៣. កល្យាណវគ្គោ

១៧១. កល្យាណធម្មជាតកំ (២-៣-១)

៤១. កល្យាណធម្មោតិ យទា ជនិន្ទ, លោកេ សមញ្ញំ អនុបាបុណាតិ;

តស្មា ន ហិយ្យេថ [ហីយេថ (សី.)] នរោ សបញ្ញោ, ហិរិយាបិ សន្តោ ធុរមាទិយន្តិ.

៤២. សាយំ សមញ្ញា ឥធ មជ្ជ បត្តា, កល្យាណធម្មោតិ ជនិន្ទ លោកេ;

តាហំ សមេក្ខំ ឥធ បព្ពជិស្សំ, ន ហិ មត្ថិ ឆន្ទោ ឥធ កាមភោគេតិ.

កល្យាណធម្មជាតកំ បឋមំ.

១៧២. ទទ្ទរជាតកំ (២-៣-២)

៤៣. កោ នុ សទ្ទេន មហតា, អភិនាទេតិ ទទ្ទរំ;

តំ សីហា នប្បដិនទន្តិ [កិំ សីហា នប្បដិនទន្តិ (សី. បី.), ន សីហា បដិនទន្តិ (ក.)], កោ នាមេសោ មិគាធិភូ.

៤៤. អធមោ មិគជាតានំ, សិង្គាលោ តាត វស្សតិ;

ជាតិមស្ស ជិគុច្ឆន្តា, តុណ្ហី សីហា សមច្ឆរេតិ.

ទទ្ទរជាតកំ ទុតិយំ.

១៧៣. មក្កដជាតកំ (២-៣-៣)

៤៥. តាត មាណវកោ ឯសោ, តាលមូលំ អបស្សិតោ;

អគារកញ្ចិទំ អត្ថិ, ហន្ទ ទេមស្សគារកំ.

៤៦. មា ខោ ត្វំ តាត បក្កោសិ, ទូសេយ្យ នោ អគារកំ;

នេតាទិសំ មុខំ ហោតិ, ព្រាហ្មណស្ស សុសីលិនោតិ.

មក្កដជាតកំ តតិយំ.

១៧៤. ទុព្ភិយមក្កដជាតកំ (២-៣-៤)

៤៧. អទម្ហ តេ វារិ បហូតរូបំ, ឃម្មាភិតត្តស្ស បិបាសិតស្ស;

សោ ទានិ បិត្វាន [បីត្វាន (សី. បី.)] កិរិង្ករោសិ [កិកិំករោសិ (សី. ស្យា. បី.)], អសង្គមោ បាបជនេន សេយ្យោ.

៤៨. កោ តេ សុតោ វា ទិដ្ឋោ វា, សីលវា នាម មក្កដោ;

ឥទានិ ខោ តំ ឱហច្ឆំ [ឩហច្ច (សី. បី.), ឱហច្ចំ (ស្យា.), ឧហជ្ជំ (ក.)], ឯសា អស្មាក ធម្មតាតិ.

ទុព្ភិយមក្កដជាតកំ ចតុត្ថំ.

១៧៥. អាទិច្ចុបដ្ឋានជាតកំ (២-៣-៥)

៤៩. សព្ពេសុ កិរ ភូតេសុ, សន្តិ សីលសមាហិតា;

បស្ស សាខាមិគំ ជម្មំ, អាទិច្ចមុបតិដ្ឋតិ.

៥០. នាស្ស សីលំ វិជានាថ, អនញ្ញាយ បសំសថ;

អគ្គិហុត្តញ្ច ឧហន្នំ [ឩហន្តំ (សី.), ឩហនំ (ស្យា.), ឩហន្តិ (បី.), ឧហទំ (ក.)], ទ្វេ ច ភិន្នា កមណ្ឌលូតិ.

អាទិច្ចុបដ្ឋានជាតកំ បញ្ចមំ.

១៧៦. កឡាយមុដ្ឋិជាតកំ (២-៣-៦)

៥១. ពាលោ វតាយំ ទុមសាខគោចរោ, បញ្ញា ជនិន្ទ នយិមស្ស វិជ្ជតិ;

កឡាយមុដ្ឋិំ [កលាយមុដ្ឋិំ (សី. បី.)] អវកិរិយ កេវលំ, ឯកំ កឡាយំ បតិតំ គវេសតិ.

៥២. ឯវមេវ មយំ រាជ, យេ ចញ្ញេ អតិលោភិនោ;

អប្បេន ពហុំ ជិយ្យាម, កឡាយេនេវ វានរោតិ.

កឡាយមុដ្ឋិជាតកំ ឆដ្ឋំ.

១៧៧. តិន្ទុកជាតកំ (២-៣-៧)

៥៣. ធនុហត្ថកលាបេហិ, នេត្តិំ សវរធារិភិ;

សមន្តា បរិកិណ្ណម្ហ, កថំ មោក្ខោ ភវិស្សតិ.

៥៤. អប្បេវ ពហុកិច្ចានំ, អត្ថោ ជាយេថ កោចិ នំ;

អត្ថិ រុក្ខស្ស អច្ឆិន្នំ, ខជ្ជថញ្ញេវ តិន្ទុកន្តិ.

តិន្ទុកជាតកំ សត្តមំ.

១៧៨. កច្ឆបជាតកំ (២-៣-៨)

៥៥. ជនិត្តំ មេ ភវិត្តំ មេ, ឥតិ បង្កេ អវស្សយិំ;

តំ មំ បង្កោ អជ្ឈភវិ, យថា ទុព្ពលកំ តថា;

តំ តំ វទាមិ ភគ្គវ, សុណោហិ វចនំ មម.

៥៦. គាមេ វា យទិ វា រញ្ញេ, សុខំ យត្រាធិគច្ឆតិ;

តំ ជនិត្តំ ភវិត្តញ្ច, បុរិសស្ស បជានតោ;

យម្ហិ ជីវេ តម្ហិ គច្ឆេ, ន និកេតហតោ សិយាតិ.

កច្ឆបជាតកំ អដ្ឋមំ.

១៧៩. សតធម្មជាតកំ (២-៣-៩)

៥៧. តញ្ច អប្បញ្ច ឧច្ឆិដ្ឋំ, តញ្ច កិច្ឆេន នោ អទា;

សោហំ ព្រាហ្មណជាតិកោ, យំ ភុត្តំ តម្បិ ឧគ្គតំ.

៥៨. ឯវំ ធម្មំ និរំកត្វា [និរាកត្វា (?) និ + អា + ករ + ត្វា], យោ អធម្មេន ជីវតិ;

សតធម្មោវ លាភេន, លទ្ធេនបិ ន នន្ទតីតិ.

សតធម្មជាតកំ នវមំ.

១៨០. ទុទ្ទទជាតកំ (២-៣-១០)

៥៩. ទុទ្ទទំ ទទមានានំ, ទុក្ករំ កម្ម កុព្ពតំ;

អសន្តោ នានុកុព្ពន្តិ, សតំ ធម្មោ ទុរន្នយោ.

៦០. តស្មា សតញ្ច អសតំ, នានា ហោតិ ឥតោ គតិ;

អសន្តោ និរយំ យន្តិ, សន្តោ សគ្គបរាយណាតិ [បរាយនា (ស្យា. ក.)].

ទុទ្ទទជាតកំ ទសមំ.

កល្យាណវគ្គោ តតិយោ.

តស្សុទ្ទានំ –

សុសមញ្ញមិគាធិភូ មាណវកោ, វារិបហូតរូបាទិច្ចុបដ្ឋានា;

សកឡាយសតិន្ទុកបង្ក បុន, សតធម្ម សុទុទ្ទទកេន ទសាតិ.