៤. អសទិសវគ្គោ

១៨១. អសទិសជាតកំ (២-៤-១)

៦១. ធនុគ្គហោ អសទិសោ, រាជបុត្តោ មហព្ពលោ;

ទូរេបាតី អក្ខណវេធី, មហាកាយប្បទាលនោ.

៦២. សព្ពាមិត្តេ រណំ កត្វា, ន ច កញ្ចិ វិហេឋយិ;

ភាតរំ សោត្ថិំ កត្វាន, សំយមំ អជ្ឈុបាគមីតិ.

អសទិសជាតកំ បឋមំ.

១៨២. សង្គាមាវចរជាតកំ (២-៤-២)

៦៣. សង្គាមាវចរោ សូរោ, ពលវា ឥតិ វិស្សុតោ;

កិំ នុ តោរណមាសជ្ជ, បដិក្កមសិ កុញ្ជរ.

៦៤. ឱមទ្ទ ខិប្បំ បលិឃំ, ឯសិកានិ ច អព្ពហ [ឧព្ពហ (ស្យា.), អព្ភុហ (ក.)];

តោរណានិ ច មទ្ទិត្វា, ខិប្បំ បវិស កុញ្ជរាតិ.

សង្គាមាវចរជាតកំ ទុតិយំ.

១៨៣. វាលោទកជាតកំ (២-៤-៣)

៦៥. វាលោទកំ អប្បរសំ និហីនំ, បិត្វា [បីត្វា (សី. បី.)] មទោ ជាយតិ គទ្រភានំ;

ឥមញ្ច បិត្វាន រសំ បណីតំ, មទោ ន សញ្ជាយតិ សិន្ធវានំ.

៦៦. អប្បំ បិវិត្វាន និហីនជច្ចោ, សោ មជ្ជតី តេន ជនិន្ទ បុដ្ឋោ [ផុដ្ឋោ (សី. ស្យា.), មុដ្ឋោ (ក.)];

ធោរយ្ហសីលី ច កុលម្ហិ ជាតោ, ន មជ្ជតី អគ្គរសំ បិវិត្វាតិ.

វាលោទកជាតកំ តតិយំ.

១៨៤. គិរិទត្តជាតកំ (២-៤-៤)

៦៧. ទូសិតោ គិរិទត្តេន [គិរិទន្តេន (បី.)], ហយោ សាមស្ស បណ្ឌវោ;

បោរាណំ បកតិំ ហិត្វា, តស្សេវានុវិធិយ្យតិ [នុវិធីយតិ (សី. បី.)].

៦៨. សចេ ច តនុជោ បោសោ, សិខរាការ [សិង្គារាការ (ស្យា.)] កប្បិតោ;

អាននេ នំ [តំ (សី. ស្យា. បី.)] គហេត្វាន, មណ្ឌលេ បរិវត្តយេ;

ខិប្បមេវ បហន្ត្វាន, តស្សេវានុវិធិយ្យតីតិ.

គិរិទត្តជាតកំ ចតុត្ថំ.

១៨៥. អនភិរតិជាតកំ (២-៤-៥)

៦៩. យថោទកេ អាវិលេ អប្បសន្នេ, ន បស្សតិ សិប្បិកសម្ពុកញ្ច;

សក្ខរំ វាលុកំ មច្ឆគុម្ពំ, ឯវំ អាវិលម្ហិ [អាវិលេ ហិ (សី.)] ចិត្តេ;

ន បស្សតិ អត្តទត្ថំ បរត្ថំ.

៧០. យថោទកេ អច្ឆេ វិប្បសន្នេ, សោ បស្សតិ សិប្បិកសម្ពុកញ្ច;

សក្ខរំ វាលុកំ មច្ឆគុម្ពំ, ឯវំ អនាវិលម្ហិ ចិត្តេ;

សោ បស្សតិ អត្តទត្ថំ បរត្ថន្តិ.

អនភិរតិជាតកំ បញ្ចមំ.

១៨៦. ទធិវាហនជាតកំ (២-៤-៦)

៧១. វណ្ណគន្ធរសូបេតោ, អម្ពោយំ អហុវា បុរេ;

តមេវ បូជំ លភមានោ, កេនម្ពោ កដុកប្ផលោ.

៧២. បុចិមន្ទបរិវារោ, អម្ពោ តេ ទធិវាហន;

មូលំ មូលេន សំសដ្ឋំ, សាខា សាខា [សាខំ (ស្យា. ក.)] និសេវរេ [និវីសរេ (ក.)];

អសាតសន្និវាសេន, តេនម្ពោ កដុកប្ផលោតិ.

ទធិវាហនជាតកំ ឆដ្ឋំ.

១៨៧. ចតុមដ្ឋជាតកំ (២-៤-៧)

៧៣. ឧច្ចេ វិដភិមារុយ្ហ, មន្តយវ្ហោ រហោគតា;

នីចេ ឱរុយ្ហ មន្តវ្ហោ, មិគរាជាបិ សោស្សតិ.

៧៤. យំ សុវណ្ណោ សុវណ្ណេន [យំ សុបណ្ណោ សុបណ្ណេន (សី. ស្យា. បី.)], ទេវោ ទេវេន មន្តយេ;

កិំ តេត្ថ ចតុមដ្ឋស្ស, ពិលំ បវិស ជម្ពុកាតិ.

ចតុមដ្ឋជាតកំ សត្តមំ.

១៨៨. សីហកោត្ថុជាតកំ (២-៤-៨)

៧៥. សីហង្គុលី សីហនខោ, សីហបាទបតិដ្ឋិតោ;

សោ សីហោ សីហសង្ឃម្ហិ, ឯកោ នទតិ អញ្ញថា.

៧៦. មា ត្វំ នទិ រាជបុត្ត, អប្បសទ្ទោ វនេ វស;

សរេន ខោ [មា (ក.)] តំ ជានេយ្យុំ, ន ហិ តេ បេត្តិកោ សរោតិ.

សីហកោត្ថុជាតកំ អដ្ឋមំ.

១៨៩. សីហចម្មជាតកំ (២-៤-៩)

៧៧. នេតំ សីហស្ស នទិតំ, ន ព្យគ្ឃស្ស ន [ព្យគ្ឃស្ស ន ច (ក.)] ទីបិនោ;

បារុតោ សីហចម្មេន, ជម្មោ នទតិ គទ្រភោ.

៧៨. ចិរម្បិ ខោ តំ ខាទេយ្យ, គទ្រភោ ហរិតំ យវំ;

បារុតោ សីហចម្មេន, រវមានោវ ទូសយីតិ.

សីហចម្មជាតកំ នវមំ.

១៩០. សីលានិសំសជាតកំ (២-៤-១០)

៧៩. បស្ស សទ្ធាយ សីលស្ស, ចាគស្ស ច អយំ ផលំ;

នាគោ នាវាយ វណ្ណេន, សទ្ធំ វហតុបាសកំ.

៨០. សព្ភិរេវ សមាសេថ, សព្ភិ កុព្ពេថ សន្ថវំ;

សតញ្ហិ សន្និវាសេន, សោត្ថិំ គច្ឆតិ ន្ហាបិតោតិ.

សីលានិសំសជាតកំ ទសមំ.

អសទិសវគ្គោ ចតុត្ថោ.

តស្សុទ្ទានំ –

ធនុគ្គហ កុញ្ជរ អប្បរសោ, គិរិទត្តមនាវិលចិត្តវរំ;

ទធិវាហន ជម្ពូក សីហនខោ, ហរិតយវ នាគវរេន ទសាតិ.