៥១៥. សម្ភវជាតកំ (៥)

១៣៨. រជ្ជញ្ច បដិបន្នាស្ម, អាធិបច្ចំ សុចីរត;

មហត្តំ បត្តុមិច្ឆាមិ, វិជេតុំ បថវិំ ឥមំ.

១៣៩. ធម្មេន នោ អធម្មេន, អធម្មោ មេ ន រុច្ចតិ;

កិច្ចោវ ធម្មោ ចរិតោ, រញ្ញោ ហោតិ សុចីរត.

១៤០. ឥធ ចេវានិន្ទិតា យេន, បេច្ច យេន អនិន្ទិតា;

យសំ ទេវមនុស្សេសុ, យេន បប្បោមុ [បប្បេមុ (សី. អដ្ឋ.)] ព្រាហ្មណ.

១៤១. យោហំ អត្ថញ្ច ធម្មញ្ច, កត្តុមិច្ឆាមិ ព្រាហ្មណ;

តំ ត្វំ អត្ថញ្ច ធម្មញ្ច, ព្រាហ្មណក្ខាហិ បុច្ឆិតោ.

១៤២. នាញ្ញត្រ វិធុរា រាជ, ឯតទក្ខាតុមរហតិ;

យំ ត្វំ អត្ថញ្ច ធម្មញ្ច, កត្តុមិច្ឆសិ ខត្តិយ.

១៤៣. ឯហិ ខោ បហិតោ គច្ឆ, វិធុរស្ស ឧបន្តិកំ;

និក្ខញ្ចិមំ [និក្ខំ រត្ត (សី.), និក្ខមិមំ (បី.)] សុវណ្ណស្ស, ហរំ គច្ឆ សុចីរត;

អភិហារំ ឥមំ ទជ្ជា, អត្ថធម្មានុសិដ្ឋិយា.

១៤៤. ស្វាធិប្បាគា ភារទ្វាជោ, វិធុរស្ស ឧបន្តិកំ;

តមទ្ទស មហាព្រហ្មា, អសមានំ សកេ ឃរេ.

១៤៥. រញ្ញោហំ បហិតោ ទូតោ, កោរព្យស្ស យសស្សិនោ;

‘‘អត្ថំ ធម្មញ្ច បុច្ឆេសិ’’, ឥច្ចព្រវិ យុធិដ្ឋិលោ;

តំ ត្វំ អត្ថញ្ច ធម្មញ្ច, វិធុរក្ខាហិ បុច្ឆិតោ.

១៤៦. គង្គំ មេ បិទហិស្សន្តិ, ន តំ សក្កោមិ ព្រាហ្មណ;

អបិធេតុំ មហាសិន្ធុំ, តំ កថំ សោ ភវិស្សតិ.

១៤៧. ន តេ សក្កោមិ អក្ខាតុំ, អត្ថំ ធម្មញ្ច បុច្ឆិតោ;

ភទ្រការោ ច មេ បុត្តោ, ឱរសោ មម អត្រជោ;

តំ ត្វំ អត្ថញ្ច ធម្មញ្ច, គន្ត្វា បុច្ឆស្សុ ព្រាហ្មណ.

១៤៨. ស្វាធិប្បាគា ភារទ្វាជោ, ភទ្រការស្សុបន្តិកំ [ភទ្រការស្ស សន្តិកំ (សី. ស្យា.)];

តមទ្ទស មហាព្រហ្មា, និសិន្នំ សម្ហិ វេស្មនិ.

១៤៩. រញ្ញោហំ បហិតោ ទូតោ, កោរព្យស្ស យសស្សិនោ;

‘‘អត្ថំ ធម្មញ្ច បុច្ឆេសិ’’, ឥច្ចព្រវិ យុធិដ្ឋិលោ;

តំ ត្វំ អត្ថញ្ច ធម្មញ្ច, ភទ្រការ បព្រូហិ [ព្រវីហិ (សី. បី.)] មេ.

១៥០. មំសកាជំ [មំសកាចំ (បី.)] អវហាយ, គោធំ អនុបតាមហំ;

ន តេ សក្កោមិ អក្ខាតុំ, អត្ថំ ធម្មញ្ច បុច្ឆិតោ.

១៥១. សញ្ចយោ [សញ្ជយោ (សី. ស្យា. បី.)] នាម មេ ភាតា, កនិដ្ឋោ មេ សុចីរត;

តំ ត្វំ អត្ថញ្ច ធម្មញ្ច, គន្ត្វា បុច្ឆស្សុ ព្រាហ្មណ.

១៥២. ស្វាធិប្បាគា ភារទ្វាជោ, សញ្ចយស្ស ឧបន្តិកំ;

តមទ្ទស មហាព្រហ្មា, និសិន្នំ សម្ហិ វេស្មនិ [បរិសតិ (ស្យា.), បរីសតិ (បី.)].

១៥៣. រញ្ញោហំ បហិតោ ទូតោ, កោរព្យស្ស យសស្សិនោ;

‘‘អត្ថំ ធម្មញ្ច បុច្ឆេសិ’’, ឥច្ចព្រវិ យុធិដ្ឋិលោ;

តំ ត្វំ អត្ថញ្ច ធម្មញ្ច, សញ្ចយក្ខាហិ បុច្ឆិតោ.

១៥៤. សទា មំ គិលតេ [គិលតី (សី.), គិលតិ (បី.)] មច្ចុ, សាយំ បាតោ សុចីរត;

ន តេ សក្កោមិ អក្ខាតុំ, អត្ថំ ធម្មញ្ច បុច្ឆិតោ.

១៥៥. សម្ភវោ នាម មេ ភាតា, កនិដ្ឋោ មេ សុចីរត;

តំ ត្វំ អត្ថញ្ច ធម្មញ្ច, គន្ត្វា បុច្ឆស្សុ ព្រាហ្មណ.

១៥៦. អព្ភុតោ វត ភោ ធម្មោ, នាយំ អស្មាក រុច្ចតិ;

តយោ ជនា បិតាបុត្តា, តេសុ បញ្ញាយ នោ វិទូ.

១៥៧. ន តំ សក្កោថ អក្ខាតុំ, អត្ថំ ធម្មញ្ច បុច្ឆិតា;

កថំ នុ ទហរោ ជញ្ញា, អត្ថំ ធម្មញ្ច បុច្ឆិតោ.

១៥៨. មា នំ ទហរោតិ ឧញ្ញាសិ [មញ្ញាសិ (ស្យា. ក.)], អបុច្ឆិត្វាន សម្ភវំ;

បុច្ឆិត្វា សម្ភវំ ជញ្ញា, អត្ថំ ធម្មញ្ច ព្រាហ្មណ.

១៥៩. យថាបិ ចន្ទោ វិមលោ, គច្ឆំ អាកាសធាតុយា;

សព្ពេ តារាគណេ លោកេ, អាភាយ អតិរោចតិ.

១៦០. ឯវម្បិ ទហរូបេតោ, បញ្ញាយោគេន សម្ភវោ;

មា នំ ទហរោតិ ឧញ្ញាសិ, អបុច្ឆិត្វាន សម្ភវំ;

បុច្ឆិត្វា សម្ភវំ ជញ្ញា, អត្ថំ ធម្មញ្ច ព្រាហ្មណ.

១៦១. យថាបិ រម្មកោ មាសោ, គិម្ហានំ ហោតិ ព្រាហ្មណ;

អតេវញ្ញេហិ មាសេហិ, ទុមបុប្ផេហិ សោភតិ.

១៦២. ឯវម្បិ ទហរូបេតោ, បញ្ញាយោគេន សម្ភវោ;

មា នំ ទហរោតិ ឧញ្ញាសិ, អបុច្ឆិត្វាន សម្ភវំ;

បុច្ឆិត្វា សម្ភវំ ជញ្ញា, អត្ថំ ធម្មញ្ច ព្រាហ្មណ.

១៦៣. យថាបិ ហិមវា ព្រហ្មេ, បព្ពតោ គន្ធមាទនោ;

នានារុក្ខេហិ សញ្ឆន្នោ, មហាភូតគណាលយោ;

ឱសធេហិ ច ទិព្ពេហិ, ទិសា ភាតិ បវាតិ ច.

១៦៤. ឯវម្បិ ទហរូបេតោ, បញ្ញាយោគេន សម្ភវោ;

មា នំ ទហរោតិ ឧញ្ញាសិ, អបុច្ឆិត្វាន សម្ភវំ;

បុច្ឆិត្វា សម្ភវំ ជញ្ញា, អត្ថំ ធម្មញ្ច ព្រាហ្មណ.

១៦៥. យថាបិ បាវកោ ព្រហ្មេ, អច្ចិមាលី យសស្សិមា;

ជលមានោ វនេ គច្ឆេ [ចរំ កច្ឆេ (បី.)], អនលោ កណ្ហវត្តនី.

១៦៦. ឃតាសនោ ធូមកេតុ, ឧត្តមាហេវនន្ទហោ;

និសីថេ [និស្សីវេ (ស្យា.), និសិវេ (ក.)] បព្ពតគ្គស្មិំ, បហូតេធោ [ពហុតេជោ (ស្យា. ក.)] វិរោចតិ.

១៦៧. ឯវម្បិ ទហរូបេតោ, បញ្ញាយោគេន សម្ភវោ;

មា នំ ទហរោតិ ឧញ្ញាសិ, អបុច្ឆិត្វាន សម្ភវំ;

បុច្ឆិត្វា សម្ភវំ ជញ្ញា, អត្ថំ ធម្មញ្ច ព្រាហ្មណ.

១៦៨. ជវេន ភទ្រំ ជានន្តិ, ពលិពទ្ទញ្ច [ពលិវទ្ទញ្ច (សី. បី.)] វាហិយេ;

ទោហេន ធេនុំ ជានន្តិ, ភាសមានញ្ច បណ្ឌិតំ.

១៦៩. ឯវម្បិ ទហរូបេតោ, បញ្ញាយោគេន សម្ភវោ;

មា នំ ទហរោតិ ឧញ្ញាសិ, អបុច្ឆិត្វាន សម្ភវំ;

បុច្ឆិត្វា សម្ភវំ ជញ្ញា, អត្ថំ ធម្មញ្ច ព្រាហ្មណ.

១៧០. ស្វាធិប្បាគា ភារទ្វាជោ, សម្ភវស្ស ឧបន្តិកំ;

តមទ្ទស មហាព្រហ្មា, កីឡមានំ ពហីបុរេ.

១៧១. រញ្ញោហំ បហិតោ ទូតោ, កោរព្យស្ស យសស្សិនោ;

‘‘អត្ថំ ធម្មញ្ច បុច្ឆេសិ’’, ឥច្ចព្រវិ យុធិដ្ឋិលោ;

តំ ត្វំ អត្ថញ្ច ធម្មញ្ច, សម្ភវក្ខាហិ បុច្ឆិតោ.

១៧២. តគ្ឃ តេ អហមក្ខិស្សំ, យថាបិ កុសលោ តថា;

រាជា ច ខោ តំ ជានាតិ, យទិ កាហតិ វា ន វា.

១៧៣. ‘‘អជ្ជ សុវេ’’តិ សំសេយ្យ, រញ្ញា បុដ្ឋោ សុចីរត;

មា កត្វា អវសី រាជា, អត្ថេ ជាតេ យុធិដ្ឋិលោ.

១៧៤. អជ្ឈត្តញ្ញេវ សំសេយ្យ, រញ្ញា បុដ្ឋោ សុចីរត;

កុម្មគ្គំ ន និវេសេយ្យ, យថា មូឡ្ហោ អចេតសោ [អចេតនោ (ក.)].

១៧៥. អត្តានំ នាតិវត្តេយ្យ, អធម្មំ ន សមាចរេ;

អតិត្ថេ នប្បតារេយ្យ, អនត្ថេ ន យុតោ សិយា.

១៧៦. យោ ច ឯតានិ ឋានានិ, កត្តុំ ជានាតិ ខត្តិយោ;

សទា សោ វឌ្ឍតេ រាជា, សុក្កបក្ខេវ ចន្ទិមា.

១៧៧. ញាតីនញ្ច បិយោ ហោតិ, មិត្តេសុ ច វិរោចតិ;

កាយស្ស ភេទា សប្បញ្ញោ, សគ្គំ សោ ឧបបជ្ជតីតិ.

សម្ភវជាតកំ បញ្ចមំ.