៥០៨. បញ្ចបណ្ឌិតជាតកំ (១២)

៣១៥. បញ្ច បណ្ឌិតា សមាគតាត្ថ, បញ្ហា មេ បដិភាតិ តំ សុណាថ;

និន្ទិយមត្ថំ បសំសិយំ វា, កស្សេវាវិករេយ្យ [កស្ស វាវីករេយ្យ (ក.)] គុយ្ហមត្ថំ.

៣១៦. ត្វំ អាវិករោហិ ភូមិបាល, ភត្តា ភារសហោ តុវំ វទេ តំ;

តវ ឆន្ទរុចីនិ [ឆន្ទញ្ច រុចិញ្ច (សី. បី.)] សម្មសិត្វា, អថ វក្ខន្តិ ជនិន្ទ បញ្ច ធីរា.

៣១៧. យា សីលវតី អនញ្ញថេយ្យា [អនញ្ញធេយ្យា (សី. បី.)], ភត្តុច្ឆន្ទវសានុគា (បិយា) [( ) នត្ថិ សី. បី. បោត្ថកេសុ] មនាបា;

និន្ទិយមត្ថំ បសំសិយំ វា, ភរិយាយាវិករេយ្យ [ភរិយាយ វាវីករេយ្យ (ក.)] គុយ្ហមត្ថំ.

៣១៨. យោ កិច្ឆគតស្ស អាតុរស្ស, សរណំ ហោតិ គតី បរាយនញ្ច;

និន្ទិយមត្ថំ បសំសិយំ វា, សខិនោ វាវិករេយ្យ គុយ្ហមត្ថំ.

៣១៩. ជេដ្ឋោ [យោ ជេដ្ឋោ (ស្យា.)] អថ មជ្ឈិមោ កនិដ្ឋោ, យោ [សោ (សី. ស្យា. បី.)] ចេ សីលសមាហិតោ ឋិតត្តោ;

និន្ទិយមត្ថំ បសំសិយំ វា, ភាតុ វាវីករេយ្យ គុយ្ហមត្ថំ.

៣២០. យោ វេ បិតុហទយស្ស បទ្ធគូ [បត្ថគូ (ស្យា.), បត្តគូ (ក.)], អនុជាតោ បិតរំ អនោមបញ្ញោ;

និន្ទិយមត្ថំ បសំសិយំ វា, បុត្តស្សាវិករេយ្យ [បុត្តស្ស វាវីករេយ្យ (ក.)] គុយ្ហមត្ថំ.

៣២១. មាតា ទ្វិបទាជនិន្ទសេដ្ឋ, យា នំ [យោ តំ (សី. បី.)] បោសេតិ ឆន្ទសា បិយេន;

និន្ទិយមត្ថំ បសំសិយំ វា, មាតុយាវីករេយ្យ [មាតុយា វាវីករេយ្យ (ក.)] គុយ្ហមត្ថំ.

៣២២. គុយ្ហស្ស ហិ គុយ្ហមេវ សាធុ, ន ហិ គុយ្ហស្ស បសត្ថមាវិកម្មំ;

អនិប្ផន្នតា [អនិប្ផាទាយ (សី. បី.), អនិប្ផន្នតាយ (ស្យា.), អា និប្ផាទា (?)] សហេយ្យ ធីរោ, និប្ផន្នោវ [និប្ផន្នត្ថោ (សី. បី.), និប្ផន្នត្ថោវ (ស្យា.)] យថាសុខំ ភណេយ្យ.

៣២៣. កិំ ត្វំ វិមនោសិ រាជសេដ្ឋ, ទ្វិបទជនិន្ទ [ទិបទិន្ទ (សី. ស្យា. បី.)] វចនំ សុណោម មេតំ [នេតំ (សី. បី.), តេតំ (ស្យា.)];

កិំ ចិន្តយមានោ ទុម្មនោសិ, នូន ទេវ អបរាធោ អត្ថិ មយ្ហំ.

៣២៤. ‘‘បណ្ហេ [បញ្ញោ (សី. បី.), បញ្ហេ (ស្យា.), បន្ហេ (ក.)] វជ្ឈោ មហោសធោ’’តិ, អាណត្តោ មេ វធាយ ភូរិបញ្ញោ;

តំ ចិន្តយមានោ ទុម្មនោស្មិ, ន ហិ ទេវី អបរាធោ អត្ថិ តុយ្ហំ.

៣២៥. អភិទោសគតោ ទានិ ឯហិសិ, កិំ សុត្វា កិំ សង្កតេ មនោ តេ;

កោ តេ កិមវោច ភូរិបញ្ញ, ឥង្ឃ វចនំ សុណោម ព្រូហិ មេតំ.

៣២៦. ‘‘បណ្ហេ វជ្ឈោ មហោសធោ’’តិ, យទិ តេ មន្តយិតំ ជនិន្ទ ទោសំ;

ភរិយាយ រហោគតោ អសំសិ, គុយ្ហំ បាតុកតំ សុតំ មមេតំ.

៣២៧. យំ សាលវនស្មិំ សេនកោ, បាបកម្មំ អកាសិ អសព្ភិរូបំ;

សខិនោវ រហោគតោ អសំសិ, គុយ្ហំ បាតុកតំ សុតំ មមេតំ.

៣២៨. បុក្កុស [បក្កុស (ក.) ជា. ១.៧.៤១ បណ្ណជាតកេ បស្សិតព្ពំ] បុរិសស្ស តេ ជនិន្ទ, ឧប្បន្នោ រោគោ អរាជយុត្តោ;

ភាតុញ្ច [ភាតុច្ច (សី. បី.), ភាតុវ (ស្យា.)] រហោគតោ អសំសិ, គុយ្ហំ បាតុកតំ សុតំ មមេតំ.

៣២៩. អាពាធោយំ អសព្ភិរូបោ, កាមិន្ទោ [កាវិន្ទោ (សី. បី.)] នរទេវេន ផុដ្ឋោ;

បុត្តស្ស រហោគតោ អសំសិ, គុយ្ហំ បាតុកតំ សុតំ មមេតំ.

៣៣០. អដ្ឋវង្កំ មណិរតនំ ឧឡារំ, សក្កោ តេ អទទា បិតាមហស្ស;

ទេវិន្ទស្ស គតំ តទជ្ជ ហត្ថំ [ទេវិន្ទស្ស តទជ្ជ ហត្ថគតំ (ក.)], មាតុញ្ច រហោគតោ អសំសិ;

គុយ្ហំ បាតុកតំ សុតំ មមេតំ.

៣៣១. គុយ្ហស្ស ហិ គុយ្ហមេវ សាធុ, ន ហិ គុយ្ហស្ស បសត្ថមាវិកម្មំ;

អនិប្ផន្នតា សហេយ្យ ធីរោ, និប្ផន្នោវ យថាសុខំ ភណេយ្យ.

៣៣២. ន គុយ្ហមត្ថំ វិវរេយ្យ, រក្ខេយ្យ នំ យថា និធិំ;

ន ហិ បាតុកតោ សាធុ, គុយ្ហោ អត្ថោ បជានតា.

៣៣៣. ថិយា គុយ្ហំ ន សំសេយ្យ, អមិត្តស្ស ច បណ្ឌិតោ;

យោ ចាមិសេន សំហីរោ, ហទយត្ថេនោ ច យោ នរោ.

៣៣៤. គុយ្ហមត្ថំ អសម្ពុទ្ធំ, សម្ពោធយតិ យោ នរោ;

មន្តភេទភយា តស្ស, ទាសភូតោ តិតិក្ខតិ.

៣៣៥. យាវន្តោ បុរិសស្សត្ថំ, គុយ្ហំ ជានន្តិ មន្តិនំ;

តាវន្តោ តស្ស ឧព្ពេគា, តស្មា គុយ្ហំ ន វិស្សជេ.

៣៣៦. វិវិច្ច ភាសេយ្យ ទិវា រហស្សំ, រត្តិំ គិរំ នាតិវេលំ បមុញ្ចេ;

ឧបស្សុតិកា ហិ សុណន្តិ មន្តំ, តស្មា មន្តោ ខិប្បមុបេតិ ភេទន្តិ.

បញ្ចបណ្ឌិតជាតកំ ទ្វាទសមំ.