. ក.)], សមណោ ខន្តិទីបនោ;

តំ ខន្តិយាយេវ ឋិតំ, កាសិរាជា អឆេទយិ.

៥២. តស្ស កម្ម [កម្មស្ស (សី. បី.)] ផរុសស្ស, វិបាកោ កដុកោ អហុ;

យំ កាសិរាជា វេទេសិ, និរយម្ហិ សមប្បិតោតិ.

ខន្តីវាទីជាតកំ តតិយំ.