៥១៤. ឆទ្ទន្តជាតកំ (៤)

៩៧. កិំ នុ សោចសិនុច្ចង្គិ, បណ្ឌូសិ វរវណ្ណិនិ;

មិលាយសិ វិសាលក្ខិ, មាលាវ បរិមទ្ទិតា.

៩៨. ទោហឡោ មេ មហារាជ, សុបិនន្តេនុបជ្ឈគា [នុ’បច្ចគា (សី. ស្យា. បី.)];

ន សោ សុលភរូបោវ, យាទិសោ មម ទោហឡោ.

៩៩. យេ កេចិ មានុសា កាមា, ឥធ លោកស្មិ នន្ទនេ;

សព្ពេ តេ បចុរា មយ្ហំ, អហំ តេ ទម្មិ ទោហឡំ.

១០០. លុទ្ទា ទេវ សមាយន្តុ, យេ កេចិ វិជិតេ តវ;

ឯតេសំ អហមក្ខិស្សំ, យាទិសោ មម ទោហឡោ.

១០១. ឥមេ តេ លុទ្ទកា ទេវិ, កតហត្ថា វិសារទា;

វនញ្ញូ ច មិគញ្ញូ ច, មមត្ថេ [មម តេ (បី.)] ចត្តជីវិតា.

១០២. លុទ្ទបុត្តា និសាមេថ, យាវន្តេត្ថ សមាគតា;

ឆព្ពិសាណំ គជំ សេតំ, អទ្ទសំ សុបិនេ អហំ;

តស្ស ទន្តេហិ មេ អត្ថោ, អលាភេ នត្ថិ ជីវិតំ.

១០៣. ន នោ បិតូនំ ន បិតាមហានំ, ទិដ្ឋោ សុតោ កុញ្ជរោ ឆព្ពិសាណោ;

យមទ្ទសា សុបិនេ រាជបុត្តី, អក្ខាហិ នោ យាទិសោ ហត្ថិនាគោ.

១០៤. ទិសា ចតស្សោ វិទិសា ចតស្សោ, ឧទ្ធំ អធោ ទស ទិសា ឥមាយោ;

កតមំ ទិសំ តិដ្ឋតិ នាគរាជា, យមទ្ទសា សុបិនេ ឆព្ពិសាណំ.

១០៥. ឥតោ ឧជុំ ឧត្តរិយំ ទិសាយំ, អតិក្កម្ម សោ សត្តគិរី ព្រហន្តេ;

សុវណ្ណបស្សោ នាម គិរី ឧឡារោ, សុបុប្ផិតោ [សម្បុប្ផិតោ (ស្យា.)] កិម្បុរិសានុចិណ្ណោ.

១០៦. អារុយ្ហ សេលំ ភវនំ កិន្នរានំ, ឱលោកយ បព្ពតបាទមូលំ;

អថ ទក្ខសី មេឃសមានវណ្ណំ, និគ្រោធរាជំ អថ សហស្សបាទំ [បោរំ (ក.)].

១០៧. តត្ថច្ឆតី កុញ្ជរោ ឆព្ពិសាណោ, សព្ពសេតោ ទុប្បសហោ បរេភិ;

រក្ខន្តិ នំ អដ្ឋសហស្សនាគា, ឦសាទន្តា វាតជវប្បហារិនោ.

១០៨. តិដ្ឋន្តិ តេ តុមូលំ [តុមូល (ស្យា.), ភិមូល (បី. ក.)] បស្សសន្តា, កុប្បន្តិ វាតស្សបិ ឯរិតស្ស;

មនុស្សភូតំ បន តត្ថ ទិស្វា, ភស្មំ ករេយ្យុំ នាស្ស រជោបិ តស្ស.

១០៩. ពហូ ហិមេ រាជកុលម្ហិ សន្តិ, បិឡន្ធនា ជាតរូបស្ស ទេវី;

មុត្តាមណីវេឡុរិយាមយា ច, កិំ កាហសិ ទន្តបិឡន្ធនេន;

មារេតុកាមា កុញ្ជរំ ឆព្ពិសាណំ, ឧទាហុ ឃាតេស្សសិ លុទ្ទបុត្តេ.

១១០. សា ឥស្សិតា ទុក្ខិតា ចស្មិ លុទ្ទ, ឧទ្ធញ្ច សុស្សាមិ អនុស្សរន្តី;

ករោហិ មេ លុទ្ទក ឯតមត្ថំ, ទស្សាមិ តេ គាមវរានិ បញ្ច.

១១១. កត្ថច្ឆតី កត្ថមុបេតិ ឋានំ, វីថិស្ស កា ន្ហាន [នហាន (សី. បី.)] គតស្ស ហោតិ;

កថញ្ហិ សោ ន្ហាយតិ [នហាយតិ (សី. បី.)] នាគរាជា, កថំ វិជានេមុ គតិំ គជស្ស.

១១២. តត្ថេវ សា បោក្ខរណី អទូរេ [អវិទូរេ (ស្យា. ក.)], រម្មា សុតិត្ថា ច មហោទិកា [មហោទកា (ស្យា. ក.)] ច;

សម្បុប្ផិតា ភមរគណានុចិណ្ណា [កិណ្ណា (កត្ថចិ)], ឯត្ថ ហិ សោ ន្ហាយតិ នាគរាជា.

១១៣. សីសំ នហាតុប្បល [នហាតោ ឧប្បល (សី. ស្យា. បី.)] មាលភារី, សព្ពសេតោ បុណ្ឌរីកត្តចង្គី;

អាមោទមានោ គច្ឆតិ សន្និកេតំ, បុរក្ខត្វា មហេសិំ សព្ពភទ្ទំ.

១១៤. តត្ថេវ សោ ឧគ្គហេត្វាន វាក្យំ, អាទាយ តូណិញ្ច ធនុញ្ច លុទ្ទោ;

វិតុរិយតិ [វិតុរិយ សោ (សី. អដ្ឋ.)] សត្តគិរី ព្រហន្តេ, សុវណ្ណបស្សំ នាម គិរិំ ឧឡារំ.

១១៥. អារុយ្ហ សេលំ ភវនំ កិន្នរានំ, ឱលោកយី បព្ពតបាទមូលំ;

តត្ថទ្ទសា មេឃសមានវណ្ណំ, និគ្រោធរាជំ អដ្ឋសហស្សបាទំ.

១១៦. តត្ថទ្ទសា កុញ្ជរំ ឆព្ពិសាណំ, សព្ពសេតំ ទុប្បសហំ បរេភិ;

រក្ខន្តិ នំ អដ្ឋសហស្សនាគា, ឦសាទន្តា វាតជវប្បហារិនោ.

១១៧. តត្ថទ្ទសា បោក្ខរណិំ អទូរេ, រម្មំ សុតិត្ថញ្ច មហោទិកញ្ច;

សម្បុប្ផិតំ ភមរគណានុចិណ្ណំ, យត្ថ ហិ សោ ន្ហាយតិ នាគរាជា.

១១៨. ទិស្វាន នាគស្ស គតិំ ឋិតិញ្ច, វីថិស្ស យា ន្ហានគតស្ស ហោតិ;

ឱបាតមាគច្ឆិ អនរិយរូបោ, បយោជិតោ ចិត្តវសានុគាយ.

១១៩. ខណិត្វាន កាសុំ ផលកេហិ ឆាទយិ, អត្តានមោធាយ ធនុញ្ច លុទ្ទោ;

បស្សាគតំ បុថុសល្លេន នាគំ, សមប្បយី ទុក្កដកម្មការី.

១២០. វិទ្ធោ ច នាគោ កោញ្ចមនាទិ ឃោរំ, សព្ពេ ច [សព្ពេវ (សី. ស្យា. បី.)] នាគា និន្នទុំ [និន្នាទុ (ស្យា.), និន្នាទំ (ក.)] ឃោររូបំ;

តិណញ្ច កដ្ឋញ្ច រណំ [ចុណ្ណំ (ក. សី. បី.)] ករោន្តា, ធាវិំសុ តេ អដ្ឋទិសា សមន្តតោ.

១២១. វធិស្សមេតន្តិ [វធិស្សមេនន្តិ (ស្យា.)] បរាមសន្តោ, កាសាវមទ្ទក្ខិ ធជំ ឥសីនំ;

ទុក្ខេន ផុដ្ឋស្សុទបាទិ សញ្ញា, អរហទ្ធជោ សព្ភិ អវជ្ឈរូបោ.

១២២. អនិក្កសាវោ កាសាវំ, យោ វត្ថំ បរិទហិស្សតិ [បរិទហេស្សតិ (សី. បី.), បរិធស្សតិ (កត្ថចិ)];

អបេតោ ទមសច្ចេន, ន សោ កាសាវមរហតិ.

១២៣. យោ ច វន្តកសាវស្ស, សីលេសុ សុសមាហិតោ;

ឧបេតោ ទមសច្ចេន, ស វេ កាសាវមរហតិ.

១២៤. សមប្បិតោ បុថុសល្លេន នាគោ, អទុដ្ឋចិត្តោ លុទ្ទកមជ្ឈភាសិ;

កិមត្ថយំ កិស្ស វា សម្ម ហេតុ, មមំ វធី កស្ស វាយំ បយោគោ.

១២៥. កាសិស្ស រញ្ញោ មហេសី ភទន្តេ, សា បូជិតា រាជកុលេ សុភទ្ទា;

តំ អទ្ទសា សា ច មមំ អសំសិ, ទន្តេហិ អត្ថោតិ ច មំ [អត្ថោតិ មមំ (ស្យា. ក.)] អវោច.

១២៦. ពហូ ហិ មេ ទន្តយុគា ឧឡារា, យេ មេ បិតូនញ្ច [បិតុន្នម្បិ (បី.)] បិតាមហានំ;

ជានាតិ សា កោធនា រាជបុត្តី, វធត្ថិកា វេរមកាសិ ពាលា.

១២៧. ឧដ្ឋេហិ ត្វំ លុទ្ទ ខរំ គហេត្វា, ទន្តេ ឥមេ ឆិន្ទ បុរា មរាមិ;

វជ្ជាសិ តំ កោធនំ រាជបុត្តិំ, ‘‘នាគោ ហតោ ហន្ទ ឥមស្ស ទន្តា’’.

១២៨. ឧដ្ឋាយ សោ លុទ្ទោ ខរំ គហេត្វា, ឆេត្វាន ទន្តានិ គជុត្តមស្ស;

វគ្គូ សុភេ អប្បដិមេ បថព្យា, អាទាយ បក្កាមិ តតោ ហិ ខិប្បំ.

១២៩. ភយដ្ដិតា [ភយទ្ទិតា (សី. បី.)] នាគវធេន អដ្ដា, យេ តេ នាគា អដ្ឋ ទិសា វិធាវុំ;

អទិស្វាន [អទិស្វ (សី. បី.)] បោសំ គជបច្ចមិត្តំ, បច្ចាគមុំ យេន សោ នាគរាជា.

១៣០. តេ តត្ថ កន្ទិត្វា រោទិត្វាន [រោទិត្វ (សី. បី.)] នាគា, សីសេ សកេ បំសុកំ ឱកិរិត្វា;

អគមំសុ តេ សព្ពេ សកំ និកេតំ, បុរក្ខត្វា មហេសិំ សព្ពភទ្ទំ.

១៣១. អាទាយ ទន្តានិ គជុត្តមស្ស, វគ្គូ សុភេ អប្បដិមេ បថព្យា;

សុវណ្ណរាជីហិ សមន្តមោទរេ, សោ លុទ្ទកោ កាសិបុរំ ឧបាគមិ;

ឧបនេសិ សោ រាជកញ្ញាយ ទន្តេ, នាគោ ហតោ ហន្ទ ឥមស្ស ទន្តា.

១៣២. ទិស្វាន ទន្តានិ គជុត្តមស្ស, ភត្តុប្បិយស្ស បុរិមាយ ជាតិយា;

តត្ថេវ តស្សា ហទយំ អផាលិ, តេនេវ សា កាលមកាសិ ពាលា.

១៣៣. សម្ពោធិបត្តោ ស [ច (សី. ស្យា.), វ (បី.)] មហានុភាវោ, សិតំ អកាសិ បរិសាយ មជ្ឈេ;

បុច្ឆិំសុ ភិក្ខូ សុវិមុត្តចិត្តា, នាការណេ បាតុករោន្តិ ពុទ្ធា.

១៣៤. យមទ្ទសាថ ទហរិំ កុមារិំ, កាសាយវត្ថំ អនគារិយំ ចរន្តិំ;

សា ខោ តទា រាជកញ្ញា អហោសិ, អហំ តទា នាគរាជា អហោសិំ.

១៣៥. អាទាយ ទន្តានិ គជុត្តមស្ស, វគ្គូ សុភេ អប្បដិមេ បថព្យា;

យោ លុទ្ទកោ កាសិបុរំ ឧបាគមិ, សោ ខោ តទា ទេវទត្តោ អហោសិ.

១៣៦. អនាវសូរំ ចិររត្តសំសិតំ, ឧច្ចាវចំ [ឧចំ នីចំ (សី. ស្យា. បី.)] ចរិតមិទំ បុរាណំ;

វីតទ្ទរោ វីតសោកោ វិសល្លោ, សយំ អភិញ្ញាយ អភាសិ ពុទ្ធោ.

១៣៧. អហំ វោ តេន កាលេន, អហោសិំ តត្ថ ភិក្ខវោ;

នាគរាជា តទា ហោមិ [ហោសិំ (សី. ស្យា. បី.)], ឯវំ ធារេថ ជាតកន្តិ.

ឆទ្ទន្តជាតកំ ចតុត្ថំ.