៥. រុហកវគ្គោ

១៩១. រុហកជាតកំ (២-៥-១)

៨១. អបិ [អម្ភោ (ស្យា. ក. សី.)] រុហក ឆិន្នាបិ, ជិយា សន្ធីយតេ បុន;

សន្ធីយស្សុ បុរាណិយា, មា កោធស្ស វសំ គមិ.

៨២. វិជ្ជមានេសុ វាកេសុ [វិជ្ជមានាសុ មរុវាសុ (សី.), វិជ្ជមានាសុ មរូទ្វាសុ (បី.)], វិជ្ជមានេសុ ការិសុ;

អញ្ញំ ជិយំ ករិស្សាមិ, អលញ្ញេវ បុរាណិយាតិ.

រុហកជាតកំ បឋមំ.

១៩២. សិរិកាឡកណ្ណិជាតកំ (២-៥-២)

៨៣. ឥត្ថី សិយា រូបវតី, សា ច សីលវតី សិយា;

បុរិសោ តំ ន ឥច្ឆេយ្យ, សទ្ទហាសិ មហោសធ.

៨៤. សទ្ទហាមិ មហារាជ, បុរិសោ ទុព្ភគោ សិយា;

សិរី ច កាឡកណ្ណី ច, ន សមេន្តិ កុទាចនន្តិ.

សិរិកាឡកណ្ណិជាតកំ ទុតិយំ.

១៩៣. ចូឡបទុមជាតកំ (២-៥-៣)

៨៥. អយមេវ សា អហមបិ [អហម្បិ (សី. ស្យា. បី.), អហស្មិ (ក.)] សោ អនញ្ញោ, អយមេវ សោ ហត្ថច្ឆិន្នោ អនញ្ញោ;

យមាហ ‘‘កោមារបតី មម’’ន្តិ, វជ្ឈិត្ថិយោ នត្ថិ ឥត្ថីសុ សច្ចំ.

៨៦. ឥមញ្ច ជម្មំ មុសលេន ហន្ត្វា, លុទ្ទំ ឆវំ បរទារូបសេវិំ;

ឥមិស្សា ច នំ បាបបតិព្ពតាយ, ជីវន្តិយា ឆិន្ទថ កណ្ណនាសន្តិ.

ចូឡបទុមជាតកំ តតិយំ.

១៩៤. មណិចោរជាតកំ (២-៥-៤)

៨៧. ន សន្តិ ទេវា បវសន្តិ នូន, ន ហិ នូន សន្តិ ឥធ លោកបាលា;

សហសា ករោន្តានមសញ្ញតានំ, ន ហិ នូន សន្តី បដិសេធិតារោ.

៨៨. អកាលេ វស្សតី តស្ស, កាលេ តស្ស ន វស្សតិ;

សគ្គា ច ចវតិ ឋានា, ននុ សោ តាវតា ហតោតិ.

មណិចោរជាតកំ ចតុត្ថំ.

១៩៥. បព្ពតូបត្ថរជាតកំ (២-៥-៥)

៨៩. បព្ពតូបត្ថរេ [បព្ពតបត្ថរេ (សី. ស្យា. បី.)] រម្មេ, ជាតា បោក្ខរណី សិវា;

តំ សិង្គាលោ អបាបាយិ [អបាបាសិ (សី. ស្យា. បី.)], ជានំ សីហេន រក្ខិតំ.

៩០. បិវន្តិ ចេ [បិវន្តិ វេ (សី.), បិវន្តិវ (បី.), បិវន្តេវ (?)] មហារាជ, សាបទានិ មហានទិំ;

ន តេន អនទី ហោតិ, ខមស្សុ យទិ តេ បិយាតិ.

បព្ពតូបត្ថរ [បព្ពតបត្ថរ (សី. ស្យា. បី.)] ជាតកំ បញ្ចមំ.

១៩៦. វលាហកស្សជាតកំ (២-៥-៦)

៩១. យេ ន កាហន្តិ ឱវាទំ, នរា ពុទ្ធេន ទេសិតំ;

ព្យសនំ តេ គមិស្សន្តិ, រក្ខសីហិវ វាណិជា.

៩២. យេ ច កាហន្តិ ឱវាទំ, នរា ពុទ្ធេន ទេសិតំ;

សោត្ថិំ បារំ គមិស្សន្តិ, វលាហេនេវ [វាលាហេនេវ (សី. បី.)] វាណិជាតិ.

វលាហកស្ស [វាលាហស្ស (សី. បី.)] ជាតកំ ឆដ្ឋំ.

១៩៧. មិត្តាមិត្តជាតកំ (២-៥-៧)

៩៣. ន នំ ឧម្ហយតេ ទិស្វា, ន ច នំ បដិនន្ទតិ;

ចក្ខូនិ ចស្ស ន ទទាតិ, បដិលោមញ្ច វត្តតិ.

៩៤. ឯតេ ភវន្តិ អាការា, អមិត្តស្មិំ បតិដ្ឋិតា;

យេហិ អមិត្តំ ជានេយ្យ, ទិស្វា សុត្វា ច បណ្ឌិតោតិ.

មិត្តាមិត្តជាតកំ សត្តមំ.

១៩៨. រាធជាតកំ (២-៥-៨)

៩៥. បវាសា អាគតោ តាត, ឥទានិ នចិរាគតោ;

កច្ចិន្នុ តាត តេ មាតា, ន អញ្ញមុបសេវតិ.

៩៦. ន ខោ បនេតំ សុភណំ, គិរំ សច្ចុបសំហិតំ;

សយេថ បោដ្ឋបាទោវ, មុម្មុរេ [មុម្មុរេ (ស្យា.), មំ បុរេ (ក.) មុម្មុរសទ្ទោ ថុសគ្គិម្ហិ កុក្កុឡេ ច វត្តតីតិ សក្កតាភិធានេសុ] ឧបកូថិតោតិ [ឧបកូសិតោតិ (សី. ស្យា. បី.), ឧបកូលិតោ (ក.)].

រាធជាតកំ អដ្ឋមំ.

១៩៩. គហបតិជាតកំ (២-៥-៩)

៩៧. ឧភយំ មេ ន ខមតិ, ឧភយំ មេ ន រុច្ចតិ;

យាចាយំ កោដ្ឋមោតិណ្ណា, នាទ្ទសំ ឥតិ ភាសតិ.

៩៨. តំ តំ គាមបតិ ព្រូមិ, កទរេ អប្បស្មិ ជីវិតេ;

ទ្វេ មាសេ សង្គរំ កត្វា [ការំ កត្វាន (សី. បី.), សំករំ កត្វា (ក.)], មំសំ ជរគ្គវំ កិសំ;

អប្បត្តកាលេ ចោទេសិ, តម្បិ មយ្ហំ ន រុច្ចតីតិ.

គហបតិជាតកំ នវមំ.

២០០. សាធុសីលជាតកំ (២-៥-១០)

៩៩. សរីរទព្យំ វុឌ្ឍព្យំ [វទ្ធព្យំ (សី. បី.)], សោជច្ចំ សាធុសីលិយំ;

ព្រាហ្មណំ តេវ បុច្ឆាម, កន្នុ តេសំ វនិម្ហសេ [វណិម្ហសេ (សី. បី.)].

១០០. អត្ថោ អត្ថិ សរីរស្មិំ, វុឌ្ឍព្យស្ស នមោ ករេ;

អត្ថោ អត្ថិ សុជាតស្មិំ, សីលំ អស្មាក រុច្ចតីតិ.

សាធុសីលជាតកំ ទសមំ.

រុហកវគ្គោ បញ្ចមោ.

តស្សុទ្ទានំ –

អបិរុហក រូបវតី មុសលោ, បវសន្តិ សបញ្ចមបោក្ខរណី;

អថ មុត្តិមវាណិជ ឧម្ហយតេ, ចិរអាគត កោដ្ឋ សរីរ ទសាតិ.