២. សន្ថវវគ្គោ

១៦១. ឥន្ទសមានគោត្តជាតកំ (២-២-១)

២១. ន សន្ថវំ [សន្ធវំ (ក.)] កាបុរិសេន កយិរា, អរិយោ អនរិយេន បជានមត្ថំ;

ចិរានុវុត្ថោបិ ករោតិ បាបំ, គជោ យថា ឥន្ទសមានគោត្តំ.

២២. យំ ត្វេវ ជញ្ញា សទិសោ មមន្តិ, សីលេន បញ្ញាយ សុតេន ចាបិ;

តេនេវ មេត្តិំ កយិរាថ សទ្ធិំ, សុខោ ហវេ សប្បុរិសេន សង្គមោតិ.

ឥន្ទសមានគោត្តជាតកំ បឋមំ.

១៦២. សន្ថវជាតកំ (២-២-២)

២៣. ន សន្ថវស្មា បរមត្ថិ បាបិយោ, យោ សន្ថវោ [សន្ធវោ (ក.)] កាបុរិសេន ហោតិ;

សន្តប្បិតោ សប្បិនា បាយសេន [បាយាសេន (ក.)], កិច្ឆាកតំ បណ្ណកុដិំ អទយ្ហិ [អទឌ្ឍហិ (សី. ស្យា.), អទដ្ឋហិ (បី.), អទទ្ទហិ (?)].

២៤. ន សន្ថវស្មា បរមត្ថិ សេយ្យោ, យោ សន្ថវោ សប្បុរិសេន ហោតិ;

សីហស្ស ព្យគ្ឃស្ស ច ទីបិនោ ច, សាមា មុខំ លេហតិ សន្ថវេនាតិ.

សន្ថវជាតកំ ទុតិយំ.

១៦៣. សុសីមជាតកំ (២-២-៣)

២៥. កាឡា មិគា សេតទន្តា តវីមេ [តវ ឥមេ (សី. ស្យា. បី.)], បរោសតំ ហេមជាលាភិឆន្នា [ហេមជាលាភិសញ្ឆន្នា (សី.)];

តេ តេ ទទាមីតិ សុសីម ព្រូសិ, អនុស្សរំ បេត្តិបិតាមហានំ.

២៦. កាឡា មិគា សេតទន្តា មមីមេ [មម ឥមេ (សី. បី.)], បរោសតំ ហេមជាលាភិច្ឆន្នា;

តេ តេ ទទាមីតិ វទាមិ មាណវ, អនុស្សរំ បេត្តិបិតាមហានន្តិ.

សុសីមជាតកំ តតិយំ.

១៦៤. គិជ្ឈជាតកំ (២-២-៤)

២៧. យំ នុ គិជ្ឈោ យោជនសតំ, កុណបានិ អវេក្ខតិ;

កស្មា ជាលញ្ច បាសញ្ច, អាសជ្ជាបិ ន ពុជ្ឈសិ.

២៨. យទា បរាភវោ ហោតិ, បោសោ ជីវិតសង្ខយេ;

អថ ជាលញ្ច បាសញ្ច, អាសជ្ជាបិ ន ពុជ្ឈតីតិ.

គិជ្ឈជាតកំ ចតុត្ថំ.

១៦៥. នកុលជាតកំ (២-២-៥)

២៩. សន្ធិំ កត្វា អមិត្តេន, អណ្ឌជេន ជលាពុជ;

វិវរិយ ទាឋំ សេសិ [សយសិ (សី. ស្យា. បី.)], កុតោ តេ ភយមាគតំ.

៣០. សង្កេថេវ [សង្កតេវ (ក.)] អមិត្តស្មិំ, មិត្តស្មិម្បិ ន វិស្សសេ;

អភយា ភយមុប្បន្នំ, អបិ មូលានិ កន្តតីតិ [មូលំ និកន្តតីតិ (សី.)].

នកុលជាតកំ បញ្ចមំ.

១៦៦. ឧបសាឡកជាតកំ (២-២-៦)

៣១. ឧបសាឡកនាមានិ [ឧបសាឡ្ហកនាមានំ (សី. ស្យា. បី.)], សហស្សានិ ចតុទ្ទស;

អស្មិំ បទេសេ ទឌ្ឍានិ, នត្ថិ លោកេ អនាមតំ.

៣២. យម្ហិ សច្ចញ្ច ធម្មោ ច, អហិំសា សំយមោ ទមោ;

ឯតំ អរិយា សេវន្តិ, ឯតំ លោកេ អនាមតន្តិ.

ឧបសាឡកជាតកំ ឆដ្ឋំ.

១៦៧. សមិទ្ធិជាតកំ (២-២-៧)

៣៣. អភុត្វា ភិក្ខសិ ភិក្ខុ, ន ហិ ភុត្វាន ភិក្ខសិ;

ភុត្វាន ភិក្ខុ ភិក្ខស្សុ, មា តំ កាលោ ឧបច្ចគា.

៣៤. កាលំ វោហំ ន ជានាមិ, ឆន្នោ កាលោ ន ទិស្សតិ;

តស្មា អភុត្វា ភិក្ខាមិ, មា មំ កាលោ ឧបច្ចគាតិ.

សមិទ្ធិជាតកំ សត្តមំ.

១៦៨. សកុណគ្ឃិជាតកំ (២-២-៨)

៣៥. សេនោ ពលសា បតមានោ, លាបំ គោចរឋាយិនំ;

សហសា អជ្ឈប្បត្តោវ, មរណំ តេនុបាគមិ.

៣៦. សោហំ នយេន សម្បន្នោ, បេត្តិកេ គោចរេ រតោ;

អបេតសត្តុ មោទាមិ, សម្បស្សំ អត្ថមត្តនោតិ.

សកុណគ្ឃិជាតកំ អដ្ឋមំ.

១៦៩. អរកជាតកំ (២-២-៩)

៣៧. យោ វេ មេត្តេន ចិត្តេន, សព្ពលោកានុកម្បតិ;

ឧទ្ធំ អធោ ច តិរិយំ, អប្បមាណេន សព្ពសោ.

៣៨. អប្បមាណំ ហិតំ ចិត្តំ, បរិបុណ្ណំ សុភាវិតំ;

យំ បមាណកតំ កម្មំ, ន តំ តត្រាវសិស្សតីតិ.

អរកជាតកំ នវមំ.

១៧០. កកណ្ដកជាតកំ (២-២-១០)

៣៩. នាយំ បុរេ ឧណ្ណមតិ [ឧន្នមតិ (ស្យា.)], តោរណគ្គេ កកណ្ដកោ;

មហោសធ វិជានាហិ, កេន ថទ្ធោ កកណ្ដកោ.

៤០. អលទ្ធបុព្ពំ លទ្ធាន, អឌ្ឍមាសំ កកណ្ដកោ;

អតិមញ្ញតិ រាជានំ, វេទេហំ មិថិលគ្គហន្តិ.

កកណ្ដកជាតកំ ទសមំ.

សន្ថវវគ្គោ ទុតិយោ.

តស្សុទ្ទានំ –

អថ ឥន្ទសមាន សបណ្ណកុដិ, សុសិមុត្តម គិជ្ឈ ជលាពុជកោ;

ឧបសាឡក ភិក្ខុ សលាបវរោ, អថ មេត្តវរោ ទសបុណ្ណមតីតិ.