៥១០. អយោឃរជាតកំ (១៤)

៣៦៣. យមេករត្តិំ បឋមំ, គព្ភេ វសតិ មាណវោ;

អព្ភុដ្ឋិតោវ សោ យាតិ [សយតិ (សី. បី.), ស យាតិ (កត្ថចិ)], សគច្ឆំ ន និវត្តតិ.

៣៦៤. ន យុជ្ឈមានា ន ពលេនវស្សិតា, នរា ន ជីរន្តិ ន ចាបិ មិយ្យរេ;

សព្ពំ ហិទំ [ហិ តំ (សី. បី.)] ជាតិជរាយុបទ្ទុតំ, តំ មេ មតី ហោតិ ចរាមិ ធម្មំ.

៣៦៥. ចតុរង្គិនិំ សេនំ សុភិំសរូបំ, ជយន្តិ រដ្ឋាធិបតី បសយ្ហ;

ន មច្ចុនោ ជយិតុមុស្សហន្តិ, តំ មេ មតី ហោតិ ចរាមិ ធម្មំ.

៣៦៦. ហត្ថីហិ អស្សេហិ រថេហិ បត្តិភិ, បរិវារិតា មុច្ចរេ ឯកច្ចេយ្យា [ឯកចេយ្យា (សី. បី.)];

ន មច្ចុនោ [ន មច្ចុតោ (សី.)] មុច្ចិតុមុស្សហន្តិ, តំ មេ មតី ហោតិ ចរាមិ ធម្មំ.

៣៦៧. ហត្ថីហិ អស្សេហិ រថេហិ បត្តិភិ, សូរា [បុរា (ក.)] បភញ្ជន្តិ បធំសយន្តិ;

ន មច្ចុនោ ភញ្ជិតុមុស្សហន្តិ, តំ មេ មតី ហោតិ ចរាមិ ធម្មំ.

៣៦៨. មត្តា គជា ភិន្នគឡា [បភិន្នគលា (សី.)] បភិន្នា, នគរានិ មទ្ទន្តិ ជនំ ហនន្តិ;

ន មច្ចុនោ មទ្ទិតុមុស្សហន្តិ, តំ មេ មតី ហោតិ ចរាមិ ធម្មំ.

៣៦៩. ឥស្សាសិនោ កតហត្ថាបិ វីរា [វីរា (សី. បី.)], ទូរេបាតី [បតី (ក.)] អក្ខណវេធិនោបិ;

ន មច្ចុនោ វិជ្ឈិតុមុស្សហន្តិ, តំ មេ មតី ហោតិ ចរាមិ ធម្មំ.

៣៧០. សរានិ ខីយន្តិ សសេលកាននា, សព្ពំ ហិទំ [ហិ តំ (សី. បី.), បិតំ (ស្យា.)] ខីយតិ ទីឃមន្តរំ;

សព្ពំ ហិទំ [ហិ តំ (សី. បី.), បិតំ (ស្យា.)] ភញ្ជរេ កាលបរិយាយំ, តំ មេ មតី ហោតិ ចរាមិ ធម្មំ.

៣៧១. សព្ពេ សមេវំ ហិ នរាននារិនំ [នរានរីនំ (បី.), នារី នរានំ (ស្យា.), នរនារីនំ (ក.)], ចលាចលំ បាណភុនោធ ជីវិតំ;

បដោវ ធុត្តស្ស ទុមោវ កូលជោ, តំ មេ មតី ហោតិ ចរាមិ ធម្មំ.

៣៧២. ទុមប្ផលានេវ បតន្តិ មាណវា, ទហរា ច វុទ្ធា ច សរីរភេទា;

នារិយោ នរា មជ្ឈិមបោរិសា ច, តំ មេ មតី ហោតិ ចរាមិ ធម្មំ.

៣៧៣. នាយំ វយោ តារករាជសន្និភោ, យទព្ភតីតំ គតមេវ ទានិ តំ;

ជិណ្ណស្ស ហី នត្ថិ រតី កុតោ សុខំ, តំ មេ មតី ហោតិ ចរាមិ ធម្មំ.

៣៧៤. យក្ខា បិសាចា អថវាបិ បេតា, កុបិតាតេ [កុបិតាបិ តេ (សី. បី.)] អស្សសន្តិ មនុស្សេ;

ន មច្ចុនោ អស្សសិតុស្សហន្តិ, តំ មេ មតី ហោតិ ចរាមិ ធម្មំ.

៣៧៥. យក្ខេ បិសាចេ អថវាបិ បេតេ, កុបិតេបិ តេ និជ្ឈបនំ ករោន្តិ;

ន មច្ចុនោ និជ្ឈបនំ ករោន្តិ, តំ មេ មតី ហោតិ ចរាមិ ធម្មំ.

៣៧៦. អបរាធកេ ទូសកេ ហេឋកេ ច, រាជានោ ទណ្ឌេន្តិ វិទិត្វាន ទោសំ;

ន មច្ចុនោ ទណ្ឌយិតុស្សហន្តិ, តំ មេ មតី ហោតិ ចរាមិ ធម្មំ.

៣៧៧. អបរាធកា ទូសកា ហេដ្ឋកា ច, លភន្តិ តេ រាជិនោ និជ្ឈបេតុំ;

ន មច្ចុនោ និជ្ឈបនំ ករោន្តិ, តំ មេ មតី ហោតិ ចរាមិ ធម្មំ.

៣៧៨. ន ខត្តិយោតិ ន ច ព្រាហ្មណោតិ, ន អឌ្ឍកា ពលវា តេជវាបិ;

ន មច្ចុរាជស្ស អបេក្ខមត្ថិ, តំ មេ មតី ហោតិ ចរាមិ ធម្មំ.

៣៧៩. សីហា ច ព្យគ្ឃា ច អថោបិ ទីបិយោ, បសយ្ហ ខាទន្តិ វិប្ផន្ទមានំ;

ន មច្ចុនោ ខាទិតុមុស្សហន្តិ, តំ មេ មតី ហោតិ ចរាមិ ធម្មំ.

៣៨០. មាយាការា រង្គមជ្ឈេ ករោន្តា, មោហេន្តិ ចក្ខូនិ ជនស្ស តាវទេ;

ន មច្ចុនោ មោហយិតុស្សហន្តិ, តំ មេ មតី ហោតិ ចរាមិ ធម្មំ.

៣៨១. អាសីវិសា កុបិតា ឧគ្គតេជា, ឌំសន្តិ មារេន្តិបិ តេ មនុស្សេ;

ន មច្ចុនោ ឌំសិតុមុស្សហន្តិ, តំ មេ មតី ហោតិ ចរាមិ ធម្មំ.

៣៨២. អាសីវិសា កុបិតា យំ ឌំសន្តិ, តិកិច្ឆកា តេស វិសំ ហនន្តិ;

ន មច្ចុនោ ទដ្ឋវិសំ [ទដ្ឋស្ស វិសំ (ក.)] ហនន្តិ, តំ មេ មតី ហោតិ ចរាមិ ធម្មំ.

៣៨៣. ធម្មន្តរី វេត្តរណី [វេតរណី (សី. បី.)] ច ភោជោ, វិសានិ ហន្ត្វាន ភុជង្គមានំ;

សុយ្យន្តិ តេ កាលកតា តថេវ, តំ មេ មតី ហោតិ ចរាមិ ធម្មំ.

៣៨៤. វិជ្ជាធរា ឃោរមធីយមានា, អទស្សនំ ឱសធេហិ វជន្តិ;

ន មច្ចុរាជស្ស វជន្តទស្សនំ [វជន្តិ អទស្សនំ (ស្យា. ក.)], តំ មេ មតី ហោតិ ចរាមិ ធម្មំ.

៣៨៥. ធម្មោ ហវេ រក្ខតិ ធម្មចារិំ, ធម្មោ សុចិណ្ណោ សុខមាវហាតិ;

ឯសានិសំសោ ធម្មេ សុចិណ្ណេ, ន ទុគ្គតិំ គច្ឆតិ ធម្មចារី.

៣៨៦. ន ហិ ធម្មោ អធម្មោ ច, ឧភោ សមវិបាកិនោ;

អធម្មោ និរយំ នេតិ, ធម្មោ បាបេតិ សុគ្គតិន្តិ.

អយោឃរជាតកំ ចុទ្ទសមំ.

តស្សុទ្ទានំ –

មាតង្គ សម្ភូត សិវិ សិរិមន្តោ, រោហណ ហំស សត្តិគុម្ពោ ភល្លាតិយ;

សោមនស្ស ចម្បេយ្យ ព្រហ្ម បញ្ច-បណ្ឌិត ចិរស្សំវត អយោឃរាតិ.

វីសតិនិបាតំ និដ្ឋិតំ.