៩. ឧបាហនវគ្គោ

២៣១. ឧបាហនជាតកំ (២-៩-១)

១៦១. យថាបិ កីតា បុរិសស្សុបាហនា, សុខស្ស អត្ថាយ ទុខំ ឧទព្ពហេ;

ឃម្មាភិតត្តា ថលសា បបីឡិតា, តស្សេវ បាទេ បុរិសស្ស ខាទរេ.

១៦២. ឯវមេវ យោ ទុក្កុលីនោ អនរិយោ, តម្មាក [តម្ហាក (សី.), តុម្ហាក (ស្យា. បី.)] វិជ្ជញ្ច សុតញ្ច អាទិយ;

តមេវ សោ តត្ថ សុតេន ខាទតិ, អនរិយោ វុច្ចតិ ទុបាហនូបមោតិ [បានទូបមោតិ (សី. បី.)].

ឧបាហនជាតកំ បឋមំ.

២៣២. វីណាគុណជាតកំ (២-៩-២)

១៦៣. ឯកចិន្តិតោ យមត្ថោ, ពាលោ អបរិណាយកោ;

ន ហិ ខុជ្ជេន វាមេន, ភោតិ សង្គន្តុមរហសិ.

១៦៤. បុរិសូសភំ មញ្ញមានា, អហំ ខុជ្ជមកាមយិំ;

សោយំ សំកុដិតោ សេតិ, ឆិន្នតន្តិ យថា វិណាតិ [ថុណាតិ (សី.)].

វីណាគុណជាតកំ ទុតិយំ.

២៣៣. វិកណ្ណជាតកំ (២-៩-៣)

១៦៥. កាមំ យហិំ ឥច្ឆសិ តេន គច្ឆ, វិទ្ធោសិ មម្មម្ហិ [មមស្មិ (ក.)] វិកណ្ណកេន;

ហតោសិ ភត្តេន សុវាទិតេន [សវាទិតេន (សី. ស្យា. បី.)], លោលោ ច មច្ឆេ អនុពន្ធមានោ.

១៦៦. ឯវម្បិ លោកាមិសំ ឱបតន្តោ, វិហញ្ញតី ចិត្តវសានុវត្តី;

សោ ហញ្ញតិ ញាតិសខាន មជ្ឈេ, មច្ឆានុគោ សោរិវ សុំសុមារោតិ [សុសុមារោ (ក.)].

វិកណ្ណជាតកំ តតិយំ.

២៣៤. អសិតាភូជាតកំ (២-៩-៤)

១៦៧. ត្វមេវ ទានិមករ [មករិ (ស្យា.), មករា (ក. សី.)], យំ កាមោ ព្យគមា តយិ;

សោយំ អប្បដិសន្ធិកោ, ខរឆិន្នំវ រេនុកំ [រេរុកំ (សី. បី.)].

១៦៨. អត្រិច្ឆំ [អត្រិច្ឆា (សី. ស្យា. បី.)] អតិលោភេន, អតិលោភមទេន ច;

ឯវំ ហាយតិ អត្ថម្ហា, អហំវ អសិតាភុយាតិ.

អសិតាភូជាតកំ ចតុត្ថំ.

២៣៥. វច្ឆនខជាតកំ (២-៩-៥)

១៦៩. សុខា ឃរា វច្ឆនខ, សហិរញ្ញា សភោជនា;

យត្ថ ភុត្វា បិវិត្វា ច, សយេយ្យាថ អនុស្សុកោ.

១៧០. ឃរា នានីហមានស្ស, ឃរា នាភណតោ មុសា;

ឃរា នាទិន្នទណ្ឌស្ស, បរេសំ អនិកុព្ពតោ [អនិក្រុព្ពតោ (ក.)];

ឯវំ ឆិទ្ទំ ទុរភិសម្ភវំ [ទុរភិភវំ (សី. បី.)], កោ ឃរំ បដិបជ្ជតីតិ.

វច្ឆនខជាតកំ បញ្ចមំ.

២៣៦. ពកជាតកំ (២-៩-៦)

១៧១. ភទ្ទកោ វតយំ បក្ខី, ទិជោ កុមុទសន្និភោ;

វូបសន្តេហិ បក្ខេហិ, មន្ទមន្ទោវ ឈាយតិ.

១៧២. នាស្ស សីលំ វិជានាថ, អនញ្ញាយ បសំសថ;

អម្ហេ ទិជោ ន បាលេតិ, តេន បក្ខី ន ផន្ទតីតិ.

ពកជាតកំ ឆដ្ឋំ.

២៣៧. សាកេតជាតកំ (២-៩-៧)

១៧៣. កោ នុ ខោ ភគវា ហេតុ, ឯកច្ចេ ឥធ បុគ្គលេ;

អតីវ ហទយំ និព្ពាតិ, ចិត្តញ្ចាបិ បសីទតិ.

១៧៤. បុព្ពេវ សន្និវាសេន, បច្ចុប្បន្នហិតេន វា;

ឯវំ តំ ជាយតេ បេមំ, ឧប្បលំវ យថោទកេតិ.

សាកេតជាតកំ សត្តមំ.

២៣៨. ឯកបទជាតកំ (២-៩-៨)

១៧៥. ឥង្ឃ ឯកបទំ តាត, អនេកត្ថបទស្សិតំ [បទនិស្សិតំ (សី. បី.)];

កិញ្ចិ សង្គាហិកំ ព្រូសិ, យេនត្ថេ សាធយេមសេ.

១៧៦. ទក្ខេយ្យេកបទំ តាត, អនេកត្ថបទស្សិតំ;

តញ្ច សីលេន សញ្ញុត្តំ, ខន្តិយា ឧបបាទិតំ;

អលំ មិត្តេ សុខាបេតុំ, អមិត្តានំ ទុខាយ ចាតិ.

ឯកបទជាតកំ អដ្ឋមំ.

២៣៩. ហរិតមណ្ឌូកជាតកំ (២-៩-៩)

១៧៧. អាសីវិសម្បិ មំ [អាសីវិសំ មមំ (សី. បី.)] សន្តំ, បវិដ្ឋំ កុមិនាមុខំ;

រុច្ចតេ ហរិតាមាតា, យំ មំ ខាទន្តិ មច្ឆកា.

១៧៨. វិលុម្បតេវ បុរិសោ, យាវស្ស ឧបកប្បតិ;

យទា ចញ្ញេ វិលុម្បន្តិ, សោ វិលុត្តោ វិលុម្បតីតិ [វិលុប្បតីតិ (?)].

ហរិតមណ្ឌូកជាតកំ នវមំ.

២៤០. មហាបិង្គលជាតកំ (២-៩-១០)

១៧៩. សព្ពោ ជនោ ហិំសិតោ បិង្គលេន, តស្មិំ មតេ បច្ចយា [បច្ចយំ (សី. ស្យា. បី.)] វេទយន្តិ;

បិយោ នុ តេ អាសិ អកណ្ហនេត្តោ, កស្មា នុ ត្វំ រោទសិ ទ្វារបាល.

១៨០. ន មេ បិយោ អាសិ អកណ្ហនេត្តោ, ភាយាមិ បច្ចាគមនាយ តស្ស;

ឥតោ គតោ ហិំសេយ្យ មច្ចុរាជំ, សោ ហិំសិតោ អានេយ្យ បុន ឥធ.

១៨១. ទឌ្ឍោ វាហសហស្សេហិ, សិត្តោ ឃដសតេហិ សោ;

បរិក្ខតា ច សា ភូមិ, មា ភាយិ នាគមិស្សតីតិ.

មហាបិង្គលជាតកំ ទសមំ.

ឧបាហនវគ្គោ នវមោ.

តស្សុទ្ទានំ –

វរុបាហន ខុជ្ជ វិកណ្ណកកោ, អសិតាភុយ បញ្ចមវច្ឆនខោ;

ទិជ បេមវរុត្តមឯកបទំ, កុមិនាមុខ បិង្គលកេន ទសាតិ.