៥១៦. មហាកបិជាតកំ (៦)

១៧៨. ពារាណស្យំ [ពារាណស្សំ (សី. បី.)] អហូ រាជា, កាសីនំ រដ្ឋវឌ្ឍនោ;

មិត្តាមច្ចបរិព្យូឡ្ហោ, អគមាសិ មិគាជិនំ [មិគាជិរំ (សី.), មិគាចិរំ (បី.)].

១៧៩. តត្ថ ព្រាហ្មណមទ្ទក្ខិ, សេតំ ចិត្រំ កិលាសិនំ;

វិទ្ធស្តំ កោវិឡារំវ, កិសំ ធមនិសន្ថតំ.

១៨០. បរមការុញ្ញតំ បត្តំ, ទិស្វា កិច្ឆគតំ នរំ;

អវច ព្យម្ហិតោ រាជា, ‘‘យក្ខានំ កតមោ នុសិ.

១៨១. ‘‘ហត្ថបាទា ច តេ សេតា, តតោ សេតតរំ [សេតតរោ (បី.)] សិរោ;

គត្តំ កម្មាសវណ្ណំ តេ, កិលាសពហុលោ ចសិ.

១៨២. ‘‘វដ្ដនាវឡិ [វដ្ឋនាវលិ (បី.)] សង្កាសា, បិដ្ឋិ តេ និន្នតុន្នតា;

កាឡបព្ពាវ [កាឡបព្ពា ច (ស្យា.), កាឡា បព្ពា ច (បី.)] តេ អង្គា, នាញ្ញំ បស្សាមិ ឯទិសំ.

១៨៣. ‘‘ឧគ្ឃដ្ដបាទោ តសិតោ, កិសោ ធមនិសន្ថតោ;

ឆាតោ អាតត្តរូបោសិ [អាទិត្តរូបោសិ (ក.), អតិត្តរូបោសិ (ស្យា. ក. អដ្ឋ.)], កុតោសិ កត្ថ គច្ឆសិ.

១៨៤. ‘‘ទុទ្ទសី អប្បការោសិ, ទុព្ពណ្ណោ ភីមទស្សនោ;

ជនេត្តិ យាបិ តេ មាតា, ន តំ ឥច្ឆេយ្យ បស្សិតុំ.

១៨៥. ‘‘កិំ កម្មមករំ [កម្មមករា (សី. ស្យា. បី.)] បុព្ពេ, កំ អវជ្ឈំ អឃាតយិ;

កិព្ពិសំ យំ ករិត្វាន, ឥទំ ទុក្ខំ ឧបាគមិ’’.

១៨៦. តគ្ឃ តេ អហមក្ខិស្សំ, យថាបិ កុសលោ តថា;

សច្ចវាទិញ្ហិ លោកស្មិំ, បសំសន្តីធ បណ្ឌិតា.

១៨៧. ឯកោ ចរំ គោគវេសោ, មូឡ្ហោ អច្ចសរិំ វនេ;

អរញ្ញេ ឥរីណេ [ឦរិណេ (សី. ស្យា. បី.)] វិវនេ, នានាកុញ្ជរសេវិតេ.

១៨៨. វាឡមិគានុចរិតេ, វិប្បនដ្ឋោស្មិ កាននេ;

អចរិំ តត្ថ សត្តាហំ, ខុប្បិបាស [ខុប្បិបាសា (សី. បី.)] សមប្បិតោ.

១៨៩. តត្ថ តិន្ទុកមទ្ទក្ខិំ, វិសមដ្ឋំ ពុភុក្ខិតោ;

បបាតមភិលម្ពន្តំ, សម្បន្នផលធារិនំ.

១៩០. វាតស្សិតានិ ភក្ខេសិំ, តានិ រុច្ចិំសុ មេ ភុសំ;

អតិត្តោ រុក្ខមារូហិំ [មារុយ្ហ (សី. ស្យា.)], តត្ថ ហេស្សាមិ អាសិតោ.

១៩១. ឯកំ មេ ភក្ខិតំ អាសិ, ទុតិយំ អភិបត្ថិតំ;

តតោ សា ភញ្ជថ សាខា, ឆិន្នា ផរសុនា វិយ.

១៩២. សោហំ សហាវ សាខាហិ, ឧទ្ធំបាទោ អវំសិរោ;

អប្បតិដ្ឋេ អនាលម្ពេ, គិរិទុគ្គស្មិ បាបតំ.

១៩៣. យស្មា ច វារិ គម្ភីរំ, តស្មា ន សមបជ្ជិសំ [សមបជ្ជសិំ (សី.), សមភជ្ជិសំ (បី.)];

តត្ថ សេសិំ និរានន្ទោ, អនូនា [អនាថោ (សី.)] ទស រត្តិយោ.

១៩៤. អថេត្ថ កបិ មាគញ្ឆិ [មាគច្ឆិ (ស្យា. ក.)], គោនង្គុលោ ទរីចរោ;

សាខាហិ សាខំ វិចរន្តោ, ខាទមានោ ទុមប្ផលំ.

១៩៥. សោ មំ ទិស្វា កិសំ បណ្ឌុំ, ការុញ្ញមករំ មយិ;

អម្ភោ កោ នាម សោ ឯត្ថ, ឯវំ ទុក្ខេន អដ្ដិតោ.

១៩៦. មនុស្សោ អមនុស្សោ វា, អត្តានំ មេ បវេទយ;

តស្សញ្ជលិំ បណាមេត្វា, ឥទំ វចនមព្រវិំ.

១៩៧. មនុស្សោហំ ព្យសម្បត្តោ [វសម្បត្តោ (ស្យា. ក.)], សា មេ នត្ថិ ឥតោ គតិ;

តំ វោ វទាមិ ភទ្ទំ វោ, ត្វញ្ច មេ សរណំ ភវ.

១៩៨. គរុំ [គរុ (សី. បី.)] សិលំ គហេត្វាន, វិចរី [វិចរិ (បី.)] បព្ពតេ កបិ;

សិលាយ យោគ្គំ កត្វាន, និសភោ ឯតទព្រវិ.

១៩៩. ឯហិ មេ បិដ្ឋិមារុយ្ហ, គីវំ គណ្ហាហិ ពាហុភិ;

អហំ តំ ឧទ្ធរិស្សាមិ, គិរិទុគ្គត វេគសា.

២០០. តស្ស តំ វចនំ សុត្វា, វានរិន្ទស្ស សិរីមតោ;

បិដ្ឋិមារុយ្ហ ធីរស្ស, គីវំ ពាហាហិ អគ្គហិំ.

២០១. សោ មំ តតោ សមុដ្ឋាសិ, តេជស្សី [តេជសី (ស្យា. បី. ក.)] ពលវា កបិ;

វិហញ្ញមានោ កិច្ឆេន, គិរិទុគ្គត វេគសា.

២០២. ឧទ្ធរិត្វាន មំ សន្តោ, និសភោ ឯតទព្រវិ;

ឥង្ឃ មំ សម្ម រក្ខស្សុ, បស្សុបិស្សំ មុហុត្តកំ.

២០៣. សីហា ព្យគ្ឃា ច ទីបី ច, អច្ឆកោកតរច្ឆយោ;

តេ មំ បមត្តំ ហិំសេយ្យុំ, តេ ត្វំ ទិស្វា និវារយ [ទិស្វាន វារយ (បី.)].

២០៤. ឯវំ មេ បរិត្តាតូន [បរិត្តាតុន (ក.)], បស្សុបិ សោ មុហុត្តកំ;

តទាហំ បាបិកំ ទិដ្ឋិំ, បដិលច្ឆិំ អយោនិសោ.

២០៥. ភក្ខោ អយំ មនុស្សានំ, យថា ចញ្ញេ វនេ មិគា;

យំ នូនិមំ វធិត្វាន, ឆាតោ ខាទេយ្យ វានរំ.

២០៦. អសិតោ [អាសិកោ (បី.)] ច គមិស្សាមិ, មំសមាទាយ សម្ពលំ;

កន្តារំ និត្ថរិស្សាមិ, បាថេយ្យំ មេ ភវិស្សតិ.

២០៧. តតោ សិលំ គហេត្វាន, មត្ថកំ សន្និតាឡយិំ;

មម គត្ត [ភត្ត (សី. ស្យា.), ហត្ថ (បី.)] កិលន្តស្ស, បហារោ ទុព្ពលោ អហុ.

២០៨. សោ ច វេគេនុទប្បត្តោ, កបិ រុហិរ [រុធិរ (សី.)] មក្ខិតោ;

អស្សុបុណ្ណេហិ នេត្តេហិ, រោទន្តោ មំ ឧទិក្ខតិ.

២០៩. មាយ្យោមំ ករិ ភទ្ទន្តេ, ត្វញ្ច នាមេទិសំ ករិ;

ត្វញ្ច ខោ នាម ទីឃាវុ [ទីឃាយុ (បី.)], អញ្ញេ [អញ្ញំ (បី.)] វារេតុមរហសិ.

២១០. អហោ វត រេ បុរិស, តាវ ទុក្ករការក;

ឯទិសា វិសមា ទុគ្គា, បបាតា ឧទ្ធតោ [ឧទ្ធដោ (បី.)] មយា.

២១១. អានីតោ បរលោកាវ, ទុព្ភេយ្យំ មំ អមញ្ញថ;

តំ តេន បាបធម្មេន, បាបំ បាបេន ចិន្តិតំ.

២១២. មា ហេវ ត្វំ អធម្មដ្ឋ, វេទនំ កដុកំ ផុសិ;

មា ហេវ បាបកម្មំ តំ, ផលំ វេឡុំវ តំ វធិ.

២១៣. តយិមេ នត្ថិ វិស្សាសោ, បាបធម្ម អសញ្ញត [បាបធម្មំ អមញ្ញថ (បី.)];

ឯហិ មេ បិដ្ឋិតោ គច្ឆ, ទិស្សមានោវ សន្តិកេ.

២១៤. មុត្តោសិ ហត្ថា វាឡានំ, បត្តោសិ មានុសិំ បទំ;

ឯស មគ្គោ អធម្មដ្ឋ, តេន គច្ឆ យថាសុខំ.

២១៥. ឥទំ វត្វា គិរិចរោ, រហទេ [រុហិរំ (ស្យា. ក.)] បក្ខល្យ មត្ថកំ;

អស្សូនិ សម្បមជ្ជិត្វា, តតោ បព្ពតមារុហិ.

២១៦. សោហំ តេនាភិសត្តោស្មិ, បរិឡាហេន អដ្ដិតោ;

ឌយ្ហមានេន គត្តេន, វារិំ បាតុំ ឧបាគមិំ.

២១៧. អគ្គិនា វិយ សន្តត្តោ, រហទោ រុហិរមក្ខិតោ;

បុព្ពលោហិតសង្កាសោ, សព្ពោ មេ សមបជ្ជថ.

២១៨. យាវន្តោ ឧទពិន្ទូនិ, កាយស្មិំ និបតិំសុ មេ;

តាវន្តោ គណ្ឌ [គណ្ឌូ (សី. បី.), គណ្ឌុ (ស្យា.)] ជាយេថ, អទ្ធពេលុវសាទិសា.

២១៩. បភិន្នា បគ្ឃរិំសុ មេ, កុណបា បុព្ពលោហិតា;

យេន យេនេវ គច្ឆាមិ, គាមេសុ និគមេសុ ច.

២២០. ទណ្ឌហត្ថា និវារេន្តិ, ឥត្ថិយោ បុរិសា ច មំ;

ឱក្កិតា [ឱកិណ្ណា (សី.)] បូតិគន្ធេន, មាស្សុ ឱរេន អាគមា [មាគមា (សី. បី.)].

២២១. ឯតាទិសំ ឥទំ ទុក្ខំ, សត្ត វស្សានិ ទានិ មេ;

អនុភោមិ សកំ កម្មំ, បុព្ពេ ទុក្កដមត្តនោ.

២២២. តំ វោ វទាមិ ភទ្ទន្តេ [ភទ្ទំ វោ (សី. បី.)], យាវន្តេត្ថ សមាគតា;

មាស្សុ មិត្តាន [មិត្តានំ (សី. បី.)] ទុព្ភិត្ថោ, មិត្តទុព្ភោ ហិ បាបកោ.

២២៣. កុដ្ឋី កិលាសី ភវតិ, យោ មិត្តានិធ ទុព្ភតិ [យោ មិត្តានំ ឥធទ្ទុភិ (សី. អដ្ឋ.), យោ មិត្តានំ ឥធ ទុព្ភតិ (បី.)];

កាយស្ស ភេទា មិត្តទ្ទុ [មិត្តទុព្ភី (ស្យា. ក.)], និរយំ សោបបជ្ជតីតិ [សោ ឧបបជ្ជតីតិ (សី. ស្យា. បី.)].

មហាកបិជាតកំ ឆដ្ឋំ.