៣០៤. ទទ្ទរជាតកំ (៤-១-៤)

១៣. ឥមានិ មំ ទទ្ទរ តាបយន្តិ, វាចាទុរុត្តានិ មនុស្សលោកេ;

មណ្ឌូកភក្ខា ឧទកន្តសេវី, អាសីវិសំ មំ អវិសា សបន្តិ.

១៤. សកា រដ្ឋា បព្ពាជិតោ, អញ្ញំ ជនបទំ គតោ;

មហន្តំ កោដ្ឋំ កយិរាថ, ទុរុត្តានំ [ទុរុត្តានិ (ក.)] និធេតវេ.

១៥. យត្ថ បោសំ ន ជានន្តិ, ជាតិយា វិនយេន វា;

ន តត្ថ មានំ កយិរាថ, វសមញ្ញាតកេ ជនេ.

១៦. វិទេសវាសំ វសតោ, ជាតវេទសមេនបិ [ជាតវេទភយេនបិ (ក.)];

ខមិតព្ពំ សបញ្ញេន, អបិ ទាសស្ស តជ្ជិតន្តិ.

ទទ្ទរជាតកំ ចតុត្ថំ.