២. បទុមវគ្គោ

២៦១. បទុមជាតកំ (៣-២-១)

៣១. យថា កេសា ច មស្សូ ច, ឆិន្នំ ឆិន្នំ វិរូហតិ;

ឯវំ រូហតុ តេ នាសា, បទុមំ ទេហិ យាចិតោ.

៣២. យថា សារទិកំ ពីជំ, ខេត្តេ វុត្តំ វិរូហតិ;

ឯវំ រូហតុ តេ នាសា, បទុមំ ទេហិ យាចិតោ.

៣៣. ឧភោបិ បលបន្តេតេ [វិលបន្តេតេ (ស្យា. ក.)], អបិ បទ្មានិ ទស្សតិ;

វជ្ជុំ វា តេ ន វា វជ្ជុំ, នត្ថិ នាសាយ រូហនា;

ទេហិ សម្ម បទុមានិ, អហំ យាចាមិ យាចិតោតិ.

បទុមជាតកំ បឋមំ.

២៦២. មុទុបាណិជាតកំ (៣-២-២)

៣៤. បាណិ ចេ មុទុកោ ចស្ស, នាគោ ចស្ស សុការិតោ;

អន្ធការោ ច វស្សេយ្យ, អថ នូន តទា សិយា.

៣៥. អនលា មុទុសម្ភាសា, ទុប្បូរា តា [ទុប្បូរត្តា (ក.)] នទីសមា;

សីទន្តិ នំ វិទិត្វាន, អារកា បរិវជ្ជយេ.

៣៦. យំ ឯតា ឧបសេវន្តិ, ឆន្ទសា វា ធនេន វា;

ជាតវេទោវ សំ ឋានំ, ខិប្បំ អនុទហន្តិ នន្តិ.

មុទុបាណិជាតកំ ទុតិយំ.

២៦៣. ចូឡបលោភនជាតកំ (៣-២-៣)

៣៧. អភិជ្ជមានេ វារិស្មិំ, សយំ [អយំ (ក.)] អាគម្ម ឥទ្ធិយា;

មិស្សីភាវិត្ថិយា គន្ត្វា, សំសីទសិ [សំសីទតិ (ក.)] មហណ្ណវេ.

៣៨. អាវដ្ដនី មហាមាយា, ព្រហ្មចរិយវិកោបនា;

សីទន្តិ នំ វិទិត្វាន, អារកា បរិវជ្ជយេ.

៣៩. យំ ឯតា ឧបសេវន្តិ, ឆន្ទសា វា ធនេន វា;

ជាតវេទោវ សំ ឋានំ, ខិប្បំ អនុទហន្តិ នន្តិ.

ចូឡបលោភន [ចុល្លបលោភន (សី. ស្យា. បី.)] ជាតកំ តតិយំ.

២៦៤. មហាបនាទជាតកំ (៣-២-៤)

៤០. បនាទោ នាម សោ រាជា, យស្ស យូបោ សុវណ្ណយោ;

តិរិយំ សោឡសុព្ពេធោ [សោឡសបព្ពេធោ (សី. បី.)], ឧទ្ធមាហុ [ឧច្ចមាហុ (សី. ស្យា. បី.)] សហស្សធា.

៤១. សហស្សកណ្ឌោ សតគេណ្ឌុ [សតភេទោ (សី. បី.), សតភេណ្ឌុ (សី. និស្សយ)], ធជាសុ ហរិតាមយោ;

អនច្ចុំ តត្ថ គន្ធព្ពា, ឆ សហស្សានិ សត្តធា.

៤២. ឯវមេតំ [ឯវមេវ (ក.)] តទា អាសិ, យថា ភាសសិ ភទ្ទជិ;

សក្កោ អហំ តទា អាសិំ, វេយ្យាវច្ចករោ តវាតិ.

មហាបនាទជាតកំ ចតុត្ថំ.

២៦៥. ខុរប្បជាតកំ (៣-២-៥)

៤៣. ទិស្វា ខុរប្បេ ធនុវេគនុន្នេ, ខគ្គេ គហីតេ តិខិណេ តេលធោតេ;

តស្មិំ ភយស្មិំ មរណេ វិយូឡ្ហេ, កស្មា នុ តេ នាហុ ឆម្ភិតត្តំ.

៤៤. ទិស្វា ខុរប្បេ ធនុវេគនុន្នេ, ខគ្គេ គហីតេ តិខិណេ តេលធោតេ;

តស្មិំ ភយស្មិំ មរណេ វិយូឡ្ហេ, វេទំ អលត្ថំ វិបុលំ ឧឡារំ.

៤៥. សោ វេទជាតោ អជ្ឈភវិំ អមិត្តេ, បុព្ពេវ មេ ជីវិតមាសិ ចត្តំ;

ន ហិ ជីវិតេ អាលយំ កុព្ពមានោ, សូរោ កយិរា សូរកិច្ចំ កទាចីតិ.

ខុរប្បជាតកំ បញ្ចមំ.

២៦៦. វាតគ្គសិន្ធវជាតកំ (៣-២-៦)

៤៦. យេនាសិ កិសិយា បណ្ឌុ, យេន ភត្តំ ន រុច្ចតិ;

អយំ សោ អាគតោ ភត្តា [តាតោ (សី. ស្យា. បី.)], កស្មា ទានិ បលាយសិ.

៤៧. សចេ [ន ខោ (ស្យា. ក.)] បនាទិកេនេវ, សន្ថវោ នាម ជាយតិ;

យសោ ហាយតិ ឥត្ថីនំ, តស្មា តាត បលាយហំ [បលាយិហំ (ស្យា.), បលាយិតំ (ក.)].

៤៨. យស្សស្សិនំ កុលេ ជាតំ, អាគតំ យា ន ឥច្ឆតិ;

សោចតិ ចិររត្តាយ, វាតគ្គមិវ ភទ្ទលីតិ [កុន្ទលីតិ (សី. បី.), គទ្រភីតិ (ស្យា.)].

វាតគ្គសិន្ធវជាតកំ ឆដ្ឋំ.

២៦៧. កក្កដកជាតកំ (៣-២-៧)

៤៩. សិង្គីមិគោ អាយតចក្ខុនេត្តោ, អដ្ឋិត្តចោ វារិសយោ អលោមោ;

តេនាភិភូតោ កបណំ រុទាមិ, មា ហេវ មំ បាណសមំ ជហេយ្យ [ជហេយ្យា (បី.) ជហា’យ្យេ (?)].

៥០. អយ្យ ន តំ ជហិស្សាមិ, កុញ្ជរំ សដ្ឋិហាយនំ [កុញ្ជរ សដ្ឋិហាយន (សី. បី.)];

បថព្យា ចាតុរន្តាយ, សុប្បិយោ ហោសិ មេ តុវំ.

៥១. យេ កុឡីរា សមុទ្ទស្មិំ, គង្គាយ យមុនាយ [នម្មទាយ (សី. បី.)] ច;

តេសំ ត្វំ វារិជោ សេដ្ឋោ, មុញ្ច រោទន្តិយា បតិន្តិ.

កក្កដក [កុឡីរ (ក.)] ជាតកំ សត្តមំ.

២៦៨. អារាមទូសកជាតកំ (៣-២-៨)

៥២. យោ វេ សព្ពសមេតានំ, អហុវា សេដ្ឋសម្មតោ;

តស្សាយំ ឯទិសី បញ្ញា, កិមេវ ឥតរា បជា.

៥៣. ឯវមេវ តុវំ ព្រហ្មេ, អនញ្ញាយ វិនិន្ទសិ;

កថំ មូលំ អទិស្វាន [កថំហិ មូលំ អទិត្វា (ស្យា. បី.)], រុក្ខំ ជញ្ញា បតិដ្ឋិតំ.

៥៤. នាហំ តុម្ហេ វិនិន្ទាមិ, យេ ចញ្ញេ វានរា វនេ;

វិស្សសេនោវ គារយ្ហោ, យស្សត្ថា រុក្ខរោបកាតិ.

អារាមទូសកជាតកំ អដ្ឋមំ.

២៦៩. សុជាតជាតកំ (៣-២-៩)

៥៥. ន ហិ វណ្ណេន សម្បន្នា, មញ្ជុកា បិយទស្សនា;

ខរវាចា បិយា ហោតិ, អស្មិំ លោកេ បរម្ហិ ច.

៥៦. ននុ បស្សសិមំ កាឡិំ, ទុព្ពណ្ណំ តិលកាហតំ;

កោកិលំ សណ្ហវាចេន, ពហូនំ បាណិនំ បិយំ.

៥៧. តស្មា សខិលវាចស្ស, មន្តភាណី អនុទ្ធតោ;

អត្ថំ ធម្មញ្ច ទីបេតិ, មធុរំ តស្ស ភាសិតន្តិ.

សុជាតជាតកំ នវមំ.

២៧០. ឧលូកជាតកំ (៣-២-១០)

៥៨. សព្ពេហិ កិរ ញាតីហិ, កោសិយោ ឥស្សរោ កតោ;

សចេ ញាតីហិ អនុញ្ញាតោ [ញាតីហនុញ្ញាតោ (សី. បី.)], ភណេយ្យាហំ ឯកវាចិកំ.

៥៩. ភណ សម្ម អនុញ្ញាតោ, អត្ថំ ធម្មញ្ច កេវលំ;

សន្តិ ហិ ទហរា បក្ខី, បញ្ញវន្តោ ជុតិន្ធរា.

៦០. ន មេ រុច្ចតិ ភទ្ទំ វោ [ភទន្តេ (ក.)], ឧលូកស្សាភិសេចនំ;

អក្កុទ្ធស្ស មុខំ បស្ស, កថំ កុទ្ធោ ករិស្សតីតិ.

ឧលូកជាតកំ ទសមំ.

បទុមវគ្គោ ទុតិយោ.

តស្សុទ្ទានំ –

បទុមុត្តម នាគសិរិវ្ហយនោ, ស-មហណ្ណវ យូប ខុរប្បវរោ;

អថ ភទ្ទលី កុញ្ជរ រុក្ខ បុន, ខរវាច ឧលូកវរេន ទសាតិ.