៥១៨. បណ្ឌរនាគរាជជាតកំ (៨)

២៥៨. វិកិណ្ណវាចំ អនិគុយ្ហ [អនិគូឡ្ហ (បី.)] មន្តំ, អសញ្ញតំ អបរិចក្ខិតារំ [អបរិរក្ខិតារំ (ក.)];

ភយំ តមន្វេតិ សយំ អពោធំ, នាគំ យថា បណ្ឌរកំ សុបណ្ណោ [សុវណ្ណោ (ក.)].

២៥៩. យោ គុយ្ហមន្តំ បរិរក្ខនេយ្យំ, មោហា នរោ សំសតិ ហាសមានោ [ភាសមានោ (បី.)];

តំ ភិន្នមន្តំ ភយមន្វេតិ ខិប្បំ, នាគំ យថា បណ្ឌរកំ សុបណ្ណោ.

២៦០. នានុមិត្តោ គរុំ អត្ថំ, គុយ្ហំ វេទិតុមរហតិ;

សុមិត្តោ ច អសម្ពុទ្ធំ, សម្ពុទ្ធំ វា អនត្ថ វា.

២៦១. វិស្សាសមាបជ្ជិមហំ អចេលំ [អចេលោ (សី. បី.)], សមណោ អយំ សម្មតោ ភាវិតត្តោ;

តស្សាហមក្ខិំ វិវរិំ [វិវរំ (សី.)] គុយ្ហមត្ថំ, អតីតមត្ថោ កបណំ [កបណោ (បី.)] រុទាមិ.

២៦២. តស្សាហំ បរមំ [បុរិមំ (សី.)] ព្រហ្មេ គុយ្ហំ, វាចញ្ហិ មំ នាសក្ខិំ [នាសក្ខិ (បី.)] សំយមេតុំ;

តប្បក្ខតោ ហិ ភយមាគតំ មមំ, អតីតមត្ថោ កបណំ រុទាមិ.

២៦៣. យោ វេ នរោ សុហទំ មញ្ញមានោ, គុយ្ហមត្ថំ សំសតិ ទុក្កុលីនេ;

ទោសា ភយា អថវា រាគរត្តា [រាគរត្តោ (សី. ស្យា. បី.)], បល្លត្ថិតោ [បល្លិត្ថោ (បី.), បល្លត្តិតោ (ក.)] ពាលោ អសំសយំ សោ.

២៦៤. តិរោក្ខវាចោ អសតំ បវិដ្ឋោ, យោ សង្គតីសុ មុទីរេតិ វាក្យំ;

អាសីវិសោ ទុម្មុខោត្យាហុ តំ នរំ, អារា អារា [អារា អរា (បី.)] សំយមេ តាទិសម្ហា.

២៦៥. អន្នំ បានំ កាសិក [កាសិកំ (បី.)] ចន្ទនញ្ច, មនាបិត្ថិយោ មាលមុច្ឆាទនញ្ច;

ឱហាយ គច្ឆាមសេ សព្ពកាមេ, សុបណ្ណ បាណូបគតាវ ត្យម្ហា.

២៦៦. កោ នីធ តិណ្ណំ គរហំ ឧបេតិ, អស្មិំធ លោកេ បាណភូ នាគរាជ;

សមណោ សុបណ្ណោ អថ វា ត្វមេវ, កិំ ការណា បណ្ឌរកគ្គហីតោ.

២៦៧. សមណោតិ មេ សម្មតត្តោ អហោសិ, បិយោ ច មេ មនសា ភាវិតត្តោ;

តស្សាហមក្ខិំ វិវរិំ គុយ្ហមត្ថំ, អតីតមត្ថោ កបណំ រុទាមិ.

២៦៨. ន ចត្ថិ សត្តោ អមរោ បថព្យា, បញ្ញាវិធា នត្ថិ ន និន្ទិតព្ពា;

សច្ចេន ធម្មេន ធិតិយា [ធិយា (សី. បី.)] ទមេន, អលព្ភមព្យាហរតី នរោ ឥធ.

២៦៩. មាតាបិតា បរមា ពន្ធវានំ, នាស្ស តតិយោ អនុកម្បកត្ថិ;

តេសម្បិ គុយ្ហំ បរមំ ន សំសេ, មន្តស្ស ភេទំ បរិសង្កមានោ.

២៧០. មាតាបិតា ភគិនី ភាតរោ ច, សហាយា វា យស្ស ហោន្តិ សបក្ខា;

តេសម្បិ គុយ្ហំ បរមំ ន សំសេ, មន្តស្ស ភេទំ បរិសង្កមានោ.

២៧១. ភរិយា ចេ បុរិសំ វជ្ជា, កោមារី បិយភាណិនី;

បុត្តរូបយសូបេតា, ញាតិសង្ឃបុរក្ខតា, តស្សាបិ គុយ្ហំ បរមំ ន សំសេ;

មន្តស្ស ភេទំ បរិសង្កមានោ.

២៧២. ន គុយ្ហមត្ថំ [គុយ្ហត្ថំ (ក.)] វិវរេយ្យ, រក្ខេយ្យ នំ យថា និធិំ;

ន ហិ បាតុកតោ សាធុ, គុយ្ហោ អត្ថោ បជានតា.

២៧៣. ថិយា គុយ្ហំ ន សំសេយ្យ, អមិត្តស្ស ច បណ្ឌិតោ;

យោ ចាមិសេន សំហីរោ, ហទយត្ថេនោ ច យោ នរោ.

២៧៤. គុយ្ហមត្ថំ អសម្ពុទ្ធំ, សម្ពោធយតិ យោ នរោ;

មន្តភេទភយា តស្ស, ទាសភូតោ តិតិក្ខតិ.

២៧៥. យាវន្តោ បុរិសស្សត្ថំ, គុយ្ហំ ជានន្តិ មន្តិនំ;

តាវន្តោ តស្ស ឧព្ពេគា, តស្មា គុយ្ហំ ន វិស្សជេ.

២៧៦. វិវិច្ច ភាសេយ្យ ទិវា រហស្សំ, រត្តិំ គិរំ នាតិវេលំ បមុញ្ចេ;

ឧបស្សុតិកា ហិ សុណន្តិ មន្តំ, តស្មា មន្តោ ខិប្បមុបេតិ ភេទំ.

២៧៧. យថាបិ អស្ស [អយោ (ស្យា.), អយ (ក.)] នគរំ មហន្តំ, អទ្វារកំ [អាឡារកំ (បី.)] អាយសំ ភទ្ទសាលំ;

សមន្តខាតាបរិខាឧបេតំ, ឯវម្បិ មេ តេ ឥធ គុយ្ហមន្តា.

២៧៨. យេ គុយ្ហមន្តា អវិកិណ្ណវាចា, ទឡ្ហា សទត្ថេសុ នរា ទុជិវ្ហ [ទុជិវ្ហា (ស្យា. បី.)];

អារា អមិត្តា ព្យវជន្តិ តេហិ, អាសីវិសា វា រិវ សត្តុសង្ឃា [សត្តសង្ឃា (សី. ស្យា.)].

២៧៩. ហិត្វា ឃរំ បព្ពជិតោ អចេលោ, នគ្គោ មុណ្ឌោ ចរតិ ឃាសហេតុ;

តម្ហិ [តម្ហី (បី.)] នុ ខោ វិវរិំ គុយ្ហមត្ថំ, អត្ថា ច ធម្មា ច អបគ្គតម្ហា [អបាគតម្ហា (សី.), អបគតម្ហា (ស្យា.), អវាគតម្ហា (បី.)].

២៨០. កថំករោ ហោតិ សុបណ្ណរាជ, កិំសីលោ កេន វតេន វត្តំ;

សមណោ ចរំ ហិត្វា មមាយិតានិ, កថំករោ សគ្គមុបេតិ ឋានំ.

២៨១. ហិរិយា តិតិក្ខាយ ទមេនុបេតោ [ទមេន ខន្តិយា (សី. ស្យា. បី.)], អក្កោធនោ បេសុណិយំ បហាយ;

សមណោ ចរំ ហិត្វា មមាយិតានិ, ឯវំករោ សគ្គមុបេតិ ឋានំ.

២៨២. មាតាវ បុត្តំ តរុណំ តនុជ្ជំ [តនូជំ (សី.)], សម្ផស្សតា [សម្បស្ស តំ (សី. បី.)] សព្ពគត្តំ ផរេតិ;

ឯវម្បិ មេ ត្វំ បាតុរហុ ទិជិន្ទ, មាតាវ បុត្តំ អនុកម្បមានោ.

២៨៣. ហន្ទជ្ជ ត្វំ មុញ្ច [មុច្ច (សី.)] វធា ទុជិវ្ហ, តយោ ហិ បុត្តា ន ហិ អញ្ញោ អត្ថិ;

អន្តេវាសី ទិន្នកោ អត្រជោ ច, រជ្ជស្សុ [រជស្សុ (សី. ស្យា. បី.)] បុត្តញ្ញតរោ មេ អហោសិ.

២៨៤. ឥច្ចេវ វាក្យំ វិសជ្ជី សុបណ្ណោ, ភុម្យំ បតិដ្ឋាយ ទិជោ ទុជិវ្ហំ;

មុត្តជ្ជ ត្វំ សព្ពភយាតិវត្តោ, ថលូទកេ ហោហិ មយាភិគុត្តោ.

២៨៥. អាតង្កិនំ យថា កុសលោ ភិសក្កោ, បិបាសិតានំ រហទោវ សីតោ;

វេស្មំ យថា ហិមសីតដ្ដិតានំ [ហិមសិសិរដ្ដិតានំ (បី.)], ឯវម្បិ តេ សរណមហំ ភវាមិ.

២៨៦. សន្ធិំ កត្វា អមិត្តេន, អណ្ឌជេន ជលាពុជ;

វិវរិយ ទាឋំ សេសិ, កុតោ តំ ភយមាគតំ.

២៨៧. សង្កេថេវ អមិត្តស្មិំ, មិត្តស្មិម្បិ ន វិស្សសេ;

អភយា ភយមុប្បន្នំ, អបិ មូលានិ កន្តតិ.

២៨៨. កថំ នុ វិស្សសេ ត្យម្ហិ, យេនាសិ កលហោ កតោ;

និច្ចយត្តេន ឋាតព្ពំ, សោ ទិសព្ភិ [សោ ទិសម្ហិ (បី.)] ន រជ្ជតិ.

២៨៩. វិស្សាសយេ ន ច តំ [នំ (សី. ស្យា. បី.)] វិស្សយេយ្យ, អសង្កិតោ សង្កិតោ ច [អសង្កិតោ ច សង្កិតោ (សី. បី.)] ភវេយ្យ;

តថា តថា វិញ្ញូ បរក្កមេយ្យ, យថា យថា ភាវំ បរោ ន ជញ្ញា.

២៩០. តេ ទេវវណ្ណា [ទេវវណ្ណី (បី.)] សុខុមាលរូបា, ឧភោ សមា សុជយា [សុជយោ (សី. ស្យា. បី.)] បុញ្ញខន្ធា [បុញ្ញគន្ធា (បី.)];

ឧបាគមុំ ករម្បិយំ [កាទម្ពិយំ (សី.), ការម្ពិយំ (បី.)] អចេលំ, មិស្សីភូតា អស្សវាហាវ នាគា.

២៩១. តតោ ហវេ បណ្ឌរកោ អចេលំ, សយមេវុបាគម្ម ឥទំ អវោច;

មុត្តជ្ជហំ សព្ពភយាតិវត្តោ, ន ហិ [ហ (បី.)] នូន តុយ្ហំ មនសោ បិយម្ហា.

២៩២. បិយោ ហិ មេ អាសិ សុបណ្ណរាជា, អសំសយំ បណ្ឌរកេន សច្ចំ;

សោ រាគរត្តោវ អកាសិមេតំ, បាបកម្មំ [បាបំ កម្មំ (សី. បី.)] សម្បជានោ ន មោហា.

២៩៣. ន មេ បិយំ អប្បិយំ វាបិ ហោតិ, សម្បស្សតោ លោកមិមំ បរញ្ច;

សុសញ្ញតានញ្ហិ វិយញ្ជនេន, អសញ្ញតោ លោកមិមំ ចរាសិ.

២៩៤. អរិយាវកាសោសិ អនរិយោវាសិ [អនរិយោ ចាសិ (សី. បី.)], អសញ្ញតោ សញ្ញតសន្និកាសោ;

កណ្ហាភិជាតិកោសិ អនរិយរូបោ, បាបំ ពហុំ ទុច្ចរិតំ អចារិ.

២៩៥. អទុដ្ឋស្ស តុវំ ទុព្ភិ, ទុព្ភី [ទូភិ, ទូភី (បី.)] ច បិសុណោ ចសិ;

ឯតេន សច្ចវជ្ជេន, មុទ្ធា តេ ផលតុ សត្តធា.

២៩៦. តស្មា ហិ មិត្តានំ ន ទុព្ភិតព្ពំ, មិត្តទុព្ភា [មិត្តទុព្ភា ហិ (ស្យា.)] បាបិយោ នត្ថិ អញ្ញោ;

អាសិត្តសត្តោ និហតោ បថព្យា, ឥន្ទស្ស វាក្យេន ហិ សំវរោ ហតោតិ.

បណ្ឌរនាគរាជជាតកំ [បណ្ឌរកជាតកំ (សី. ស្យា. បី.)] អដ្ឋមំ.