៥១៩. សម្ពុលាជាតកំ (៩)

២៩៧. កា វេធមានា គិរិកន្ទរាយំ, ឯកា តុវំ តិដ្ឋសិ សំហិតូរុ [សញ្ញតូរ (សី. បី.), សញ្ចិតូរុ (ស្យា.)];

បុដ្ឋាសិ មេ បាណិបមេយ្យមជ្ឈេ, អក្ខាហិ មេ នាមញ្ច ពន្ធវេ ច.

២៩៨. ឱភាសយំ វនំ រម្មំ, សីហព្យគ្ឃនិសេវិតំ;

កា វា ត្វមសិ កល្យាណិ, កស្ស វា ត្វំ សុមជ្ឈិមេ;

អភិវាទេមិ តំ ភទ្ទេ, ទានវាហំ នមត្ថុ តេ.

២៩៩. យោ បុត្តោ កាសិរាជស្ស, សោត្ថិសេនោតិ តំ វិទូ;

តស្សាហំ សម្ពុលា ភរិយា, ឯវំ ជានាហិ ទានវ;

អភិវាទេមិ តំ ភន្តេ [ភទ្ទន្តេ (សី. ស្យា.)], សម្ពុលាហំ នមត្ថុ តេ.

៣០០. វេទេហបុត្តោ ភទ្ទន្តេ, វនេ វសតិ អាតុរោ;

តមហំ រោគសម្មត្តំ, ឯកា ឯកំ ឧបដ្ឋហំ [ឧបដ្ឋហិំ (សី.)].

៣០១. អហញ្ច វនមុញ្ឆាយ, មធុមំសំ មិគាពិលំ [មិគាវិលំ (សី.)];

យទា ហរាមិ តំ ភក្ខោ, តស្ស នូនជ្ជ នាធតិ [នាថតិ (ក.)].

៣០២. កិំ វនេ រាជបុត្តេន, អាតុរេន ករិស្សសិ;

សម្ពុលេ បរិចិណ្ណេន, អហំ ភត្តា ភវាមិ តេ.

៣០៣. សោកដ្ដាយ ទុរត្តាយ, កិំ រូបំ វិជ្ជតេ មម;

អញ្ញំ បរិយេស ភទ្ទន្តេ, អភិរូបតរំ មយា.

៣០៤. ឯហិមំ គិរិមារុយ្ហ, ភរិយា មេ [មយ្ហំ (សី. ស្យា. បី.)] ចតុស្សតា;

តាសំ ត្វំ បវរា ហោហិ, សព្ពកាមសមិទ្ធិនី.

៣០៥. នូន [ននុ (សី. ស្យា. បី. ក.)] តារកវណ្ណាភេ [ហាដកវណ្ណាភេ (បី.)], យំ កិញ្ចិ មនសិច្ឆសិ;

សព្ពំ តំ បចុរំ មយ្ហំ, រមស្ស្វជ្ជ [រមសុជ្ជ (សី. ស្យា.)] មយា សហ.

៣០៦. នោ ចេ តុវំ មហេសេយ្យំ, សម្ពុលេ ការយិស្សសិ;

អលំ ត្វំ បាតរាសាយ, បណ្ហេ [មញ្ញេ (សី. បី.)] ភក្ខា ភវិស្សសិ.

៣០៧. តញ្ច សត្តជដោ លុទ្ទោ, កឡារោ បុរិសាទកោ;

វនេ នាថំ អបស្សន្តិំ, សម្ពុលំ អគ្គហី ភុជេ.

៣០៨. អធិបន្នា បិសាចេន, លុទ្ទេនាមិសចក្ខុនា;

សា ច សត្តុវសម្បត្តា, បតិមេវានុសោចតិ.

៣០៩. ន មេ ឥទំ តថា ទុក្ខំ, យំ មំ ខាទេយ្យ រក្ខសោ;

យញ្ច មេ អយ្យបុត្តស្ស, មនោ ហេស្សតិ អញ្ញថា.

៣១០. ន សន្តិ ទេវា បវសន្តិ នូន, ន ហិ នូន សន្តិ ឥធ លោកបាលា;

សហសា ករោន្តានមសញ្ញតានំ, ន ហិ នូន សន្តិ បដិសេធិតារោ.

៣១១. ឥត្ថីនមេសា បវរា យសស្សិនី, សន្តា សមា អគ្គិរិវុគ្គតេជា;

តញ្ចេ តុវំ រក្ខសាទេសិ កញ្ញំ, មុទ្ធា ច ហិ សត្តធា តេ ផលេយ្យ;

មា ត្វំ ទហី [ជហី (បី.)] មុញ្ច បតិព្ពតាយ [បតិព្ពតា សា (សី.), បតិព្ពតា យា (បី.)].

៣១២. សា ច អស្សមមាគច្ឆិ, បមុត្តា បុរិសាទកា;

នីឡំ [និឌ្ឌំ (ស្យា. ក.)] បឡិនំ សកុណីវ [ផលិនសកុណីវ (សី. ស្យា. បី.)], គតសិង្គំវ អាលយំ.

៣១៣. សា តត្ថ បរិទេវេសិ, រាជបុត្តី យសស្សិនី;

សម្ពុលា ឧតុមត្តក្ខា, វនេ នាថំ អបស្សន្តី [អបស្សតី (សី.)].

៣១៤. សមណេ ព្រាហ្មណេ វន្ទេ, សម្បន្នចរណេ ឥសេ;

រាជបុត្តំ អបស្សន្តី, តុម្ហំម្ហិ [តុម្ហំ ហិ (បី.)] សរណំ គតា.

៣១៥. វន្ទេ សីហេ ច ព្យគ្ឃេ ច, យេ ច អញ្ញេ វនេ មិគា;