៥០៩. ហត្ថិបាលជាតកំ (១៣)

៣៣៧. ចិរស្សំ វត បស្សាម, ព្រាហ្មណំ ទេវវណ្ណិនំ;

មហាជដំ ខារិធរំ [ភារធរំ (បី.)], បង្កទន្តំ រជស្សិរំ.

៣៣៨. ចិរស្សំ វត បស្សាម, ឥសិំ ធម្មគុណេ រតំ;

កាសាយវត្ថវសនំ, វាកចីរំ បដិច្ឆទំ.

៣៣៩. អាសនំ ឧទកំ បជ្ជំ, បដិគណ្ហាតុ នោ ភវំ;

អគ្ឃេ ភវន្តំ បុច្ឆាម, អគ្ឃំ កុរុតុ នោ ភវំ.

៣៤០. អធិច្ច វេទេ បរិយេស វិត្តំ, បុត្តេ គហេ [គេហេ (សី. ស្យា. បី.)] តាត បតិដ្ឋបេត្វា;

គន្ធេ រសេ បច្ចនុភុយ្យ [បច្ចនុភោត្វ (ស្យា.), បច្ចនុភុត្វ (បី.)] សព្ពំ, អរញ្ញំ សាធុ មុនិ សោ បសត្ថោ.

៣៤១. វេទា ន សច្ចា ន ច វិត្តលាភោ, ន បុត្តលាភេន ជរំ វិហន្តិ;

គន្ធេ រសេ មុច្ចន [មុញ្ចន (សី. ក.)] មាហុ សន្តោ, សកម្មុនា [សកម្មនា (សី. បី.)] ហោតិ ផលូបបត្តិ.

៣៤២. អទ្ធា ហិ សច្ចំ វចនំ តវេតំ, សកម្មុនា ហោតិ ផលូបបត្តិ;

ជិណ្ណា ច មាតាបិតរោ តវីមេ [តវេមេ (សី.), តវ យិមេ (ស្យា. បី.)], បស្សេយ្យុំ តំ វស្សសតំ អរោគំ [អរោគ្យំ (ស្យា. ក.)].

៣៤៣. យស្សស្ស សក្ខី មរណេន រាជ, ជរាយ មេត្តី នរវីរសេដ្ឋ;

យោ ចាបិ ជញ្ញា ន មរិស្សំ កទាចិ, បស្សេយ្យុំ តំ វស្សសតំ អរោគំ.

៣៤៤. យថាបិ នាវំ បុរិសោ ទកម្ហិ, ឯរេតិ ចេ នំ ឧបនេតិ តីរំ;

ឯវម្បិ ព្យាធី សតតំ ជរា ច, ឧបនេតិ មច្ចំ [មច្ចុ (ស្យា. បី.)] វសមន្តកស្ស.

៣៤៥. បង្កោ ច កាមា បលិបោ ច កាមា, មនោហរា ទុត្តរា មច្ចុធេយ្យា;

ឯតស្មិំ បង្កេ បលិបេ ព្យសន្នា [វិសន្នា (ស្យា. ក.)], ហីនត្តរូបា ន តរន្តិ បារំ.

៣៤៦. អយំ បុរេ លុទ្ទមកាសិ កម្មំ, ស្វាយំ គហីតោ ន ហិ មោក្ខិតោ មេ;

ឱរុន្ធិយា នំ បរិរក្ខិស្សាមិ, មាយំ បុន លុទ្ទមកាសិ កម្មំ.

៣៤៧. គវំវ [គាវំវ (សី.)] នដ្ឋំ បុរិសោ យថា វនេ, អន្វេសតី [បរិយេសតី (សី. បី.)] រាជ អបស្សមានោ;

ឯវំ នដ្ឋោ ឯសុការី មមត្ថោ, សោហំ កថំ ន គវេសេយ្យំ រាជ.

៣៤៨. ហិយ្យោតិ ហិយ្យតិ [ហីយោតិ ហីយតិ (សី.)] បោសោ, បរេតិ បរិហាយតិ;

អនាគតំ នេតមត្ថីតិ ញត្វា, ឧប្បន្នឆន្ទំ កោ បនុទេយ្យ ធីរោ.

៣៤៩. បស្សាមិ វោហំ ទហរំ [ទហរី (ស្យា. បី. ក.)] កុមារិំ, មត្តូបមំ កេតកបុប្ផនេត្តំ;

អភុត្តភោគេ [អភុត្វ ភោគេ (ស្យា. ក. អដ្ឋ.), អភុត្វ ភោគេ (បី.), ភោគេ អតុត្វា (ក.)] បឋមេ វយស្មិំ, អាទាយ មច្ចុ វជតេ កុមារិំ.

៣៥០. យុវា សុជាតោ សុមុខោ សុទស្សនោ, សាមោ កុសុម្ភបរិកិណ្ណមស្សុ;

ហិត្វាន កាមេ បដិកច្ច [បដិគច្ច (សី.), បដិគច្ឆ (ស្យា. បី.)] គេហំ, អនុជាន មំ បព្ពជិស្សាមិ ទេវ.

៣៥១. សាខាហិ រុក្ខោ លភតេ សមញ្ញំ, បហីនសាខំ បន ខាណុមាហុ;

បហីនបុត្តស្ស មមជ្ជ ភោតិ, វាសេដ្ឋិ ភិក្ខាចរិយាយ កាលោ.

៣៥២. អឃស្មិ កោញ្ចាវ យថា ហិមច្ចយេ, កតានិ [តន្តានិ (សី. បី.)] ជាលានិ បទាលិយ [បទាលេយ្យ (សី.)] ហំសា;

គច្ឆន្តិ បុត្តា ច បតី ច មយ្ហំ, សាហំ កថំ នានុវជេ បជានំ.

៣៥៣. ឯតេ ភុត្វា វមិត្វា ច, បក្កមន្តិ វិហង្គមា;

យេ ច ភុត្វាន វមិំសុ, តេ មេ ហត្ថត្ត [ហត្ថត្ថ (សី. ស្យា. បី.)] មាគតា.

៣៥៤. អវមី ព្រាហ្មណោ កាមេ, សោ [តេ (សី. បី.)] ត្វំ បច្ចាវមិស្សសិ;

វន្តាទោ បុរិសោ រាជ, ន សោ ហោតិ បសំសិយោ.

៣៥៥. បង្កេ ច [បង្កេវ (សី. បី.)] បោសំ បលិបេ ព្យសន្នំ, ពលី យថា ទុព្ពលមុទ្ធរេយ្យ;

ឯវម្បិ មំ ត្វំ ឧទតារិ ភោតិ, បញ្ចាលិ គាថាហិ សុភាសិតាហិ.

៣៥៦. ឥទំ វត្វា មហារាជា, ឯសុការី ទិសម្បតិ;

រដ្ឋំ ហិត្វាន បព្ពជិ, នាគោ ឆេត្វាវ ពន្ធនំ.

៣៥៧. រាជា ច បព្ពជ្ជមរោចយិត្ថ, រដ្ឋំ បហាយ នរវីរសេដ្ឋោ;

តុវម្បិ នោ ហោតិ យថេវ រាជា, អម្ហេហិ គុត្តា អនុសាស រជ្ជំ.

៣៥៨. រាជា ច បព្ពជ្ជមរោចយិត្ថ, រដ្ឋំ បហាយ នរវីរសេដ្ឋោ;

អហម្បិ ឯកា [ឯកាវ (សី.)] ចរិស្សាមិ លោកេ, ហិត្វាន កាមានិ មនោរមានិ.

៣៥៩. រាជា ច បព្ពជ្ជមរោចយិត្ថ, រដ្ឋំ បហាយ នរវីរសេដ្ឋោ;

អហម្បិ ឯកា ចរិស្សាមិ លោកេ, ហិត្វាន កាមានិ យថោធិកានិ.

៣៦០. អច្ចេន្តិ កាលា តរយន្តិ រត្តិយោ, វយោគុណា អនុបុព្ពំ ជហន្តិ;

អហម្បិ ឯកា ចរិស្សាមិ លោកេ, ហិត្វាន កាមានិ មនោរមានិ.

៣៦១. អច្ចេន្តិ កាលា តរយន្តិ រត្តិយោ, វយោគុណា អនុបុព្ពំ ជហន្តិ;

អហម្បិ ឯកា ចរិស្សាមិ លោកេ, ហិត្វាន កាមានិ យថោធិកានិ.

៣៦២. អច្ចេន្តិ កាលា តរយន្តិ រត្តិយោ, វយោគុណា អនុបុព្ពំ ជហន្តិ;

អហម្បិ ឯកា ចរិស្សាមិ លោកេ, សីតិភូតា [សីតីភូតា (សី.)] សព្ពមតិច្ច សង្គន្តិ.

ហត្ថិបាលជាតកំ តេរសមំ.