៥២៣. អលម្ពុសាជាតកំ (៣)

៩៥. ‘‘អថ ព្រវិ ព្រហា ឥន្ទោ, វត្រភូ ជយតំ បិតា;

ទេវកញ្ញំ បរាភេត្វា, សុធម្មាយំ អលម្ពុសំ.

៩៦. ‘‘មិស្សេ ទេវា តំ យាចន្តិ, តាវតិំសា សឥន្ទកា;

ឥសិប្បលោភនេ [ឥសិបលោភិកេ (សី. ស្យា.), ឥសិំ បលោភិកេ (បី.)] គច្ឆ, ឥសិសិង្គំ អលម្ពុសេ.

៩៧. ‘‘បុរាយំ អម្ហេ អច្ចេតិ [នាច្ចេតិ (ស្យា. ក.)], វត្តវា [វតវា (សី. ស្យា. បី.)] ព្រហ្មចរិយវា;

និព្ពានាភិរតោ វុទ្ធោ [វទ្ធោ (បី.), ពុទ្ធោ (ស្យា. ក.)], តស្ស មគ្គានិ អាវរ’’.

៩៨. ‘‘ទេវរាជ កិមេវ ត្វំ, មមេវ តុវំ សិក្ខសិ;

ឥសិប្បលោភនេ [ឥសិបលោភិកេ (សី. ស្យា.), ឥសិំ បលោភិកេ (បី.)] គច្ឆ, សន្តិ អញ្ញាបិ អច្ឆរា.

៩៩. ‘‘មាទិសិយោ បវរា ចេវ, អសោកេ នន្ទនេ វនេ;

តាសម្បិ ហោតុ បរិយាយោ, តាបិ យន្តុ បលោភនា’’ [បលោភិកា (ស្យា. បី.)].

១០០. ‘‘អទ្ធា ហិ សច្ចំ ភណសិ, សន្តិ អញ្ញាបិ អច្ឆរា;

តាទិសិយោ បវរា ចេវ, អសោកេ នន្ទនេ វនេ.

១០១. ‘‘ន តា ឯវំ បជានន្តិ, បារិចរិយំ បុមំ គតា;

យាទិសំ ត្វំ បជានាសិ, នារិ សព្ពង្គសោភនេ.

១០២. ‘‘ត្វមេវ គច្ឆ កល្យាណិ, ឥត្ថីនំ បវរា ចសិ;

តវេវ វណ្ណរូបេន, សវសមានយិស្សសិ’’ [វសមានាបយិស្សសិ (ស្យា.), វសមានាមយិស្សសិ (បី.), តំ វសមានយិស្សសិ (ក.)].

១០៣. ‘‘ន វាហំ ន គមិស្សាមិ, ទេវរាជេន បេសិតា;

វិភេមិ ចេតំ អាសាទុំ, ឧគ្គតេជោ ហិ ព្រាហ្មណោ.

១០៤. ‘‘អនេកេ និរយំ បត្តា, ឥសិមាសាទិយា ជនា;

អាបន្នា មោហសំសារំ, តស្មា លោមានិ ហំសយេ’’.

១០៥. ‘‘ឥទំ វត្វាន បក្កាមិ, អច្ឆរា កាមវណ្ណិនី;

មិស្សា មិស្សិតុ [មិស្សេតុ (សី. ស្យា. បី.)] មិច្ឆន្តី, ឥសិសិង្គំ អលម្ពុសា.

១០៦. ‘‘សា ច តំ វនមោគយ្ហ, ឥសិសិង្គេន រក្ខិតំ;

ពិម្ពជាលកសញ្ឆន្នំ, សមន្តា អឌ្ឍយោជនំ.

១០៧. ‘‘បាតោវ បាតរាសម្ហិ, ឧទណ្ហសមយំ [ឧទយសមយំ (ស្យា.), ឧទន្តសមយំ (ក.)] បតិ;

អគ្គិដ្ឋំ បរិមជ្ជន្តំ, ឥសិសិង្គំ ឧបាគមិ’’.

១០៨. ‘‘កា នុ វិជ្ជុរិវាភាសិ, ឱសធី វិយ តារកា;

វិចិត្តហត្ថាភរណា [វិចិត្តវត្ថាភរណា (សី.)], អាមុត្តមណិកុណ្ឌលា [អាមុក្កមណិកុណ្ឌលា (?)].

១០៩. ‘‘អាទិច្ចវណ្ណសង្កាសា, ហេមចន្ទនគន្ធិនី;

សញ្ញតូរូ មហាមាយា, កុមារី ចារុទស្សនា.

១១០. ‘‘វិលគ្គា [វិលាកា (សី. ស្យា. បី.)] មុទុកា សុទ្ធា, បាទា តេ សុប្បតិដ្ឋិតា;

គមនា កាមនីយា [កមនា កមនីយា (សី. បី.)] តេ, ហរន្តិយេវ មេ មនោ.

១១១. ‘‘អនុបុព្ពាវ តេ ឩរូ, នាគនាសសមូបមា;

វិមដ្ឋា តុយ្ហំ សុស្សោណី, អក្ខស្ស ផលកំ យថា.

១១២. ‘‘ឧប្បលស្សេវ កិញ្ជក្ខា, នាភិ តេ សាធុ សណ្ឋិតា;

បូរា កណ្ហញ្ជនស្សេវ, ទូរតោ បដិទិស្សតិ.

១១៣. ‘‘ទុវិធា ជាតា ឧរជា, អវណ្ដា សាធុ បច្ចុទា;

បយោធរា អបតិតា [អប្បតីតា (សី. ស្យា. បី.)], អឌ្ឍលាពុសមា ថនា.

១១៤. ‘‘ទីឃា កម្ពុតលាភាសា, គីវា ឯណេយ្យកា យថា;

បណ្ឌរាវរណា វគ្គុ, ចតុត្ថមនសន្និភា.

១១៥. ‘‘ឧទ្ធគ្គា ច អធគ្គា ច, ទុមគ្គបរិមជ្ជិតា;

ទុវិជា នេលសម្ភូតា, ទន្តា តវ សុទស្សនា.

១១៦. ‘‘អបណ្ឌរា លោហិតន្តា, ជិញ្ជូក [ជិញ្ជុក (សី. ស្យា. បី.)] ផលសន្និភា;

អាយតា ច វិសាលា ច, នេត្តា តវ សុទស្សនា.

១១៧. ‘‘នាតិទីឃា សុសម្មដ្ឋា, កនកព្យា [កនកគ្គា (បី.)] សមោចិតា;

ឧត្តមង្គរុហា តុយ្ហំ, កេសា ចន្ទនគន្ធិកា.

១១៨. ‘‘យាវតា កសិគោរក្ខា, វាណិជានំ [វណិជានំ (បី.)] ច យា គតិ;

ឥសីនញ្ច បរក្កន្តំ, សញ្ញតានំ តបស្សិនំ.

១១៩. ‘‘ន តេ សមសមំ បស្សេ, អស្មិំ បថវិ [បុថុវិ (បី.)] មណ្ឌលេ;

កោ វា ត្វំ កស្ស វា បុត្តោ, កថំ ជានេមុ តំ មយំ’’.

១២០. ‘‘ន បញ្ហកាលោ ភទ្ទន្តេ, កស្សបេវំ គតេ សតិ;

ឯហិ សម្ម រមិស្សាម, ឧភោ អស្មាកមស្សមេ;

ឯហិ តំ ឧបគូហិស្សំ [ឧបគុយ្ហិស្សំ (ស្យា.)], រតីនំ កុសលោ ភវ’’.

១២១. ‘‘ឥទំ វត្វាន បក្កាមិ, អច្ឆរា កាមវណ្ណិនី;

មិស្សា មិស្សិតុមិច្ឆន្តី, ឥសិសិង្គំ អលម្ពុសា’’.

១២២. ‘‘សោ ច វេគេន និក្ខម្ម, ឆេត្វា ទន្ធបរក្កមំ [ទន្ធបទក្កមំ (ក.)];

តមុត្តមាសុ វេណីសុ, អជ្ឈប្បត្តោ [អជ្ឈាបត្តោ (បី.)] បរាមសិ;

១២៣. ‘‘តមុទាវត្ត កល្យាណី, បលិស្សជិ សុសោភនា [សុសោភណី (ស្យា. ក.)];

ចវិតម្ហិ [ចវិ តម្ហា (ស្យា. ក.)] ព្រហ្មចរិយា, យថា តំ អថ តោសិតា.

១២៤. ‘‘មនសា អគមា ឥន្ទំ, វសន្តំ នន្ទនេ វនេ;

តស្សា សង្កប្បមញ្ញាយ, មឃវា ទេវកុញ្ជរោ.

១២៥. ‘‘បល្លង្កំ បហិណី ខិប្បំ, សោវណ្ណំ សោបវាហនំ;

សឧត្តរច្ឆទបញ្ញាសំ, សហស្សបដិយត្ថតំ [បដិកត្ថតំ (សី.)].

១២៦. ‘‘តមេនំ តត្ថ ធារេសិ, ឧរេ កត្វាន សោភនា;

យថា ឯកមុហុត្តំវ, តីណិ វស្សានិ ធារយិ.

១២៧. ‘‘វិមទោ តីហិ វស្សេហិ, បពុជ្ឈិត្វាន ព្រាហ្មណោ;

អទ្ទសាសិ ហរិត [ហរី (បី.)] រុក្ខេ, សមន្តា អគ្គិយាយនំ.

១២៨. ‘‘នវបត្តវនំ ផុល្លំ, កោកិលគ្គណឃោសិតំ;

សមន្តា បវិលោកេត្វា, រុទំ អស្សូនិ វត្តយិ.

១២៩. ‘‘ន ជុហេ ន ជបេ [ជប្បេ (ក.)] មន្តេ, អគ្គិហុត្តំ បហាបិតំ;

កោ នុ មេ បារិចរិយាយ, បុព្ពេ ចិត្តំ បលោភយិ.

១៣០. ‘‘អរញ្ញេ មេ វិហរតោ, យោ មេ តេជា ហ សម្ភុតំ [សម្ភតំ (បី.)];

នានារត្នបរិបូរំ, នាវំវ គណ្ហិ អណ្ណវេ’’.

១៣១. ‘‘អហំ តេ បារិចរិយាយ, ទេវរាជេន បេសិតា;

អវធិំ [អវធី (ស្យា. បី. ក.)] ចិត្តំ ចិត្តេន, បមាទោ [បមាទា (ស្យា. បី.)] ត្វំ ន ពុជ្ឈសិ’’.

១៣២. ‘‘ឥមានិ កិរ មំ តាតោ, កស្សបោ អនុសាសតិ;

កមលាសទិសិត្ថិយោ [សរិសិត្ថិយោ (ស្យា. បី.)], តាយោ ពុជ្ឈេសិ មាណវ.

១៣៣. ‘‘ឧរេ គណ្ឌាយោ ពុជ្ឈេសិ, តាយោ ពុជ្ឈេសិ មាណវ;

ឥច្ចានុសាសិ មំ តាតោ, យថា មំ អនុកម្បកោ.

១៣៤. ‘‘តស្សាហំ វចនំ នាកំ, បិតុ វុទ្ធស្ស សាសនំ;

អរញ្ញេ និម្មនុស្សម្ហិ, ស្វជ្ជ ឈាយាមិ [ស្វាជ្ជជ្ឈាយាមិ (សី. បី.)] ឯកកោ.

១៣៥. ‘‘សោហំ តថា ករិស្សាមិ, ធិរត្ថុ ជីវិតេន មេ;

បុន វា តាទិសោ ហេស្សំ, មរណំ មេ ភវិស្សតិ’’.

១៣៦. ‘‘តស្ស តេជំ [តេជញ្ច (សី. បី.)] វីរិយញ្ច, ធិតិំ [ធិតិញ្ច (បី.)] ញត្វា អវដ្ឋិតំ [សុវឌ្ឍិតំ (សី.)];

សិរសា អគ្គហី បាទេ, ឥសិសិង្គំ អលម្ពុសា.

១៣៧. ‘‘មា មេ កុជ្ឈ [កុជ្ឈិ (បី.)] មហាវីរ, មា មេ កុជ្ឈ [កុជ្ឈិ (បី.)] មហាឥសេ;

មហា អត្ថោ មយា ចិណ្ណោ, តិទសានំ យសស្សិនំ;

តយា សំកម្បិតំ អាសិ, សព្ពំ ទេវបុរំ តទា’’.

១៣៨. ‘‘តាវតិំសា ច យេ ទេវា, តិទសានញ្ច វាសវោ;

ត្វញ្ច ភទ្ទេ សុខី ហោហិ, គច្ឆ កញ្ញេ យថាសុខំ’’.

១៣៩. ‘‘តស្ស បាទេ គហេត្វាន, កត្វា ច នំ បទក្ខិណំ;

អញ្ជលិំ បគ្គហេត្វាន, តម្ហា ឋានា អបក្កមិ.

១៤០. ‘‘យោ ច តស្សាសិ បល្លង្កោ, សោវណ្ណោ សោបវាហនោ;

សឧត្តរច្ឆទបញ្ញាសោ, សហស្សបដិយត្ថតោ;

តមេវ បល្លង្កមារុយ្ហ, អគា ទេវាន សន្តិកេ.

១៤១. ‘‘តមោក្កមិវ អាយន្តិំ, ជលន្តិំ វិជ្ជុតំ យថា;

បតីតោ សុមនោ វិត្តោ, ទេវិន្ទោ អទទា វរំ’’.

១៤២. ‘‘វរញ្ចេ មេ អទោ សក្ក, សព្ពភូតានមិស្សរ;

និសិប្បលោភិកា [ន ឥសិបលោភិកា (ស្យា.), ន ឥសិបលោភិយំ (បី.)] គច្ឆេ, ឯតំ សក្ក វរំ វរេ’’តិ.

អលម្ពុសាជាតកំ តតិយំ.