៥២០. គន្ធតិន្ទុកជាតកំ (១០)

៣៣២. អប្បមាទោ អមតំ បទំ [អមតបទំ (សី. បី.)], បមាទោ មច្ចុនោ បទំ;

អប្បមត្តា ន មីយន្តិ, យេ បមត្តា យថា មតា.

៣៣៣. មទា បមាទោ ជាយេថ, បមាទា ជាយតេ ខយោ;

ខយា បទោសា [ខយា ច ទោសា (សី.)] ជាយន្តិ, មា បមាទោ [មា មទោ (សី. ស្យា. បី.)] ភរតូសភ [ភារធូសភ (ក.)].

៣៣៤. ពហូ ហិ ខត្តិយា ជីនា, អត្ថំ រដ្ឋំ បមាទិនោ;

អថោបិ គាមិនោ គាមា, អនគារា អគារិនោ.

៣៣៥. ខត្តិយស្ស បមត្តស្ស, រដ្ឋស្មិំ រដ្ឋវឌ្ឍន;

សព្ពេ ភោគា វិនស្សន្តិ, រញ្ញោ តំ វុច្ចតេ អឃំ.

៣៣៦. នេស ធម្មោ មហារាជ, អតិវេលំ បមជ្ជសិ;

ឥទ្ធំ ផីតំ ជនបទំ, ចោរា វិទ្ធំសយន្តិ នំ.

៣៣៧. ន តេ បុត្តា ភវិស្សន្តិ, ន ហិរញ្ញំ ន ធានិយំ [ន ហិរញ្ញនិធានិយា (ក.)];

រដ្ឋេ វិលុប្បមានម្ហិ, សព្ពភោគេហិ ជិយ្យសិ.

៣៣៨. សព្ពភោគា បរិជិណ្ណំ, រាជានំ វាបិ ខត្តិយំ [ខត្តិយ (ក.)];

ញាតិមិត្តា សុហជ្ជា ច, ន តំ មញ្ញន្តិ មានិយំ [មន្តិយំ (ស្យា.)].

៣៣៩. ហត្ថារោហា អនីកដ្ឋា, រថិកា បត្តិការកា;

តមេវមុបជីវន្តា, ន តំ មញ្ញន្តិ មានិយំ.

៣៤០. អសំវិហិតកម្មន្តំ, ពាលំ ទុម្មន្តិមន្តិនំ;

សិរី ជហតិ ទុម្មេធំ, ជិណ្ណំវ ឧរគោ តចំ.

៣៤១. សុសំវិហិតកម្មន្តំ, កាលុដ្ឋាយិំ អតន្ទិតំ;

សព្ពេ ភោគាភិវឌ្ឍន្តិ, គាវោ សឧសភាមិវ.

៣៤២. ឧបស្សុតិំ មហារាជ, រដ្ឋេ ជនបទេ ចរ;

តត្ថ ទិស្វា ច សុត្វា ច, តតោ តំ [ត្វំ (ក.)] បដិបជ្ជសិ.

៣៤៣. ឯវំ វេទេតុ បញ្ចាលោ, សង្គាមេ សរមប្បិតោ [សមប្បិតោ (សី. បី.)];

យថាហមជ្ជ វេទេមិ, កណ្ដកេន សមប្បិតោ.

៣៤៤. ជិណ្ណោ ទុព្ពលចក្ខូសិ, ន រូបំ សាធុ បស្សសិ;

កិំ តត្ថ ព្រហ្មទត្តស្ស, យំ តំ មគ្គេយ្យ [មគ្ឃេយ្យ (បី.)] កណ្ដកោ [កណ្ឌកោ (សី. ស្យា. បី.)].

៣៤៥. ពហ្វេត្ថ ព្រហ្មទត្តស្ស, សោហំ [យោហំ (សី. ស្យា. បី.)] មគ្គស្មិ [មគ្គោស្មិ (បី.)] ព្រាហ្មណ;

អរក្ខិតា ជានបទា, អធម្មពលិនា ហតា.

៣៤៦. រត្តិញ្ហិ [រត្តិញ្ច (សី.)] ចោរា ខាទន្តិ, ទិវា ខាទន្តិ តុណ្ឌិយា;

រដ្ឋស្មិំ កូដរាជស្ស, ពហុ អធម្មិកោ ជនោ.

៣៤៧. ឯតាទិសេ ភយេ ជាតេ [តាត (សី. បី.)], ភយដ្ដា តាត [តាវ (សី. បី.)] មាណវា;

និល្លេនកានិ កុព្ពន្តិ, វនេ អាហត្វ កណ្ដកំ.

៣៤៨. កទាស្សុ នាមយំ រាជា, ព្រហ្មទត្តោ មរិស្សតិ;

យស្ស រដ្ឋម្ហិ ជិយ្យន្តិ, អប្បតិកា កុមារិកា.

៣៤៩. ទុព្ភាសិតញ្ហិ តេ ជម្មិ, អនត្ថបទកោវិទេ;

កុហិំ រាជា កុមារីនំ, ភត្តារំ បរិយេសតិ.

៣៥០. ន មេ ទុព្ភាសិតំ ព្រហ្មេ, កោវិទត្ថបទា អហំ;

អរក្ខិតា ជានបទា, អធម្មពលិនា ហតា.

៣៥១. រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

រដ្ឋស្មិំ កូដរាជស្ស, ពហុ អធម្មិកោ ជនោ;

ទុជ្ជីវេ ទុព្ភរេ ទារេ, កុតោ ភត្តា កុមារិយោ.

៣៥២. ឯវំ សយតុ បញ្ចាលោ, សង្គាមេ សត្តិយា ហតោ;

យថាយំ កបណោ សេតិ, ហតោ ផាលេន សាលិយោ.

៣៥៣. អធម្មេន តុវំ ជម្ម, ព្រហ្មទត្តស្ស កុជ្ឈសិ;

យោ ត្វំ សបសិ រាជានំ, អបរជ្ឈិត្វាន អត្តនោ [អត្តនា (បី.)].

៣៥៤. ធម្មេន ព្រហ្មទត្តស្ស, អហំ កុជ្ឈាមិ ព្រាហ្មណ;

អរក្ខិតា ជានបទា, អធម្មពលិនា ហតា.

៣៥៥. រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

រដ្ឋស្មិំ កូដរាជស្ស, ពហុ អធម្មិកោ ជនោ.

៣៥៦. សា នូន បុន រេ បក្កា, វិកាលេ ភត្តមាហរិ;

ភត្តហារិំ អបេក្ខន្តោ, ហតោ ផាលេន សាលិយោ.

៣៥៧. ឯវំ ហញ្ញតុ បញ្ចាលោ, សង្គាមេ អសិនា ហតោ [ទឡ្ហំ (បី.)];

យថាហមជ្ជ បហតោ, ខីរញ្ច មេ បវដ្ដិតំ.

៣៥៨. យំ បសុ ខីរំ ឆឌ្ឌេតិ, បសុបាលំ វិហិំសតិ [បសុបាលញ្ច ហិំសតិ (សី.), បសុ ផាលញ្ច ហិំសតិ (បី.)];

កិំ តត្ថ ព្រហ្មទត្តស្ស, យំ នោ គរហតេ [គរហតោ (បី.)] ភវំ.

៣៥៩. គារយ្ហោ ព្រហ្មេ បញ្ចាលោ, ព្រហ្មទត្តស្ស រាជិនោ;

អរក្ខិតា ជានបទា, អធម្មពលិនា ហតា.

៣៦០. រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

រដ្ឋស្មិំ កូដរាជស្ស, ពហុ អធម្មិកោ ជនោ.

៣៦១. ចណ្ឌា អដនកា [អដនក (បី.), អកដនា (ក.)] គាវី, យំ បុរេ ន ទុហាមសេ;

តំ ទានិ អជ្ជ ទោហាម, ខីរកាមេហុបទ្ទុតា.

៣៦២. ឯវំ កន្ទតុ បញ្ចាលោ, វិបុត្តោ វិប្បសុក្ខតុ;

យថាយំ កបណា គាវី, វិបុត្តា បរិធាវតិ.

៣៦៣. យំ បសុ បសុបាលស្ស, សម្ភមេយ្យ [បព្ភមេយ្យ (សី. បី.)] រវេយ្យ វា;

កោ នីធ អបរាធត្ថិ, ព្រហ្មទត្តស្ស រាជិនោ.

៣៦៤. អបរាធោ មហាព្រហ្មេ, ព្រហ្មទត្តស្ស រាជិនោ;

អរក្ខិតា ជានបទា, អធម្មពលិនា ហតា.

៣៦៥. រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

រដ្ឋស្មិំ កូដរាជស្ស, ពហុ អធម្មិកោ ជនោ;

កថំ នោ អសិកោសត្ថា, ខីរបា ហញ្ញតេ បជា.

៣៦៦. ឯវំ ខជ្ជតុ បញ្ចាលោ, ហតោ យុទ្ធេ សបុត្តកោ;

យថាហមជ្ជ ខជ្ជាមិ, គាមិកេហិ [គាមកេហិ (សី. បី.)] អរញ្ញជោ.

៣៦៧. ន សព្ពភូតេសុ វិធេន្តិ [វិធន្តិ (ក.)] រក្ខំ, រាជានោ មណ្ឌូក មនុស្សលោកេ;

នេត្តាវតា រាជា អធម្មចារី, យំ តាទិសំ ជីវមទេយ្យុ ធង្កា.

៣៦៨. អធម្មរូបោ វត ព្រហ្មចារី, អនុប្បិយំ ភាសសិ ខត្តិយស្ស;

វិលុប្បមានាយ បុថុប្បជាយ, បូជេសិ រាជំ បរមប្បមាទំ [រាជំ បរមប្បវាទំ (សី.), រាជា បរមប្បវាទិំ (ស្យា.)].

៣៦៩. សចេ ឥមំ ព្រហ្មេ សុរជ្ជកំ សិយា, ផីតំ រដ្ឋំ មុទិតំ [បូរិតំ (ក.)] វិប្បសន្នំ;

ភុត្វា ពលិំ អគ្គបិណ្ឌញ្ច កាកា, ន មាទិសំ ជីវមទេយ្យុ ធង្កាតិ.

គន្ធតិន្ទុកជាតកំ ទសមំ.

តស្សុទ្ទានំ –

កិំឆន្ទ កុម្ភ ជយទ្ទិស ឆទ្ទន្ត, អថ បណ្ឌិតសម្ភវ សិរកបិ;

ទករក្ខស បណ្ឌរនាគវរោ, អថ សម្ពុល តិន្ទុកទេវសុតោតិ.

តិំសនិបាតំ និដ្ឋិតំ.