២. ទុកនិបាតោ

១. ទឡ្ហវគ្គោ

១៥១. រាជោវាទជាតកំ (២-១-១)

១. ទឡ្ហំ ទឡ្ហស្ស ខិបតិ, ពល្លិកោ [មល្លិកោ (សី. បី.)] មុទុនា មុទុំ;

សាធុម្បិ សាធុនា ជេតិ, អសាធុម្បិ អសាធុនា;

ឯតាទិសោ អយំ រាជា, មគ្គា ឧយ្យាហិ សារថិ.

២. អក្កោធេន ជិនេ កោធំ, អសាធុំ សាធុនា ជិនេ;

ជិនេ កទរិយំ ទានេន, សច្ចេនាលិកវាទិនំ;

ឯតាទិសោ អយំ រាជា, មគ្គា ឧយ្យាហិ សារថីតិ.

រាជោវាទជាតកំ បឋមំ.

១៥២. អសមេក្ខិតកម្មន្តំ, តុរិតាភិនិបាតិនំ.

សានិ កម្មានិ តប្បេន្តិ, ឧណ្ហំវជ្ឈោហិតំ មុខេ.

៤. សីហោ ច សីហនាទេន, ទទ្ទរំ អភិនាទយិ;

សុត្វា សីហស្ស និគ្ឃោសំ, សិង្គាលោ [សិគាលោ (សី. ស្យា. បី.)] ទទ្ទរេ វសំ;

ភីតោ សន្តាសមាបាទិ, ហទយញ្ចស្ស អប្ផលីតិ.

សិង្គាលជាតកំ [សិគាលជាតកំ (សី. ស្យា. បី.)] ទុតិយំ.

១៥៣. សូករជាតកំ (២-១-៣)

៥. ចតុប្បទោ អហំ សម្ម, ត្វម្បិ សម្ម ចតុប្បទោ;

ឯហិ សម្ម [សីហ (សី. បី.)] និវត្តស្សុ, កិំ នុ ភីតោ បលាយសិ.

៦. អសុចិ បូតិលោមោសិ, ទុគ្គន្ធោ វាសិ សូករ;

សចេ យុជ្ឈិតុកាមោសិ, ជយំ សម្ម ទទាមិ តេតិ.

សូករជាតកំ តតិយំ.

១៥៤. ឧរគជាតក (២-១-៤)

៧. ឥធូរគានំ បវរោ បវិដ្ឋោ, សេលស្ស វណ្ណេន បមោក្ខមិច្ឆំ;

ព្រហ្មញ្ច វណ្ណំ [វក្កំ (ក.)] អបចាយមានោ, ពុភុក្ខិតោ នោ វិតរាមិ [វិសហាមិ (ក. សិ. ស្យា. បី.)] ភោត្តុំ.

៨. សោ ព្រហ្មគុត្តោ ចិរមេវ ជីវ, ទិព្យា ច តេ បាតុភវន្តុ ភក្ខា;

យោ ព្រហ្មវណ្ណំ អបចាយមានោ, ពុភុក្ខិតោ នោ វិតរាសិ [សព្ពត្ថបិ សមានំ] ភោត្តុន្តិ.

ឧរគជាតកំ ចតុត្ថំ.

១៥៥. ភគ្គជាតកំ (២-១-៥)

៩. ជីវ វស្សសតំ ភគ្គ [គគ្គ (សី. បី.)], អបរានិ ច វីសតិំ [វីសតិ (ស្យា. ក.)];

មា មំ បិសាចា ខាទន្តុ, ជីវ ត្វំ សរទោ សតំ.

១០. ត្វម្បិ វស្សសតំ ជីវ, អបរានិ ច វីសតិំ;

វិសំ បិសាចា ខាទន្តុ, ជីវ ត្វំ សរទោ សតន្តិ.

ភគ្គជាតកំ បញ្ចមំ.

១៥៦. អលីនចិត្តជាតកំ (២-១-៦)

១១. អលីនចិត្តំ និស្សាយ, បហដ្ឋា មហតី ចមូ;

កោសលំ សេនាសន្តុដ្ឋំ, ជីវគ្គាហំ អគាហយិ.

១២. ឯវំ និស្សយសម្បន្នោ, ភិក្ខុ អារទ្ធវីរិយោ;

ភាវយំ កុសលំ ធម្មំ, យោគក្ខេមស្ស បត្តិយា;

បាបុណេ អនុបុព្ពេន, សព្ពសំយោជនក្ខយន្តិ.

អលីនចិត្តជាតកំ ឆដ្ឋំ.

១៥៧. គុណជាតកំ (២-១-៧)

១៣. យេន កាមំ បណាមេតិ, ធម្មោ ពលវតំ មិគី;

ឧន្នទន្តី វិជានាហិ, ជាតំ សរណតោ ភយំ.

១៤. អបិ ចេបិ ទុព្ពលោ មិត្តោ, មិត្តធម្មេសុ តិដ្ឋតិ;

សោ ញាតកោ ច ពន្ធុ ច, សោ មិត្តោ សោ ច មេ សខា;

ទាឋិនិ មាតិមញ្ញិត្ថោ [មញ្ញិវោ (ស្យា.), មញ្ញវ្ហោ (ក.)], សិង្គាលោ មម បាណទោតិ.

គុណជាតកំ សត្តមំ.

១៥៨. សុហនុជាតកំ (២-១-៨)

១៥. នយិទំ វិសមសីលេន, សោណេន សុហនូ សហ;

សុហនូបិ តាទិសោយេវ, យោ សោណស្ស សគោចរោ.

១៦. បក្ខន្ទិនា បគព្ភេន, និច្ចំ សន្ទានខាទិនា;

សមេតិ បាបំ បាបេន, សមេតិ អសតា អសន្តិ.

សុហនុជាតកំ អដ្ឋមំ.

១៥៩. មោរជាតកំ (២-១-៩)

១៧. ឧទេតយំ ចក្ខុមា ឯករាជា, ហរិស្សវណ្ណោ បថវិប្បភាសោ [បឋវិប្បភាសោ (សី. ស្យា. បី.)];

តំ តំ នមស្សាមិ ហរិស្សវណ្ណំ បថវិប្បភាសំ, តយាជ្ជ គុត្តា វិហរេមុ ទិវសំ.

យេ ព្រាហ្មណា វេទគូ សព្ពធម្មេ, តេ មេ នមោ តេ ច មំ បាលយន្តុ;

នមត្ថុ ពុទ្ធានំ [ពុទ្ធាន (?)] នមត្ថុ ពោធិយា, នមោ វិមុត្តានំ [វិមុត្តាន (?)] នមោ វិមុត្តិយា;

ឥមំ សោ បរិត្តំ កត្វា, មោរោ ចរតិ ឯសនា.

១៨. អបេតយំ ចក្ខុមា ឯករាជា, ហរិស្សវណ្ណោ បថវិប្បភាសោ;

តំ តំ នម្មស្សាមិ ហរិស្សវណ្ណំ បថវិប្បភាសំ, តយាជ្ជ គុត្តា វិហរេមុ រត្តិំ.

យេ ព្រាហ្មណា វេទគូ សព្ពធម្មេ, តេ មេ នមោ តេ ច មំ បាលយន្តុ;

នមត្ថុ ពុទ្ធានំ នមត្ថុ ពោធិយា, នមោ វិមុត្តានំ នមោ វិមុត្តិយា;

ឥមំ សោ បរិត្តំ កត្វា, មោរោ វាសមកប្បយីតិ.

មោរជាតកំ នវមំ.

១៦០. វិនីលជាតកំ (២-១-១០)

១៩. ឯវមេវ នូន [នុ (ក.)] រាជានំ, វេទេហំ មិថិលគ្គហំ;

អស្សា វហន្តិ អាជញ្ញា, យថា ហំសា វិនីលកំ.

២០. វិនីល ទុគ្គំ ភជសិ, អភូមិំ តាត សេវសិ;

គាមន្តកានិ [គាមន្តិកានិ (សី.), គាមន្តរានិ (ក.)] សេវស្សុ, ឯតំ មាតាលយំ តវាតិ.

វិនីលជាតកំ ទសមំ.

ទឡ្ហវគ្គោ បឋមោ.

តស្សុទ្ទានំ –

វរពល្លិក ទទ្ទរ សូករកោ, ឧរគូត្តម បញ្ចមភគ្គវរោ;

មហតីចមុ យាវ សិង្គាលវរោ, សុហនុត្តម មោរ វិនីលំ ទសាតិ.

២. សន្ថវវគ្គោ

១៦១. ឥន្ទសមានគោត្តជាតកំ (២-២-១)

២១. ន សន្ថវំ [សន្ធវំ (ក.)] កាបុរិសេន កយិរា, អរិយោ អនរិយេន បជានមត្ថំ;

ចិរានុវុត្ថោបិ ករោតិ បាបំ, គជោ យថា ឥន្ទសមានគោត្តំ.

២២. យំ ត្វេវ ជញ្ញា សទិសោ មមន្តិ, សីលេន បញ្ញាយ សុតេន ចាបិ;

តេនេវ មេត្តិំ កយិរាថ សទ្ធិំ, សុខោ ហវេ សប្បុរិសេន សង្គមោតិ.

ឥន្ទសមានគោត្តជាតកំ បឋមំ.

១៦២. សន្ថវជាតកំ (២-២-២)

២៣. ន សន្ថវស្មា បរមត្ថិ បាបិយោ, យោ សន្ថវោ [សន្ធវោ (ក.)] កាបុរិសេន ហោតិ;

សន្តប្បិតោ សប្បិនា បាយសេន [បាយាសេន (ក.)], កិច្ឆាកតំ បណ្ណកុដិំ អទយ្ហិ [អទឌ្ឍហិ (សី. ស្យា.), អទដ្ឋហិ (បី.), អទទ្ទហិ (?)].

២៤. ន សន្ថវស្មា បរមត្ថិ សេយ្យោ, យោ សន្ថវោ សប្បុរិសេន ហោតិ;

សីហស្ស ព្យគ្ឃស្ស ច ទីបិនោ ច, សាមា មុខំ លេហតិ សន្ថវេនាតិ.

សន្ថវជាតកំ ទុតិយំ.

១៦៣. សុសីមជាតកំ (២-២-៣)

២៥. កាឡា មិគា សេតទន្តា តវីមេ [តវ ឥមេ (សី. ស្យា. បី.)], បរោសតំ ហេមជាលាភិឆន្នា [ហេមជាលាភិសញ្ឆន្នា (សី.)];

តេ តេ ទទាមីតិ សុសីម ព្រូសិ, អនុស្សរំ បេត្តិបិតាមហានំ.

២៦. កាឡា មិគា សេតទន្តា មមីមេ [មម ឥមេ (សី. បី.)], បរោសតំ ហេមជាលាភិច្ឆន្នា;

តេ តេ ទទាមីតិ វទាមិ មាណវ, អនុស្សរំ បេត្តិបិតាមហានន្តិ.

សុសីមជាតកំ តតិយំ.

១៦៤. គិជ្ឈជាតកំ (២-២-៤)

២៧. យំ នុ គិជ្ឈោ យោជនសតំ, កុណបានិ អវេក្ខតិ;

កស្មា ជាលញ្ច បាសញ្ច, អាសជ្ជាបិ ន ពុជ្ឈសិ.

២៨. យទា បរាភវោ ហោតិ, បោសោ ជីវិតសង្ខយេ;

អថ ជាលញ្ច បាសញ្ច, អាសជ្ជាបិ ន ពុជ្ឈតីតិ.

គិជ្ឈជាតកំ ចតុត្ថំ.

១៦៥. នកុលជាតកំ (២-២-៥)

២៩. សន្ធិំ កត្វា អមិត្តេន, អណ្ឌជេន ជលាពុជ;

វិវរិយ ទាឋំ សេសិ [សយសិ (សី. ស្យា. បី.)], កុតោ តេ ភយមាគតំ.

៣០. សង្កេថេវ [សង្កតេវ (ក.)] អមិត្តស្មិំ, មិត្តស្មិម្បិ ន វិស្សសេ;

អភយា ភយមុប្បន្នំ, អបិ មូលានិ កន្តតីតិ [មូលំ និកន្តតីតិ (សី.)].

នកុលជាតកំ បញ្ចមំ.

១៦៦. ឧបសាឡកជាតកំ (២-២-៦)

៣១. ឧបសាឡកនាមានិ [ឧបសាឡ្ហកនាមានំ (សី. ស្យា. បី.)], សហស្សានិ ចតុទ្ទស;

អស្មិំ បទេសេ ទឌ្ឍានិ, នត្ថិ លោកេ អនាមតំ.

៣២. យម្ហិ សច្ចញ្ច ធម្មោ ច, អហិំសា សំយមោ ទមោ;

ឯតំ អរិយា សេវន្តិ, ឯតំ លោកេ អនាមតន្តិ.

ឧបសាឡកជាតកំ ឆដ្ឋំ.

១៦៧. សមិទ្ធិជាតកំ (២-២-៧)

៣៣. អភុត្វា ភិក្ខសិ ភិក្ខុ, ន ហិ ភុត្វាន ភិក្ខសិ;

ភុត្វាន ភិក្ខុ ភិក្ខស្សុ, មា តំ កាលោ ឧបច្ចគា.

៣៤. កាលំ វោហំ ន ជានាមិ, ឆន្នោ កាលោ ន ទិស្សតិ;

តស្មា អភុត្វា ភិក្ខាមិ, មា មំ កាលោ ឧបច្ចគាតិ.

សមិទ្ធិជាតកំ សត្តមំ.

១៦៨. សកុណគ្ឃិជាតកំ (២-២-៨)

៣៥. សេនោ ពលសា បតមានោ, លាបំ គោចរឋាយិនំ;

សហសា អជ្ឈប្បត្តោវ, មរណំ តេនុបាគមិ.

៣៦. សោហំ នយេន សម្បន្នោ, បេត្តិកេ គោចរេ រតោ;

អបេតសត្តុ មោទាមិ, សម្បស្សំ អត្ថមត្តនោតិ.

សកុណគ្ឃិជាតកំ អដ្ឋមំ.

១៦៩. អរកជាតកំ (២-២-៩)

៣៧. យោ វេ មេត្តេន ចិត្តេន, សព្ពលោកានុកម្បតិ;

ឧទ្ធំ អធោ ច តិរិយំ, អប្បមាណេន សព្ពសោ.

៣៨. អប្បមាណំ ហិតំ ចិត្តំ, បរិបុណ្ណំ សុភាវិតំ;

យំ បមាណកតំ កម្មំ, ន តំ តត្រាវសិស្សតីតិ.

អរកជាតកំ នវមំ.

១៧០. កកណ្ដកជាតកំ (២-២-១០)

៣៩. នាយំ បុរេ ឧណ្ណមតិ [ឧន្នមតិ (ស្យា.)], តោរណគ្គេ កកណ្ដកោ;

មហោសធ វិជានាហិ, កេន ថទ្ធោ កកណ្ដកោ.

៤០. អលទ្ធបុព្ពំ លទ្ធាន, អឌ្ឍមាសំ កកណ្ដកោ;

អតិមញ្ញតិ រាជានំ, វេទេហំ មិថិលគ្គហន្តិ.

កកណ្ដកជាតកំ ទសមំ.

សន្ថវវគ្គោ ទុតិយោ.

តស្សុទ្ទានំ –

អថ ឥន្ទសមាន សបណ្ណកុដិ, សុសិមុត្តម គិជ្ឈ ជលាពុជកោ;

ឧបសាឡក ភិក្ខុ សលាបវរោ, អថ មេត្តវរោ ទសបុណ្ណមតីតិ.

៣. កល្យាណវគ្គោ

១៧១. កល្យាណធម្មជាតកំ (២-៣-១)

៤១. កល្យាណធម្មោតិ យទា ជនិន្ទ, លោកេ សមញ្ញំ អនុបាបុណាតិ;

តស្មា ន ហិយ្យេថ [ហីយេថ (សី.)] នរោ សបញ្ញោ, ហិរិយាបិ សន្តោ ធុរមាទិយន្តិ.

៤២. សាយំ សមញ្ញា ឥធ មជ្ជ បត្តា, កល្យាណធម្មោតិ ជនិន្ទ លោកេ;

តាហំ សមេក្ខំ ឥធ បព្ពជិស្សំ, ន ហិ មត្ថិ ឆន្ទោ ឥធ កាមភោគេតិ.

កល្យាណធម្មជាតកំ បឋមំ.

១៧២. ទទ្ទរជាតកំ (២-៣-២)

៤៣. កោ នុ សទ្ទេន មហតា, អភិនាទេតិ ទទ្ទរំ;