៦. នតំទឡ្ហវគ្គោ

២០១. ពន្ធនាគារជាតកំ (២-៦-១)

១០១. ន តំ ទឡ្ហំ ពន្ធនមាហុ ធីរា, យទាយសំ ទារុជបព្ពជញ្ច [ពព្ពជញ្ច (សី.)];

សារត្តរត្តា មណិកុណ្ឌលេសុ, បុត្តេសុ ទារេសុ ច យា អបេក្ខា.

១០២. ឯតំ ទឡ្ហំ ពន្ធនមាហុ ធីរា, ឱហារិនំ សិថិលំ ទុប្បមុញ្ចំ;

ឯតម្បិ ឆេត្វាន វជន្តិ ធីរា, អនបេក្ខិនោ កាមសុខំ បហាយាតិ.

ពន្ធនាគារជាតកំ បឋមំ.

២០២. កេឡិសីលជាតកំ (២-៦-២)

១០៣. ហំសា កោញ្ចា មយូរា ច, ហត្ថយោ [ហត្ថិនោ (សី.), ហត្ថិយោ (ស្យា. បី.)] បសទា មិគា;

សព្ពេ សីហស្ស ភាយន្តិ, នត្ថិ កាយស្មិ តុល្យតា.

១០៤. ឯវមេវ មនុស្សេសុ, ទហរោ ចេបិ បញ្ញវា;

សោ ហិ តត្ថ មហា ហោតិ, នេវ ពាលោ សរីរវាតិ.

កេឡិសីលជាតកំ ទុតិយំ.

២០៣. ខណ្ឌជាតកំ (២-៦-៣)

១០៥. វិរូបក្ខេហិ មេ មេត្តំ, មេត្តំ ឯរាបថេហិ មេ;

ឆព្យាបុត្តេហិ មេ មេត្តំ, មេត្តំ កណ្ហាគោតមកេហិ ច.

អបាទកេហិ មេ មេត្តំ, មេត្តំ ទ្វិបាទកេហិ មេ;

ចតុប្បទេហិ មេ មេត្តំ, មេត្តំ ពហុប្បទេហិ មេ.

មា មំ អបាទកោ ហិំសិ, មា មំ ហិំសិ ទ្វិបាទកោ;

មា មំ ចតុប្បទោ ហិំសិ, មា មំ ហិំសិ ពហុប្បទោ.

សព្ពេ សត្តា សព្ពេ បាណា, សព្ពេ ភូតា ច កេវលា;

សព្ពេ ភទ្រានិ បស្សន្តុ, មា កញ្ចិ [កិញ្ចិ (ស្យា. ក.)] បាបមាគមា.

១០៦. អប្បមាណោ ពុទ្ធោ, អប្បមាណោ ធម្មោ;

អប្បមាណោ សង្ឃោ, បមាណវន្តានិ សរីសបានិ [សិរិសបានិ (សី. ស្យា. បី.)];

អហិវិច្ឆិកសតបទី, ឧណ្ណនាភិ [ឧណ្ណានាភិ (សី. ស្យា. បី.)] សរពូមូសិកា.

កតា មេ រក្ខា កតា មេ បរិត្តា, បដិក្កមន្តុ ភូតានិ;

សោហំ នមោ ភគវតោ, នមោ សត្តន្នំ សម្មាសម្ពុទ្ធានន្តិ.

ខណ្ឌជាតកំ តតិយំ.

២០៤. វីរកជាតកំ (២-៦-៤)

១០៧. អបិ វីរក បស្សេសិ, សកុណំ មញ្ជុភាណកំ;

មយូរគីវសង្កាសំ, បតិំ មយ្ហំ សវិដ្ឋកំ.

១០៨. ឧទកថលចរស្ស បក្ខិនោ, និច្ចំ អាមកមច្ឆភោជិនោ;

តស្សានុករំ សវិដ្ឋកោ, សេវាលេ បលិគុណ្ឋិតោ មតោតិ.

វីរកជាតកំ ចតុត្ថំ.

២០៥. គង្គេយ្យជាតកំ (២-៦-៥)

១០៩. សោភតិ មច្ឆោ គង្គេយ្យោ, អថោ សោភតិ យាមុនោ [សោភន្តិ មច្ឆា គង្គេយ្យា, អថោ សោភន្តិ យាមុនា (ស្យា. បី.)];

ចតុប្បទោយំ បុរិសោ, និគ្រោធបរិមណ្ឌលោ;

ឦសកាយត [ឦសមាយត (ក.)] គីវោ ច, សព្ពេវ អតិរោចតិ.

១១០. យំ បុច្ឆិតោ ន តំ អក្ខាសិ [អក្ខា (សី. ស្យា. បី.)], អញ្ញំ អក្ខាសិ [អក្ខាតិ (ស្យា. បី.)] បុច្ឆិតោ;

អត្តប្បសំសកោ បោសោ, នាយំ អស្មាក រុច្ចតីតិ.

គង្គេយ្យជាតកំ បញ្ចមំ.

២០៦. កុរុង្គមិគជាតកំ (២-៦-៦)

១១១. ឥង្ឃ វទ្ធមយំ [វទ្ធមយំ (សី. ស្យា. បី.)] បាសំ, ឆិន្ទ ទន្តេហិ កច្ឆប;

អហំ តថា ករិស្សាមិ, យថា នេហិតិ លុទ្ទកោ.

១១២. កច្ឆបោ បាវិសី វារិំ, កុរុង្គោ បាវិសី វនំ;

សតបត្តោ ទុមគ្គម្ហា, ទូរេ បុត្តេ អបានយីតិ.

កុរុង្គមិគជាតកំ ឆដ្ឋំ.

២០៧. អស្សកជាតកំ (២-៦-៧)

១១៣. អយមស្សករាជេន, ទេសោ វិចរិតោ មយា;

អនុកាមយ កាមេន [អនុកាមយវនុកាមេន (សី. បី.)], បិយេន បតិនា សហ.

១១៤. នវេន សុខទុក្ខេន, បោរាណំ អបិធីយតិ [អបិថីយតិ (សី. បី.), អបិថិយ្យតិ (ស្យា.)];

តស្មា អស្សករញ្ញាវ, កីដោ បិយតរោ មមាតិ.

អស្សកជាតកំ សត្តមំ.

២០៨. សុសុមារជាតកំ (២-៦-៨)

១១៥. អលំ មេតេហិ អម្ពេហិ, ជម្ពូហិ បនសេហិ ច;

យានិ បារំ សមុទ្ទស្ស, វរំ មយ្ហំ ឧទុម្ពរោ.

១១៦. មហតី វត តេ ពោន្ទិ, ន ច បញ្ញា តទូបិកា;

សុសុមារ [សុំសុមារ (សី. ស្យា. បី.)] វញ្ចិតោ មេសិ, គច្ឆ ទានិ យថាសុខន្តិ.

សុសុមារជាតកំ អដ្ឋមំ.

២០៩. កុក្កុដជាតកំ (២-៦-៩)

១១៧. ទិដ្ឋា មយា វនេ រុក្ខា, អស្សកណ្ណា វិភីដកា [វិភេទកា (ស្យា. ក.)];

ន តានិ ឯវំ សក្កន្តិ, យថា ត្វំ រុក្ខ សក្កសិ.

១១៨. បុរាណកុក្កុដោ [កក្ករោ (សី. ស្យា. បី.)] អយំ, ភេត្វា បញ្ជរមាគតោ;

កុសលោ វាឡបាសានំ, អបក្កមតិ ភាសតីតិ.

កុក្កុដ [កក្ករ (សី. ស្យា. បី.)] ជាតកំ នវមំ.

២១០. កន្ទគលកជាតកំ (២-៦-១០)

១១៩. អម្ភោ កោ នាម យំ រុក្ខោ, សិន្នបត្តោ [សីនបត្តោ (សី. បី.)] សកណ្ដកោ;

យត្ថ ឯកប្បហារេន, ឧត្តមង្គំ វិភិជ្ជិតំ [វិសាដិកំ (សី. ស្យា. បី.), វិឃាដិតំ (សី. និយ្យ)].

១២០. អចារិ វតាយំ វិតុទំ វនានិ, កដ្ឋង្គរុក្ខេសុ អសារកេសុ;

អថាសទា ខទិរំ ជាតសារំ [ជាតិសារំ (ក.)], យត្ថព្ភិទា គរុឡោ ឧត្តមង្គន្តិ.

កន្ទគលក [កន្ទលក (ក.)] ជាតកំ ទសមំ.

នតំទឡ្ហវគ្គោ ឆដ្ឋោ.

តស្សុទ្ទានំ –

ទឡ្ហពន្ធន ហំសវរោ ច បុន, វិរូបក្ខ សវិដ្ឋក មច្ឆវរោ;

សកុរុង្គ សអស្សក អម្ពវរោ, បុន កុក្កុដកោ គរុឡេន ទសាតិ.