៥១៧. ទករក្ខសជាតកំ (៧)

២២៤. សចេ វោ វុយ្ហមានានំ, សត្តន្នំ ឧទកណ្ណវេ;

មនុស្សពលិមេសានោ, នាវំ គណ្ហេយ្យ រក្ខសោ;

អនុបុព្ពំ កថំ ទត្វា, មុញ្ចេសិ ទករក្ខសា [ទករក្ខតោ (បី.)].

២២៥. មាតរំ បឋមំ ទជ្ជំ, ភរិយំ ទត្វាន ភាតរំ;

តតោ សហាយំ ទត្វាន, បញ្ចមំ ទជ្ជំ [ទជ្ជ (ស្យា.)] ព្រាហ្មណំ;

ឆដ្ឋាហំ ទជ្ជមត្តានំ, នេវ ទជ្ជំ មហោសធំ.

២២៦. បោសេតា តេ ជនេត្តី ច, ទីឃរត្តានុកម្បិកា;

ឆព្ភី តយិ បទុស្សតិ [បទុដ្ឋស្មិំ (សី. ស្យា.)], បណ្ឌិតា អត្ថទស្សិនី;

អញ្ញំ ឧបនិសំ កត្វា, វធា តំ បរិមោចយិ.

២២៧. តំ តាទិសិំ [តាទិសំ (ក.)] បាណទទិំ, ឱរសំ គព្ភធារិនិំ [គព្ភធារិណិំ (សី. ស្យា.)];

មាតរំ កេន ទោសេន, ទជ្ជាសិ ទករក្ខិនោ [ទករក្ខតោ (បី.)].

២២៨. ទហរា វិយលង្ការំ, ធារេតិ អបិឡន្ធនំ;

ទោវារិកេ អនីកដ្ឋេ, អតិវេលំ បជគ្ឃតិ [សញ្ជគ្ឃតិ (ក.)].

២២៩. អថោបិ បដិរាជូនំ, សយំ ទូតានិ សាសតិ;

មាតរំ តេន ទោសេន, ទជ្ជាហំ ទករក្ខិនោ.

២៣០. ឥត្ថិគុម្ពស្ស បវរា, អច្ចន្តំ បិយភាណិនី [អច្ចន្តបិយវាទិនី (សី. បី.)];

អនុគ្គតា [អនុព្ពតា (ស្យា.), អនុបុព្ពតា (ក.)] សីលវតី, ឆាយាវ អនបាយិនី.

២៣១. អក្កោធនា បុញ្ញវតី [បញ្ញវតី (សី. បី.)], បណ្ឌិតា អត្ថទស្សិនី;

ឧព្ពរិំ [ឧប្បរិំ (សី.)] កេន ទោសេន, ទជ្ជាសិ ទករក្ខិនោ.

២៣២. ខិឌ្ឌារតិសមាបន្នំ, អនត្ថវសមាគតំ;

សា មំ សកាន បុត្តានំ, អយាចំ យាចតេ ធនំ.

២៣៣. សោហំ ទទាមិ សារត្តោ [សារតោ (ស្យា.)], ពហុំ ឧច្ចាវចំ ធនំ;

សុទុច្ចជំ ចជិត្វាន, បច្ឆា សោចាមិ ទុម្មនោ;

ឧព្ពរិំ តេន ទោសេន, ទជ្ជាហំ ទករក្ខិនោ.

២៣៤. យេនោចិតា ជនបទា [ជានបទា (សី. ស្យា. បី.)], អានីតា ច បដិគ្គហំ;

អាភតំ បររជ្ជេភិ, អភិដ្ឋាយ ពហុំ ធនំ.

២៣៥. ធនុគ្គហានំ បវរំ, សូរំ តិខិណមន្តិនំ;

ភាតរំ កេន ទោសេន, ទជ្ជាសិ ទករក្ខិនោ.

២៣៦. យេនោចិតា [មយោចិតា (សី.), មយាចិតា (បី.)] ជនបទា, អានីតា ច បដិគ្គហំ;

អាភតំ បររជ្ជេភិ, អភិដ្ឋាយ ពហុំ ធនំ.

២៣៧. ធនុគ្គហានំ បវរោ, សូរោ តិខិណមន្តិ ច [តិខិណមន្តិនោ (ក.)];

មយាយំ [មយា សោ (សី. បី.)] សុខិតោ រាជា, អតិមញ្ញតិ ទារកោ.

២៣៨. ឧបដ្ឋានម្បិ មេ អយ្យេ, ន សោ ឯតិ យថា បុរេ;

ភាតរំ តេន ទោសេន, ទជ្ជាហំ ទករក្ខិនោ.

២៣៩. ឯករត្តេន ឧភយោ, ត្វញ្ចេវ ធនុសេខ ច [ធនុសេខវា (សី. ស្យា. បី.)];

ឧភោ ជាតេត្ថ បញ្ចាលា, សហាយា សុសមាវយា.

២៤០. ចរិយា តំ អនុពន្ធិត្ថោ [អនុពន្ធោ (ក.)], ឯកទុក្ខសុខោ តវ;

ឧស្សុក្កោ តេ ទិវារត្តិំ, សព្ពកិច្ចេសុ ព្យាវដោ;

សហាយំ កេន ទោសេន, ទជ្ជាសិ ទករក្ខិនោ.

២៤១. ចរិយា មំ អយំ [ចរិយាយ អយំ (សី. បី.)] អយ្យេ, បជគ្ឃិត្ថោ [សញ្ជគ្ឃិត្ថោ (ស្យា.)] មយា សហ;

អជ្ជាបិ តេន វណ្ណេន, អតិវេលំ បជគ្ឃតិ.

២៤២. ឧព្ពរិយាបិហំ អយ្យេ, មន្តយាមិ រហោគតោ;

អនាមន្តោ [អនាមន្តា (សី.)] បវិសតិ, បុព្ពេ អប្បដិវេទិតោ.

២៤៣. លទ្ធទ្វារោ [លទ្ធវារោ (សី. បី.)] កតោកាសោ, អហិរិកំ អនាទរំ;

សហាយំ តេន ទោសេន, ទជ្ជាហំ ទករក្ខិនោ.

២៤៤. កុសលោ សព្ពនិមិត្តានំ, រុតញ្ញូ [រុទញ្ញូ (សី. ស្យា. បី.)] អាគតាគមោ;

ឧប្បាតេ សុបិនេ យុត្តោ, និយ្យានេ ច បវេសនេ.

២៤៥. បដ្ឋោ [បទ្ធោ (សី. បី.)] ភូមន្តលិក្ខស្មិំ, នក្ខត្តបទកោវិទោ;

ព្រាហ្មណំ កេន ទោសេន, ទជ្ជាសិ ទករក្ខិនោ.

២៤៦. បរិសាយម្បិ មេ អយ្យេ, ឧម្មីលិត្វា ឧទិក្ខតិ;

តស្មា អច្ចភមុំ លុទ្ទំ, ទជ្ជាហំ ទករក្ខិនោ.

២៤៧. សសមុទ្ទបរិយាយំ, មហិំ សាគរកុណ្ឌលំ;

វសុន្ធរំ អាវសសិ, អមច្ចបរិវារិតោ.

២៤៨. ចាតុរន្តោ មហារដ្ឋោ, វិជិតាវី មហព្ពលោ;

បថព្យា ឯករាជាសិ, យសោ តេ វិបុលំ គតោ.

២៤៩. សោឡសិត្ថិសហស្សានិ, អាមុត្តមណិកុណ្ឌលា;

នានាជនបទា នារី, ទេវកញ្ញូបមា សុភា.

២៥០. ឯវំ សព្ពង្គសម្បន្នំ, សព្ពកាមសមិទ្ធិនំ;

សុខិតានំ បិយំ ទីឃំ, ជីវិតំ អាហុ ខត្តិយ.

២៥១. អថ ត្វំ កេន វណ្ណេន, កេន វា បន ហេតុនា;

បណ្ឌិតំ អនុរក្ខន្តោ, បាណំ ចជសិ ទុច្ចជំ.

២៥២. យតោបិ អាគតោ អយ្យេ, មម ហត្ថំ មហោសធោ;

នាភិជានាមិ ធីរស្ស, អនុមត្តម្បិ ទុក្កដំ.

២៥៣. សចេ ច កិស្មិចិ កាលេ, មរណំ មេ បុរេ សិយា;

សោ មេ បុត្តេ [បុត្តេ ច មេ (សី. ស្យា. បី.] បបុត្តេ ច, សុខាបេយ្យ មហោសធោ.

២៥៤. អនាគតំ បច្ចុប្បន្នំ, សព្ពមត្ថម្បិ បស្សតិ [សព្ពមត្ថំ វិបស្សតិ (សី. ស្យា. បី.)];

អនាបរាធកម្មន្តំ, ន ទជ្ជំ ទករក្ខិនោ.

២៥៥. ឥទំ សុណាថ បញ្ចាលា, ចូឡនេយ្យស្ស [ចូឡនីយស្ស (សី.)] ភាសិតំ;

បណ្ឌិតំ អនុរក្ខន្តោ, បាណំ ចជតិ ទុច្ចជំ.

២៥៦. មាតុ ភរិយាយ ភាតុច្ច, សខិនោ ព្រាហ្មណស្ស ច;

អត្តនោ ចាបិ បញ្ចាលោ, ឆន្នំ ចជតិ ជីវិតំ.

២៥៧. ឯវំ មហត្ថិកា [ខហិទ្ធិយា (ស្យា.), មហិទ្ធិកា (ក.)] បញ្ញា, និបុណា សាធុចិន្តិនី;

ទិដ្ឋធម្មហិតត្ថាយ, សម្បរាយសុខាយ ចាតិ.

ទករក្ខសជាតកំ សត្តមំ.