១. កាលិង្គវគ្គោ

៣០១. ចូឡកាលិង្គជាតកំ (៤-១-១)

១. វិវរថិមាសំ [វិវរថ ឥមាសំ (សី. ស្យា. បី.)] ទ្វារំ, នគរំ បវិសន្តុ [បវិសិតុំ មយា; (ក.)] អរុណរាជស្ស;

សីហេន សុសិដ្ឋេន, សុរក្ខិតំ [សុសត្ថេន, សុរក្ខិតំ (សី. បី.), សុសិដ្ឋេន (ក.)] នន្ទិសេនេន.

២. ជយោ កលិង្គានមសយ្ហសាហិនំ, បរាជយោ អនយោ [អជយោ (ស្យា.), អន្វិតោ (ក.)] អស្សកានំ;

ឥច្ចេវ តេ ភាសិតំ ព្រហ្មចារិ, ន ឧជ្ជុភូតា វិតថំ ភណន្តិ.

៣. ទេវា មុសាវាទមុបាតិវត្តា, សច្ចំ ធនំ បរមំ តេសុ [តថំ បេមករំ នុ (ក.), តថំ បរមំ ករំ នុ (ស្យា.)] សក្ក;

តំ តេ មុសា ភាសិតំ ទេវរាជ, កិំ វា បដិច្ច មឃវា មហិន្ទ.

៤. ននុ តេ សុតំ ព្រាហ្មណ ភញ្ញមានេ, ទេវា ន ឥស្សន្តិ បុរិសបរក្កមស្ស;

ទមោ សមាធិ មនសោ អភេជ្ជោ [អទេជ្ជោ (សី. បី.), អភិជ្ជោ (ក.)], អព្យគ្គតា និក្កមនញ្ច [និក្ខមនញ្ច (សី.)] កាលេ;

ទឡ្ហញ្ច វិរិយំ បុរិសបរក្កមោ ច, តេនេវ អាសិ វិជយោ អស្សកានន្តិ.

ចូឡកាលិង្គជាតកំ បឋមំ.

៣០២. មហាអស្សារោហជាតកំ (៤-១-២)

៥. អទេយ្យេសុ ទទំ ទានំ, ទេយ្យេសុ នប្បវេច្ឆតិ;

អាបាសុ ព្យសនំ បត្តោ, សហាយំ នាធិគច្ឆតិ.

៦. នាទេយ្យេសុ ទទំ ទានំ, ទេយ្យេសុ យោ បវេច្ឆតិ;

អាបាសុ ព្យសនំ បត្តោ, សហាយមធិគច្ឆតិ.

៧. សញ្ញោគសម្ភោគវិសេសទស្សនំ, អនរិយធម្មេសុ សឋេសុ នស្សតិ;

កតញ្ច អរិយេសុ ច អជ្ជវេសុ, មហប្ផលំ ហោតិ អណុម្បិ តាទិសុ.

៨. យោ បុព្ពេ កតកល្យាណោ, អកា លោកេ សុទុក្ករំ;

បច្ឆា កយិរា ន វា កយិរា, អច្ចន្តំ បូជនារហោតិ.

មហាអស្សារោហជាតកំ ទុតិយំ.

៣០៣. ឯករាជជាតកំ (៤-១-៣)

៩. អនុត្តរេ កាមគុណេ សមិទ្ធេ, ភុត្វាន បុព្ពេ វសី ឯករាជ;

សោ ទានិ ទុគ្គេ នរកម្ហិ ខិត្តោ, នប្បជ្ជហេ វណ្ណពលំ បុរាណំ.

១០. បុព្ពេវ ខន្តី ច តបោ ច មយ្ហំ, សម្បត្ថិតា ទុព្ភិសេន [ទព្ពសេនា (សី. បី.)] អហោសិ;

តំ ទានិ លទ្ធាន កថំ នុ រាជ, ជហេ អហំ វណ្ណពលំ បុរាណំ.

១១. សព្ពា កិរេវំ បរិនិដ្ឋិតានិ, យសស្សិនំ បញ្ញវន្តំ វិសយ្ហ;

យសោ ច លទ្ធា បុរិមំ ឧឡារំ, នប្បជ្ជហេ វណ្ណពលំ បុរាណំ.

១២. បនុជ្ជ ទុក្ខេន សុខំ ជនិន្ទ, សុខេន វា ទុក្ខមសយ្ហសាហិ;

ឧភយត្ថ សន្តោ អភិនិព្ពុតត្តា, សុខេ ច ទុក្ខេ ច ភវន្តិ តុល្យាតិ.

ឯករាជជាតកំ តតិយំ.

៣០៤. ទទ្ទរជាតកំ (៤-១-៤)

១៣. ឥមានិ មំ ទទ្ទរ តាបយន្តិ, វាចាទុរុត្តានិ មនុស្សលោកេ;

មណ្ឌូកភក្ខា ឧទកន្តសេវី, អាសីវិសំ មំ អវិសា សបន្តិ.

១៤. សកា រដ្ឋា បព្ពាជិតោ, អញ្ញំ ជនបទំ គតោ;

មហន្តំ កោដ្ឋំ កយិរាថ, ទុរុត្តានំ [ទុរុត្តានិ (ក.)] និធេតវេ.

១៥. យត្ថ បោសំ ន ជានន្តិ, ជាតិយា វិនយេន វា;

ន តត្ថ មានំ កយិរាថ, វសមញ្ញាតកេ ជនេ.

១៦. វិទេសវាសំ វសតោ, ជាតវេទសមេនបិ [ជាតវេទភយេនបិ (ក.)];

ខមិតព្ពំ សបញ្ញេន, អបិ ទាសស្ស តជ្ជិតន្តិ.

ទទ្ទរជាតកំ ចតុត្ថំ.

៣០៥. សីលវីមំសនជាតកំ (៤-១-៥)

១៧. នត្ថិ លោកេ រហោ នាម, បាបកម្មំ បកុព្ពតោ;

បស្សន្តិ វនភូតានិ, តំ ពាលោ មញ្ញតី រហោ.

១៨. អហំ រហោ ន បស្សាមិ, សុញ្ញំ វាបិ ន វិជ្ជតិ;

យត្ថ អញ្ញំ [សុញ្ញំ (ស្យា. ក.)] ន បស្សាមិ, អសុញ្ញំ ហោតិ តំ មយា.

១៩. ទុជ្ជច្ចោ ច សុជច្ចោ [អជច្ចោ (បី.)] ច, នន្ទោ ច សុខវឌ្ឍិតោ [សុខវច្ឆកោ (សី.), សុខវច្ឆនោ (ស្យា. បី.)];

វេជ្ជោ ច អទ្ធុវសីលោ [អថ សីលោ (ក.)] ច, តេ ធម្មំ ជហុ មត្ថិកា.

២០. ព្រាហ្មណោ ច កថំ ជហេ, សព្ពធម្មាន បារគូ;

យោ ធម្មមនុបាលេតិ, ធិតិមា សច្ចនិក្កមោតិ.

សីលវីមំសនជាតកំ បញ្ចមំ.

៣០៦. សុជាតជាតកំ (៤-១-៦)

២១. កិមណ្ឌកា ឥមេ ទេវ, និក្ខិត្តា កំសមល្លកេ;

ឧបលោហិតកា វគ្គូ, តំ [តេ (បី.)] មេ អក្ខាហិ បុច្ឆិតោ.

២២. យានិ បុរេ តុវំ ទេវិ, ភណ្ឌុ នន្តកវាសិនី;

ឧច្ឆង្គហត្ថា បចិនាសិ, តស្សា តេ កោលិយំ ផលំ.

២៣. ឧឌ្ឌយ្ហតេ ន រមតិ, ភោគា វិប្បជហន្តិ តំ [វិប្បជហន្តិ’មំ (?)];

តត្ថេវិមំ បដិនេថ, យត្ថ កោលំ បចិស្សតិ.

២៤. ហោន្តិ ហេតេ មហារាជ, ឥទ្ធិប្បត្តាយ [ឥទ្ធិមត្តាយ (ក.)] នារិយា;

ខម ទេវ សុជាតាយ, មាស្សា [មាសុ (ក.)] កុជ្ឈ រថេសភាតិ.

សុជាតជាតកំ ឆដ្ឋំ.

៣០៧. បលាសជាតកំ (៤-១-៧)

២៥. អចេតនំ ព្រាហ្មណ អស្សុណន្តំ, ជានោ អជានន្តមិមំ បលាសំ;

អារទ្ធវិរិយោ ធុវំ អប្បមត្តោ, សុខសេយ្យំ បុច្ឆសិ កិស្ស ហេតុ.

២៦. ទូរេ សុតោ ចេវ ព្រហា ច រុក្ខោ, ទេសេ ឋិតោ ភូតនិវាសរូបោ;

តស្មា នមស្សាមិ ឥមំ បលាសំ, យេ ចេត្ថ ភូតា តេ [តេ ច (សី. បី.)] ធនស្ស ហេតុ.

២៧. សោ តេ ករិស្សាមិ យថានុភាវំ, កតញ្ញុតំ ព្រាហ្មណ បេក្ខមានោ;

កថញ្ហិ អាគម្ម សតំ សកាសេ, មោឃានិ តេ អស្សុ បរិផន្ទិតានិ.

២៨. យោ តិន្ទុករុក្ខស្ស បរោ [បុរោ (ក.)] បិលក្ខោ [បិលក្ខុ (សី. បី.), មិលក្ខុ (ក.)], បរិវារិតោ បុព្ពយញ្ញោ ឧឡារោ;

តស្សេស មូលស្មិំ និធិ និខាតោ, អទាយាទោ គច្ឆ តំ ឧទ្ធរាហីតិ.

បលាសជាតកំ សត្តមំ.

៣០៨. សកុណជាតកំ (៤-១-៨)

២៩. អករម្ហស តេ កិច្ចំ, យំ ពលំ អហុវម្ហសេ;

មិគរាជ នមោ ត្យត្ថុ, អបិ កិញ្ចិ លភាមសេ.

៣០. មម លោហិតភក្ខស្ស, និច្ចំ លុទ្ទានិ កុព្ពតោ;

ទន្តន្តរគតោ សន្តោ, តំ ពហុំ យម្បិ ជីវសិ.

៣១. អកតញ្ញុមកត្តារំ, កតស្ស អប្បដិការកំ;

យស្មិំ កតញ្ញុតា នត្ថិ, និរត្ថា តស្ស សេវនា.

៣២. យស្ស សម្មុខចិណ្ណេន, មិត្តធម្មោ ន លព្ភតិ;

អនុសូយ [អនុសុយ្យ (សី. បី.)] មនក្កោសំ, សណិកំ តម្ហា អបក្កមេតិ.

សកុណជាតកំ អដ្ឋមំ.

៣០៩. ឆវកជាតកំ (៤-១-៩)

៣៣. សព្ពមិទំ ចរិមំ កតំ [ចរិមវតំ (សី. បី.)], ឧភោ ធម្មំ ន បស្សរេ;

ឧភោ បកតិយា ចុតា, យោ ចាយំ មន្តេជ្ឈាបេតិ [មន្តជ្ឈាយតិ (សី.), សជ្ឈាបយតិ (បី.)];

យោ ច មន្តំ អធីយតិ.

៣៤. សាលីនំ ឱទនំ ភុញ្ជេ, សុចិំ មំសូបសេចនំ;

តស្មា ឯតំ ន សេវាមិ, ធម្មំ ឥសីហិ សេវិតំ.

៣៥. បរិព្ពជ មហា លោកោ [មហាព្រហ្មេ (ក.)], បចន្តញ្ញេបិ បាណិនោ;

មា តំ អធម្មោ អាចរិតោ, អស្មា កុម្ភមិវាភិទា.

៣៦. ធិរត្ថុ តំ យសលាភំ, ធនលាភញ្ច ព្រាហ្មណ;

យា វុត្តិ វិនិបាតេន, អធម្មចរណេន វាតិ.

ឆវកជាតកំ នវមំ.

៣១០. សេយ្យជាតកំ (៤-១-១០)

៣៧. សសមុទ្ទបរិយាយំ, មហិំ សាគរកុណ្ឌលំ;

ន ឥច្ឆេ សហ និន្ទាយ, ឯវំ សេយ្យ [សយ្ហ (សី. ស្យា. បី.)] វិជានហិ.

៣៨. ធិរត្ថុ តំ យសលាភំ, ធនលាភញ្ច ព្រាហ្មណ;

យា វុត្តិ វិនិបាតេន, អធម្មចរណេន វា.

៣៩. អបិ ចេ បត្តមាទាយ, អនគារោ បរិព្ពជេ;

សាយេវ ជីវិកា សេយ្យោ, យា ចាធម្មេន ឯសនា.

៤០. អបិ ចេ បត្តមាទាយ, អនគារោ បរិព្ពជេ;

អញ្ញំ អហិំសយំ លោកេ, អបិ រជ្ជេន តំ វរន្តិ.

សេយ្យជាតកំ [សយ្ហជាតកំ (សី. ស្យា. បី.)] ទសមំ.

កាលិង្គវគ្គោ [វិវរវគ្គោ (សី. បី.)] បឋមោ.

តស្សុទ្ទានំ –

វិវរញ្ច អទេយ្យ សមិទ្ធវរំ, អថ ទទ្ទរ បាបមហាតិរហោ;

អថ កោលិ បលាសវរញ្ច ករ, ចរិមំ សសមុទ្ទវរេន ទសាតិ.