៧. ពីរណថម្ភវគ្គោ

២១១. សោមទត្តជាតកំ (២-៧-១)

១២១. អកាសិ យោគ្គំ ធុវមប្បមត្តោ, សំវច្ឆរំ ពីរណថម្ភកស្មិំ;

ព្យាកាសិ សញ្ញំ បរិសំ វិគយ្ហ, ន និយ្យមោ តាយតិ អប្បបញ្ញំ.

១២២. ទ្វយំ យាចនកោ តាត, សោមទត្ត និគច្ឆតិ;

អលាភំ ធនលាភំ វា, ឯវំ ធម្មា ហិ យាចនាតិ.

សោមទត្តជាតកំ បឋមំ.

២១២. ឧច្ឆិដ្ឋភត្តជាតកំ (២-៧-២)

១២៣. អញ្ញោ ឧបរិមោ វណ្ណោ, អញ្ញោ វណ្ណោ ច ហេដ្ឋិមោ;

ព្រាហ្មណី ត្វេវ បុច្ឆាមិ, កិំ ហេដ្ឋា កិញ្ច ឧប្បរិ.

១២៤. អហំ នដោស្មិ ភទ្ទន្តេ, ភិក្ខកោស្មិ ឥធាគតោ;

អយញ្ហិ កោដ្ឋមោតិណ្ណោ, អយំ សោ យំ [ត្វំ (ក.)] គវេសសីតិ.

ឧច្ឆិដ្ឋភត្តជាតកំ ទុតិយំ.

២១៣. ភរុជាតកំ (២-៧-៣)

១២៥. ឥសីនមន្តរំ កត្វា, ភរុរាជាតិ [កុរុរាជាតិ (ក.)] មេ សុតំ;

ឧច្ឆិន្នោ សហ រដ្ឋេហិ [រដ្ឋេន (សី. បី.)], សរាជា វិភវង្គតោ.

១២៦. តស្មា ហិ ឆន្ទាគមនំ, នប្បសំសន្តិ បណ្ឌិតា;

អទុដ្ឋចិត្តោ ភាសេយ្យ, គិរំ សច្ចុបសំហិតន្តិ.

ភរុជាតកំ [កុរុរាតកំ (ក.)] តតិយំ.

២១៤. បុណ្ណនទីជាតកំ (២-៧-៤)

១២៧. បុណ្ណំ នទិំ យេន ច បេយ្យមាហុ, ជាតំ យវំ យេន ច គុយ្ហមាហុ;

ទូរំ គតំ យេន ច អវ្ហយន្តិ, សោ ត្យាគតោ [ត្យាភតោ (ស្យា. ក.) បហេឡិគាថាភាវោ មនសិ កាតព្ពោ] ហន្ទ ច ភុញ្ជ ព្រាហ្មណ.

១២៨. យតោ មំ សរតី រាជា, វាយសម្បិ បហេតវេ;

ហំសា កោញ្ចា មយូរា ច [ហំសកោញ្ចមយូរានំ (ក. អដ្ឋ. បាឋន្តរំ)], អសតីយេវ បាបិយាតិ.

បុណ្ណនទីជាតកំ ចតុត្ថំ.

២១៥. កច្ឆបជាតកំ (២-៧-៥)

១២៩. អវធី វត អត្តានំ, កច្ឆបោ ព្យាហរំ គិរំ [កច្ឆបោវ បព្យាហរំ (ស្យា.), កច្ឆបោ សោ បព្យាហរំ (ក.)];

សុគ្គហីតស្មិំ កដ្ឋស្មិំ, វាចាយ សកិយាវធិ.

១៣០. ឯតម្បិ ទិស្វា នរវីរិយសេដ្ឋ, វាចំ បមុញ្ចេ កុសលំ នាតិវេលំ;

បស្សសិ ពហុភាណេន, កច្ឆបំ ព្យសនំ គតន្តិ.

កច្ឆបជាតកំ បញ្ចមំ.

២១៦. មច្ឆជាតកំ (២-៧-៦)

១៣១. ន មាយមគ្គិ តបតិ, ន សូលោ សាធុតច្ឆិតោ;

យញ្ច មំ មញ្ញតេ មច្ឆី, អញ្ញំ សោ រតិយា គតោ.

១៣២. សោ មំ ទហតិ រាគគ្គិ, ចិត្តំ ចូបតបេតិ មំ;

ជាលិនោ មុញ្ចថាយិរា មំ, ន កាមេ ហញ្ញតេ ក្វចីតិ.

មច្ឆជាតកំ ឆដ្ឋំ.

២១៧. សេគ្គុជាតកំ (២-៧-៧)

១៣៣. សព្ពោ លោកោ អត្តមនោ អហោសិ, អកោវិទា គាមធម្មស្ស សេគ្គុ;

កោមារិ កោ នាម [កោមារិកា នាម (ក.), កោមារិកោ នាម (ស្យា. បី.)] តវជ្ជ ធម្មោ, យំ ត្វំ គហិតា បវនេ បរោទសិ.

១៣៤. យោ ទុក្ខផុដ្ឋាយ ភវេយ្យ តាណំ, សោ មេ បិតា ទុព្ភិ វនេ ករោតិ;

សា កស្ស កន្ទាមិ វនស្ស មជ្ឈេ, យោ តាយិតា សោ សហសំ ករោតីតិ.

សេគ្គុជាតកំ សត្តមំ.

២១៨. កូដវាណិជជាតកំ (២-៧-៨)

១៣៥. សឋស្ស សាឋេយ្យមិទំ សុចិន្តិតំ, បច្ចោឌ្ឌិតំ បដិកូដស្ស កូដំ;

ផាលញ្ចេ ខាទេយ្យុំ [អទេយ្យុំ (សី. បី.)] មូសិកា, កស្មា កុមារំ កុលលា ន [នោ (សី. ស្យា. បី.)] ហរេយ្យុំ.

១៣៦. កូដស្ស ហិ សន្តិ [សន្តីធ (ក.)] កូដកូដា, ភវតិ [ភវន្តិ (ក.)] ចាបិ និកតិនោ និកត្យា;

ទេហិ បុត្តនដ្ឋ ផាលនដ្ឋស្ស ផាលំ, មា តេ បុត្តមហាសិ ផាលនដ្ឋោតិ.

កូដវាណិជជាតកំ អដ្ឋមំ.

២១៩. គរហិតជាតកំ (២-៧-៩)

១៣៧. ហិរញ្ញំ មេ សុវណ្ណំ មេ, ឯសា រត្តិំ ទិវា កថា;

ទុម្មេធានំ មនុស្សានំ, អរិយធម្មំ អបស្សតំ.

១៣៨. ទ្វេ ទ្វេ គហបតយោ គេហេ, ឯកោ តត្ថ អមស្សុកោ;

លម្ពត្ថនោ វេណិកតោ, អថោ អង្កិតកណ្ណកោ;

កីតោ ធនេន ពហុនា, សោ តំ វិតុទតេ ជនន្តិ.

គរហិតជាតកំ នវមំ.

២២០. ធម្មធជជាតកំ (២-៧-១០)

១៣៩. សុខំ ជីវិតរូបោសិ, រដ្ឋា វិវនមាគតោ;

សោ ឯកកោ រុក្ខមូលេ [អរញ្ញស្មិំ (សី. ស្យា. បី.)], កបណោ វិយ ឈាយសិ.

១៤០. សុខំ ជីវិតរូបោស្មិ, រដ្ឋា វិវនមាគតោ;

សោ ឯកកោ រុក្ខមូលេ, កបណោ វិយ ឈាយាមិ;

សតំ ធម្មំ អនុស្សរំតិ.

ធម្មធជជាតកំ ទសមំ.

ពីរណថម្ភវគ្គោ សត្តមោ.

តស្សុទ្ទានំ –

អថ ពីរណថម្ភវរោ ច នដោ, ភរុរាជវរុត្តមបុណ្ណនទី;

ពហុភាណិ អគ្គិបវនេ មូសិកា, សហលម្ពត្ថនោ កបណេន ទសាតិ.