៨. កាសាវវគ្គោ

២២១. កាសាវជាតកំ (២-៨-១)

១៤១. អនិក្កសាវោ កាសាវំ, យោ វត្ថំ បរិទហិស្សតិ [បរិទហេស្សតិ (សី. បី.)];

អបេតោ ទមសច្ចេន, ន សោ កាសាវមរហតិ.

១៤២. យោ ច វន្តកសាវស្ស, សីលេសុ សុសមាហិតោ;

ឧបេតោ ទមសច្ចេន, ស វេ កាសាវមរហតីតិ.

កាសាវជាតកំ បឋមំ.

២២២. ចូឡនន្ទិយជាតកំ (២-៨-២)

១៤៣. ឥទំ តទាចរិយវចោ, បារាសរិយោ យទព្រវិ [បោរាណាចរិយោព្រវិ (ក.)];

មាសុ ត្វំ អករិ [អករា (សី. បី.)] បាបំ, យំ ត្វំ បច្ឆា កតំ តបេ.

១៤៤. យានិ ករោតិ បុរិសោ, តានិ អត្តនិ បស្សតិ;

កល្យាណការី កល្យាណំ, បាបការី ច បាបកំ;

យាទិសំ វបតេ ពីជំ, តាទិសំ ហរតេ ផលន្តិ.

ចូឡនន្ទិយជាតកំ ទុតិយំ.

២២៣. បុដភត្តជាតកំ (២-៨-៣)

១៤៥. នមេ នមន្តស្ស ភជេ ភជន្តំ, កិច្ចានុកុព្ពស្ស ករេយ្យ កិច្ចំ;

នានត្ថកាមស្ស ករេយ្យ អត្ថំ, អសម្ភជន្តម្បិ ន សម្ភជេយ្យ.

១៤៦. ចជេ ចជន្តំ វនថំ ន កយិរា, អបេតចិត្តេន ន សម្ភជេយ្យ;

ទិជោ ទុមំ ខីណផលន្តិ ញត្វា, អញ្ញំ សមេក្ខេយ្យ មហា ហិ លោកោតិ.

បុដភត្តជាតកំ តតិយំ.

២២៤. កុម្ភិលជាតកំ (២-៨-៤)

១៤៧. យស្សេតេ ចតុរោ ធម្មា, វានរិន្ទ យថា តវ;

សច្ចំ ធម្មោ ធិតិ ចាគោ, ទិដ្ឋំ សោ អតិវត្តតិ.

១៤៨. យស្ស ចេតេ ន វិជ្ជន្តិ, គុណា បរមភទ្ទកា;

សច្ចំ ធម្មោ ធិតិ ចាគោ, ទិដ្ឋំ សោ នាតិវត្តតីតិ.

កុម្ភិលជាតកំ ចតុត្ថំ.

២២៥. ខន្តិវណ្ណជាតកំ (២-៨-៥)

១៤៩. អត្ថិ មេ បុរិសោ ទេវ, សព្ពកិច្ចេសុ ព្យាវដោ [វាវដោ (ក.)];

តស្ស ចេកោបរាធត្ថិ, តត្ថ ត្វំ កិន្តិ មញ្ញសិ.

១៥០. អម្ហាកម្បត្ថិ បុរិសោ, ឯទិសោ ឥធ វិជ្ជតិ;

ទុល្លភោ អង្គសម្បន្នោ, ខន្តិរស្មាក រុច្ចតីតិ.

ខន្តិវណ្ណជាតកំ បញ្ចមំ.

២២៦. កោសិយជាតកំ (២-៨-៦)

១៥១. កាលេ និក្ខមនា សាធុ, នាកាលេ សាធុ និក្ខមោ;

អកាលេន ហិ និក្ខម្ម, ឯកកម្បិ ពហុជ្ជនោ;

ន កិញ្ចិ អត្ថំ ជោតេតិ, ធង្កសេនាវ កោសិយំ.

១៥២. ធីរោ ច វិធិវិធានញ្ញូ, បរេសំ វិវរានុគូ;

សព្ពាមិត្តេ វសីកត្វា, កោសិយោវ សុខី សិយាតិ.

កោសិយជាតកំ ឆដ្ឋំ.

២២៧. គូថបាណជាតកំ (២-៨-៧)

១៥៣. សូរោ សូរេន សង្គម្ម, វិក្កន្តេន បហារិនា;

ឯហិ នាគ និវត្តស្សុ, កិំ នុ ភីតោ បលាយសិ;

បស្សន្តុ អង្គមគធា, មម តុយ្ហញ្ច វិក្កមំ.

១៥៤. ន តំ បាទា វធិស្សាមិ, ន ទន្តេហិ ន សោណ្ឌិយា;

មីឡ្ហេន តំ វធិស្សាមិ, បូតិ ហញ្ញតុ បូតិនាតិ.

គូថបាណជាតកំ សត្តមំ.

២២៨. កាមនីតជាតកំ (២-៨-៨)

១៥៥. តយោ គិរិំ អន្តរំ កាមយាមិ, បញ្ចាលា កុរុយោ កេកកេ ច [កុរយោ កេកយេ ច (សី.)];

តតុត្តរិំ [តទុត្តរិំ (ក.)] ព្រាហ្មណ កាមយាមិ, តិកិច្ឆ មំ ព្រាហ្មណ កាមនីតំ.

១៥៦. កណ្ហាហិទដ្ឋស្ស ករោន្តិ ហេកេ, អមនុស្សបវិដ្ឋស្ស [អមនុស្សវទ្ធស្ស (សី. បី.), អមនុស្សវិដ្ឋស្ស (ស្យា.)] ករោន្តិ បណ្ឌិតា;

ន កាមនីតស្ស ករោតិ កោចិ, ឱក្កន្តសុក្កស្ស ហិ កា តិកិច្ឆាតិ.

កាមនីតជាតកំ អដ្ឋមំ.

២២៩. បលាយិតជាតកំ (២-៨-៩)

១៥៧. គជគ្គមេឃេហិ ហយគ្គមាលិភិ, រថូមិជាតេហិ សរាភិវស្សេភិ [សរាភិវស្សភិ (ស្យា. សី. អដ្ឋ.), សរាភិវស្សិភិ (?)];

ថរុគ្គហាវដ្ដ [ធនុគ្គហាវដ្ដ (ក.)] ទឡ្ហប្បហារិភិ, បរិវារិតា តក្កសិលា សមន្តតោ.

១៥៨. [អភិធាវថា ច បតថា ច, វិវិធវិនទិតា ច ទន្តិភិ; វត្តតជ្ជ តុមុលោ ឃោសោ, យថា វិជ្ជុតា ជលធរស្ស គជ្ជតោតិ; (សី. បី. ក.)] អភិធាវថ ចូបធាវថ ច [អភិធាវថា ចុប្បតថា ច (ស្យា.)], វិវិធា វិនាទិតា [វិនាទិតត្ថ (ក.)] វទន្តិភិ;

វត្តតជ្ជ តុមុលោ ឃោសោ យថា, វិជ្ជុលតា ជលធរស្ស គជ្ជតោតិ [អភិធាវថា ច បតថា ច, វិវិធវិនទិតា ច ទន្តិភិ; វត្តតជ្ជ តុមុលោ ឃោសោ, យថា វិជ្ជុតា ជលធរស្ស គជ្ជតោតិ; (សី. បី. ក.)].

បលាយិតជាតកំ នវមំ.

២៣០. ទុតិយបលាយិតជាតកំ (២-៨-១០)

១៥៩. ធជមបរិមិតំ អនន្តបារំ, ទុប្បសហំធង្កេហិ សាគរំវ [សាគរមិវ (សី. ស្យា. បី.)];

គិរិមិវអនិលេន ទុប្បសយ្ហោ [ទុប្បសហោ (សី. បី. ក.)], ទុប្បសហោ អហមជ្ជតាទិសេន.

១៦០. មា ពាលិយំ វិលបិ [វិប្បលបិ (ពហូសុ)] ន ហិស្ស តាទិសំ, វិឌយ្ហសេ [វិឡយ្ហសេ (សី. បី.)] ន ហិ លភសេ និសេធកំ;

អាសជ្ជសិ គជមិវ ឯកចារិនំ, យោ តំ បទា នឡមិវ បោថយិស្សតីតិ.

ទុតិយបលាយិតជាតកំ ទសមំ.

កាសាវវគ្គោ អដ្ឋមោ.

តស្សុទ្ទានំ –

វរវត្ថវចោ ទុមខីណផលំ, ចតុរោធម្មវរំ បុរិសុត្តម;

ធង្កមគធា ច តយោគិរិនាម, គជគ្គវរោ ធជវរេន ទសាតិ.