៥១៣. ជយទ្ទិសជាតកំ (៣)

៦៤. ចិរស្សំ វត មេ ឧទបាទិ អជ្ជ, ភក្ខោ មហា សត្តមិភត្តកាលេ;

កុតោសិ កោ វាសិ តទិង្ឃ ព្រូហិ, អាចិក្ខ ជាតិំ វិទិតោ យថាសិ.

៦៥. បញ្ចាលរាជា មិគវំ បវិដ្ឋោ, ជយទ្ទិសោ នាម យទិស្សុតោ តេ;

ចរាមិ កច្ឆានិ វនានិ ចាហំ, បសទំ ឥមំ ខាទ មមជ្ជ មុញ្ច.

៦៦. សេនេវ ត្វំ បណសិ សស្សមានោ [សយ្ហមានោ (ស្យា. ក.)], មមេស ភក្ខោ បសទោ យំ វទេសិ;

តំ ខាទិយាន បសទំ ជិឃញ្ញំ [ជិឃច្ឆំ (?)], ខាទិស្សំ បច្ឆា ន វិលាបកាលោ.

៦៧. ន ចត្ថិ មោក្ខោ មម និក្កយេន [វិក្កយេន (សី.)], គន្ត្វាន បច្ចាគមនាយ បណ្ហេ;

តំ សង្ករំ [សង្គរំ (សី. ស្យា. បី.)] ព្រាហ្មណស្សប្បទាយ, សច្ចានុរក្ខី បុនរាវជិស្សំ.

៦៨. កិំ កម្មជាតំ អនុតប្បតេ ត្វំ [អនុតប្បតី តំ (សី. បី.)], បត្តំ សមីបំ មរណស្ស រាជ;

អាចិក្ខ មេ តំ អបិ សក្កុណេមុ, អនុជានិតុំ អាគមនាយ បណ្ហេ.

៦៩. កតា មយា ព្រាហ្មណស្ស ធនាសា, តំ សង្ករំ បដិមុក្កំ ន មុត្តំ;

តំ សង្ករំ ព្រាហ្មណស្សប្បទាយ, សច្ចានុរក្ខី បុនរាវជិស្សំ.

៧០. យា តេ កតា ព្រាហ្មណស្ស ធនាសា, តំ សង្ករំ បដិមុក្កំ ន មុត្តំ;

តំ សង្ករំ ព្រាហ្មណស្សប្បទាយ, សច្ចានុរក្ខី បុនរាវជស្សុ.

៧១. មុត្តោ ច សោ បោរិសាទស្ស [បុរិសាទស្ស (បី.)] ហត្ថា, គន្ត្វា សកំ មន្ទិរំ កាមកាមី;

តំ សង្ករំ ព្រាហ្មណស្សប្បទាយ, អាមន្តយី បុត្តមលីនសត្តំ [សត្តុំ (ស្យា. បី. ក.)].

៧២. អជ្ជេវ រជ្ជំ អភិសិញ្ចយស្សុ, ធម្មំ ចរ សេសុ បរេសុ ចាបិ;

អធម្មការោ ច តេ មាហុ រដ្ឋេ, គច្ឆាមហំ បោរិសាទស្ស ញត្តេ [ញន្តេ (ស្យា.)].

៧៣. កិំ កម្ម កុព្ពំ តវ ទេវ បាវ [ទេវបាទេ (សី. ស្យា. បី.)], នារាធយី តំ តទិច្ឆាមិ សោតុំ;

យមជ្ជ រជ្ជម្ហិ ឧទស្សយេ តុវំ, រជ្ជម្បិ និច្ឆេយ្យំ តយា វិនាហំ.

៧៤. ន កម្មុនា វា វចសា វ តាត, អបរាធិតោហំ តុវិយំ សរាមិ;

សន្ធិញ្ច [សទ្ធិំ ច (ក.)] កត្វា បុរិសាទកេន, សច្ចានុរក្ខី បុនាហំ គមិស្សំ.

៧៥. អហំ គមិស្សាមិ ឥធេវ ហោហិ, នត្ថិ តតោ ជីវតោ វិប្បមោក្ខោ;

សចេ តុវំ គច្ឆសិយេវ រាជ, អហម្បិ គច្ឆាមិ ឧភោ ន ហោម.

៧៦. អទ្ធា ហិ តាត សតានេស ធម្មោ, មរណា ច មេ ទុក្ខតរំ តទស្ស;

កម្មាសបាទោ តំ យទា បចិត្វា, បសយ្ហ ខាទេ ភិទា រុក្ខសូលេ.

៧៧. បាណេន តេ បាណមហំ និមិស្សំ, មា ត្វំ អគា បោរិសាទស្ស ញត្តេ;

ឯតញ្ច តេ បាណមហំ និមិស្សំ, តស្មា មតំ ជីវិតស្ស វណ្ណេមិ [វរេមិ (សី.)].

៧៨. តតោ ហវេ ធិតិមា រាជបុត្តោ, វន្ទិត្វា មាតុ ច បិតុ ច [វន្ទិត្ថ មាតុច្ច បិតុច្ច (សី. បី.)] បាទេ;

ទុខិនិស្ស មាតា និបតា [និបតី (សី. បី.)] បថព្យា, បិតាស្ស បគ្គយ្ហ ភុជានិ កន្ទតិ.

៧៩. តំ គច្ឆន្តំ តាវ បិតា វិទិត្វា, បរម្មុខោ វន្ទតិ បញ្ជលីកោ;

សោមោ ច រាជា វរុណោ ច រាជា, បជាបតី ចន្ទិមា សូរិយោ ច;

ឯតេហិ គុត្តោ បុរិសាទកម្ហា, អនុញ្ញាតោ សោត្ថិ បច្ចេហិ តាត.

៨០. យំ ទណ្ឌកិរញ្ញោ គតស្ស [យំ ទណ្ឌការញ្ញគតស្ស (បី.)] មាតា, រាមស្សកាសិ សោត្ថានំ សុគុត្តា;

តំ តេ អហំ សោត្ថានំ ករោមិ, ឯតេន សច្ចេន សរន្តុ ទេវា;

អនុញ្ញាតោ សោត្ថិ បច្ចេហិ បុត្ត.

៨១. អាវី រហោ វាបី មនោបទោសំ, នាហំ សរេ ជាតុ មលីនសត្តេ;

ឯតេន សច្ចេន សរន្តុ ទេវា, អនុញ្ញាតោ សោត្ថិ បច្ចេហិ ភាតិក [ភាត (សី.), ភាតា (ស្យា. បី.)].

៨២. យស្មា ច មេ អនធិមនោសិ សាមិ, ន ចាបិ មេ មនសា អប្បិយោសិ;

ឯតេន សច្ចេន សរន្តុ ទេវា, អនុញ្ញាតោ សោត្ថិ បច្ចេហិ សាមិ.

៨៣. ព្រហា ឧជូ ចារុមុខោ កុតោសិ, ន មំ បជានាសិ វនេ វសន្តំ;

លុទ្ទំ មំ ញត្វា ‘‘បុរិសាទកោ’’តិ, កោ សោត្ថិ មាជានមិធា’វជេយ្យ.

៨៤. ជានាមិ លុទ្ទ បុរិសាទកោ ត្វំ, ន តំ ន ជានាមិ វនេ វសន្តំ;

អហញ្ច បុត្តោស្មិ ជយទ្ទិសស្ស, មមជ្ជ ខាទ បិតុនោ បមោក្ខា.

៨៥. ជានាមិ បុត្តោតិ [បុត្តោសិ (ស្យា. ក.)] ជយទ្ទិសស្ស, តថា ហិ វោ មុខវណ្ណោ ឧភិន្នំ;

សុទុក្ករញ្ញេវ [សុទុក្ករញ្ចេវ (ស្យា. បី. ក.)] កតំ តវេទំ, យោ មត្តុមិច្ឆេ បិតុនោ បមោក្ខា.

៨៦. ន ទុក្ករំ កិញ្ចិ មហេត្ថ មញ្ញេ, យោ មត្តុមិច្ឆេ បិតុនោ បមោក្ខា;

មាតុ ច [មាតុច្ច (សី.)] ហេតុ បរលោក គន្ត្វា [គម្យា (សី. ស្យា.), គម្យ (បី.)], សុខេន សគ្គេន ច សម្បយុត្តោ.

៨៧. អហញ្ច ខោ អត្តនោ បាបកិរិយំ, អាវី រហោ វាបិ សរេ ន ជាតុ;

សង្ខាតជាតីមរណោហមស្មិ, យថេវ មេ ឥធ តថា បរត្ថ.

៨៨. ខាទជ្ជ មំ ទានិ មហានុភាវ, ករស្សុ កិច្ចានិ ឥមំ សរីរំ;

រុក្ខស្ស វា តេ បបតាមិ អគ្គា, ឆាទយមានោ មយ្ហំ ត្វមទេសិ មំសំ.

៨៩. ឥទញ្ច តេ រុច្ចតិ រាជបុត្ត, ចជេសិ [ចជាសិ (សី. បី.)] បាណំ បិតុនោ បមោក្ខា;

តស្មា ហិ សោ [តស្មាតិហ (សី. ស្យា.)] ត្វំ តរមានរូបោ, សម្ភញ្ជ កដ្ឋានិ ជលេហិ អគ្គិំ.

៩០. តតោ ហវេ ធិតិមា រាជបុត្តោ, ទារុំ សមាហត្វា មហន្តមគ្គិំ;

សន្ទីបយិត្វា បដិវេទយិត្ថ, អាទីបិតោ ទានិ មហាយមគ្គិ [មយា យក្ខមគ្គិ (ក.)].

៩១. ខាទជ្ជ មំ ទានិ បសយ្ហការី, កិំ មំ មុហុំ បេក្ខសិ ហដ្ឋលោមោ;

តថា តថា តុយ្ហមហំ ករោមិ, យថា យថា មំ ឆាទយមានោ អទេសិ.

៩២. កោ តាទិសំ អរហតិ ខាទិតាយេ, ធម្មេ ឋិតំ សច្ចវាទិំ វទញ្ញុំ;

មុទ្ធាបិ តស្ស វិផលេយ្យ សត្តធា, យោ តាទិសំ សច្ចវាទិំ អទេយ្យ.

៩៣. ឥទញ្ហិ សោ ព្រាហ្មណំ មញ្ញមានោ, សសោ អវាសេសិ សកេ សរីរេ;

តេនេវ សោ ចន្ទិមា ទេវបុត្តោ, សសត្ថុតោ [សសដ្ឋកោ (ស្យា.)] កាមទុហជ្ជ [កាមរុហជ្ជ (ក.)] យក្ខ.

៩៤. ចន្ទោ យថា រាហុមុខា បមុត្តោ, វិរោចតេ បន្នរសេវ ភាណុមា [ភានុមា (សី. បី.)];

ឯវំ តុវំ បោរិសាទា បមុត្តោ, វិរោច កបិលេ [កម្បិល្ល (សី. បី.), កបិល្លេ (ស្យា.)] មហានុភាវ;

អាមោទយំ បិតរំ មាតរញ្ច, សព្ពោ ច តេ នន្ទតុ ញាតិបក្ខោ.

៩៥. តតោ ហវេ ធិតិមា រាជបុត្តោ, កតញ្ជលី បរិយាយ [បរិយគា (សី.), បគ្គយ្ហ (ស្យា. បី.)] បោរិសាទំ;

អនុញ្ញាតោ សោត្ថិ សុខី អរោគោ, បច្ចាគមា [បច្ចាគ (បី.)] កបិលមលីនសត្តា [កម្បិល្ល’មលីនសត្តោ (សី. បី.), កបិល’មលីនសត្តា (ក.)].

៩៦. តំ នេគមា ជានបទា ច សព្ពេ, ហត្ថារោហា រថិកា បត្តិកា ច;

នមស្សមានា បញ្ជលិកា ឧបាគមុំ, នមត្ថុ តេ ទុក្ករការកោសីតិ.

ជយទ្ទិសជាតកំ [ជយទិសជាតកំ (ក.)] តតិយំ.