១០. សិង្គាលវគ្គោ

២៤១. សព្ពទាឋិជាតកំ (២-១០-១)

១៨២. សិង្គាលោ មានថទ្ធោ ច, បរិវារេន អត្ថិកោ;

បាបុណិ មហតិំ ភូមិំ, រាជាសិ សព្ពទាឋិនំ.

១៨៣. ឯវមេវ មនុស្សេសុ, យោ ហោតិ បរិវារវា;

សោ ហិ តត្ថ មហា ហោតិ, សិង្គាលោ វិយ ទាឋិនន្តិ.

សព្ពទាឋិជាតកំ បឋមំ.

២៤២. សុនខជាតកំ (២-១០-២)

១៨៤. ពាលោ វតាយំ សុនខោ, យោ វរត្តំ [យោ ច យោត្តំ (ក.)] ន ខាទតិ;

ពន្ធនា ច បមុញ្ចេយ្យ, អសិតោ ច ឃរំ វជេ.

១៨៥. អដ្ឋិតំ មេ មនស្មិំ មេ, អថោ មេ ហទយេ កតំ;

កាលញ្ច បដិកង្ខាមិ, យាវ បស្សុបតូ ជនោ [បសុបតុជ្ជនោ (ស្យា. ក.)].

សុនខជាតកំ ទុតិយំ.

២៤៣. គុត្តិលជាតកំ (២-១០-៣)

១៨៦. សត្តតន្តិំ សុមធុរំ, រាមណេយ្យំ អវាចយិំ;

សោ មំ រង្គម្ហិ អវ្ហេតិ, សរណំ មេ ហោហិ កោសិយ.

១៨៧. អហំ តំ សរណំ សម្ម [អហំ តេ សរណំ ហោមិ (វិ. វ. ៣២៨)], អហមាចរិយបូជកោ;

ន តំ ជយិស្សតិ សិស្សោ, សិស្សមាចរិយ ជេស្សសីតិ.

គុត្តិលជាតកំ តតិយំ.

២៤៤. វិគតិច្ឆជាតកំ (២-១០-៤)

១៨៨. យំ បស្សតិ ន តំ ឥច្ឆតិ, យញ្ច ន បស្សតិ តំ កិរិច្ឆតិ;

មញ្ញាមិ ចិរំ ចរិស្សតិ, ន ហិ តំ លច្ឆតិ យំ ស ឥច្ឆតិ.

១៨៩. យំ លភតិ ន តេន តុស្សតិ, យញ្ច បត្ថេតិ លទ្ធំ ហីឡេតិ;

ឥច្ឆា ហិ អនន្តគោចរា, វិគតិច្ឆាន [វីតិច្ឆានំ (សី. បី.)] នមោ ករោមសេតិ.

វិគតិច្ឆ [វីតិច្ឆ (សី. បី.)] ជាតកំ ចតុត្ថំ.

២៤៥. មូលបរិយាយជាតកំ (២-១០-៥)

១៩០. កាលោ ឃសតិ ភូតានិ, សព្ពានេវ សហត្តនា;

យោ ច កាលឃសោ ភូតោ, ស ភូតបចនិំ បចិ.

១៩១. ពហូនិ នរសីសានិ, លោមសានិ ព្រហានិ ច;

គីវាសុ បដិមុក្កានិ, កោចិទេវេត្ថ កណ្ណវាតិ.

មូលបរិយាយជាតកំ បញ្ចមំ.

២៤៦. ពាលោវាទជាតកំ (២-១០-៦)

១៩២. ហន្ត្វា ឆេត្វា [ឈត្វា (សី. បី.), ឃត្វា (ស្យា.)] វធិត្វា ច, ទេតិ ទានំ អសញ្ញតោ;

ឯទិសំ ភត្តំ ភុញ្ជមានោ, ស បាបមុបលិម្បតិ [ស បាបេន ឧបលិប្បតិ (សី. បី.)].

១៩៣. បុត្តទារម្បិ ចេ ហន្ត្វា, ទេតិ ទានំ អសញ្ញតោ;

ភុញ្ជមានោបិ សប្បញ្ញោ, ន បាបមុបលិម្បតីតិ.

ពាលោវាទជាតកំ ឆដ្ឋំ.

២៤៧. បាទញ្ជលីជាតកំ (២-១០-៧)

១៩៤. អទ្ធា បាទញ្ជលី សព្ពេ, បញ្ញាយ អតិរោចតិ;

តថា ហិ ឱដ្ឋំ ភញ្ជតិ, ឧត្តរិំ នូន បស្សតិ.

១៩៥. នាយំ ធម្មំ អធម្មំ វា, អត្ថានត្ថញ្ច ពុជ្ឈតិ;

អញ្ញត្រ ឱដ្ឋនិព្ភោគា, នាយំ ជានាតិ កិញ្ចនន្តិ.

បាទញ្ជលីជាតកំ សត្តមំ.

២៤៨. កិំសុកោបមជាតកំ (២-១០-៨)

១៩៦. សព្ពេហិ កិំសុកោ ទិដ្ឋោ, កិំន្វេត្ថ វិចិកិច្ឆថ;

ន ហិ សព្ពេសុ ឋានេសុ, សារថី បរិបុច្ឆិតោ.

១៩៧. ឯវំ សព្ពេហិ ញាណេហិ, យេសំ ធម្មា អជានិតា;

តេ វេ ធម្មេសុ កង្ខន្តិ, កិំសុកស្មិំវ ភាតរោតិ.

កិំសុកោបមជាតកំ អដ្ឋមំ.

២៤៩. សាលកជាតកំ (២-១០-៩)

១៩៨. ឯកបុត្តកោ ភវិស្សសិ, ត្វញ្ច នោ ហេស្សសិ ឥស្សរោ កុលេ;

ឱរោហ ទុមស្មា សាលក, ឯហិ ទានិ ឃរកំ វជេមសេ.

១៩៩. ននុ មំ សុហទយោតិ [ននុ មំ ហទយេតិ (សី. បី.)] មញ្ញសិ, យញ្ច មំ ហនសិ វេឡុយដ្ឋិយា;

បក្កម្ពវនេ រមាមសេ, គច្ឆ ត្វំ ឃរកំ យថាសុខន្តិ.

សាលកជាតកំ នវមំ.

២៥០. កបិជាតកំ (២-១០-១០)

២០០. អយំ ឥសី ឧបសមសំយមេ រតោ, ស តិដ្ឋតិ [សន្តិដ្ឋតិ (សី. បី.)] សិសិរភយេន អដ្ដិតោ;

ហន្ទ អយំ បវិសតុមំ អគារកំ, វិនេតុ សីតំ ទរថញ្ច កេវលំ.

២០១. នាយំ ឥសី ឧបសមសំយមេ រតោ, កបី អយំ ទុមវរសាខគោចរោ;

សោ ទូសកោ រោសកោ ចាបិ ជម្មោ, សចេវជេមម្បិ [សចេ + អាវជេ + ឥមម្បិ] ទូសេយ្យគារន្តិ [ទូសយេ ឃរន្តិ (សី. ស្យា. បី.)].

កបិជាតកំ ទសមំ.

សិង្គាលវគ្គោ ទសមោ.

តស្សុទ្ទានំ –

អថ រាជា សិង្គាលវរោ សុនខោ, តថា កោសិយ ឥច្ឆតិ កាលឃសោ;

អថ ទានវរោដ្ឋបិ សារថិនា, បុនម្ពវនញ្ច សិសិរកបិ ទសាតិ.

អថ វគ្គុទ្ទានំ –

ទឡ្ហញ្ច វគ្គំ អបរេន សន្ថវំ, កល្យាណវគ្គាសទិសោ ច រូហកំ;

នតំទឡ្ហ ពីរណថម្ភកំ បុន, កាសាវុបាហន សិង្គាលកេន ទសាតិ.

ទុកនិបាតំ និដ្ឋិតំ.