៥០៧. មហាបលោភនជាតកំ (១១)

២៨៤. ព្រហ្មលោកា ចវិត្វាន, ទេវបុត្តោ មហិទ្ធិកោ;

រញ្ញោ បុត្តោ ឧទបាទិ, សព្ពកាមសមិទ្ធិសុ.

២៨៥. កាមា វា កាមសញ្ញា វា, ព្រហ្មលោកេ ន វិជ្ជតិ;

ស្វាស្សុ [យ្វាស្ស (សី.)] តាយេវ សញ្ញាយ, កាមេហិ វិជិគុច្ឆថ.

២៨៦. តស្ស ចន្តេបុរេ អាសិ, ឈានាគារំ សុមាបិតំ;

សោ តត្ថ បដិសល្លីនោ [បដិសល្លានោ (ក.)], ឯកោ រហសិ ឈាយថ.

២៨៧. ស រាជា បរិទេវេសិ, បុត្តសោកេន អដ្ដិតោ;

ឯកបុត្តោ ចយំ មយ្ហំ, ន ច កាមានិ ភុញ្ជតិ.

២៨៨. កោ នុ ខ្វេត្ថ [ខេត្ថ (សី. បី.)] ឧបាយោ សោ, កោ វា ជានាតិ កិញ្ចនំ;

យោ [កោ (សី. បី.)] មេ បុត្តំ បលោភេយ្យ, យថា កាមានិ បត្ថយេ.

២៨៩. អហុ កុមារី តត្ថេវ, វណ្ណរូបសមាហិតា;

កុសលា នច្ចគីតស្ស, វាទិតេ ច បទក្ខិណា.

២៩០. សា តត្ថ ឧបសង្កម្ម, រាជានំ ឯតទព្រវិ;

អហំ ខោ នំ បលោភេយ្យំ, សចេ ភត្តា ភវិស្សតិ.

២៩១. តំ តថាវាទិនិំ រាជា, កុមារិំ ឯតទព្រវិ;

ត្វញ្ញេវ នំ បលោភេហិ, តវ ភត្តា ភវិស្សតិ.

២៩២. សា ច អន្តេបុរំ គន្ត្វា, ពហុំ កាមុបសំហិតំ;

ហទយង្គមា បេមនីយា, ចិត្រា គាថា អភាសថ.

២៩៣. តស្សា ច គាយមានាយ, សទ្ទំ សុត្វាន នារិយា;

កាមច្ឆន្ទស្ស ឧប្បជ្ជិ, ជនំ សោ បរិបុច្ឆថ.

២៩៤. កស្សេសោ សទ្ទោ កោ វា សោ, ភណតិ ឧច្ចាវចំ ពហុំ;

ហទយង្គមំ បេមនីយំ, អហោ [អថោ (សី. បី.)] កណ្ណសុខំ មម.

២៩៥. ឯសា ខោ បមទា ទេវ, ខិឌ្ឌា ឯសា អនប្បិកា [អនប្បកា (ក.)];

សចេ ត្វំ កាមេ ភុញ្ជេយ្យ, ភិយ្យោ ភិយ្យោ ឆាទេយ្យុ តំ.

២៩៦. ឥង្ឃ អាគច្ឆតោរេន [អាគច្ឆតោរេនំ (ក.) អាគច្ឆតុ + ឱរេន], អវិទូរម្ហិ គាយតុ;

អស្សមស្ស សមីបម្ហិ, សន្តិកេ មយ្ហំ គាយតុ.

២៩៧. តិរោកុដ្ដម្ហិ គាយិត្វា, ឈានាគារម្ហិ បាវិសិ;

ពន្ធិ នំ [ភន្ធិតុំ (ស្យា. ក.)] អនុបុព្ពេន, អារញ្ញមិវ កុញ្ជរំ.

២៩៨. តស្ស [តស្សា (ស្យា.)] កាមរសំ ញត្វា, ឥស្សាធម្មោ អជាយថ;

‘‘អហមេវ កាមេ ភុញ្ជេយ្យំ, មា អញ្ញោ បុរិសោ អហុ’’.

២៩៩. តតោ អសិំ គហេត្វាន, បុរិសេ ហន្តុំ ឧបក្កមិ;

អហមេវេកោ ភុញ្ជិស្សំ, មា អញ្ញោ បុរិសោ សិយា.

៣០០. តតោ ជានបទា សព្ពេ, វិក្កន្ទិំសុ សមាគតា;

បុត្តោ ត្យាយំ មហារាជ, ជនំ ហេឋេត្យទូសកំ.

៣០១. តញ្ច រាជា វិវាហេសិ [និវាហេសិ (ស្យា.), វិហាហេសិ (បី.)], សម្ហា រដ្ឋា ច [រដ្ឋាតោ (សី. បី.), រដ្ឋតោ (ក.)] ខត្តិយោ;

យាវតា វិជិតំ មយ្ហំ, ន តេ វត្ថព្ព [វត្តព្ព (សី. បី.)] តាវទេ.

៣០២. តតោ សោ ភរិយមាទាយ, សមុទ្ទំ ឧបសង្កមិ;

បណ្ណសាលំ ករិត្វាន, វនមុញ្ឆាយ បាវិសិ.

៣០៣. អថេត្ថ ឥសិ មាគច្ឆិ, សមុទ្ទំ ឧបរូបរិ;

សោ តស្ស គេហំ បាវេក្ខិ, ភត្តកាលេ ឧបដ្ឋិតេ.

៣០៤. តញ្ច ភរិយា បលោភេសិ, បស្ស យាវ សុទារុណំ;

ចុតោ សោ ព្រហ្មចរិយម្ហា, ឥទ្ធិយា បរិហាយថ.

៣០៥. រាជបុត្តោ ច ឧញ្ឆាតោ, វនមូលផលំ ពហុំ;

សាយំ កាជេន [កាចេន (បី.)] អាទាយ, អស្សមំ ឧបសង្កមិ.

៣០៦. ឥសី ច ខត្តិយំ ទិស្វា, សមុទ្ទំ ឧបសង្កមិ;

‘‘វេហាយសំ គមិស្ស’’ន្តិ, សីទតេ សោ មហណ្ណវេ.

៣០៧. ខត្តិយោ ច ឥសិំ ទិស្វា, សីទមានំ មហណ្ណវេ;

តស្សេវ អនុកម្បាយ, ឥមា គាថា អភាសថ.

៣០៨. អភិជ្ជមានេ វារិស្មិំ, សយំ អាគម្ម ឥទ្ធិយា;

មិស្សីភាវិត្ថិយា គន្ត្វា, សំសីទសិ មហណ្ណវេ.

៣០៩. អាវដ្ដនី មហាមាយា, ព្រហ្មចរិយវិកោបនា;

សីទន្តិ នំ វិទិត្វាន, អារកា បរិវជ្ជយេ.

៣១០. អនលា មុទុសម្ភាសា, ទុប្បូរា តា នទីសមា;

សីទន្តិ នំ វិទិត្វាន, អារកា បរិវជ្ជយេ.

៣១១. យំ ឯតា ឧបសេវន្តិ, ឆន្ទសា វា ធនេន វា;

ជាតវេទោវ សំ ឋានំ, ខិប្បំ អនុទហន្តិ នំ.

៣១២. ខត្តិយស្ស វចោ សុត្វា, ឥសិស្ស និព្ពិទា អហុ;

លទ្ធា បោរាណកំ មគ្គំ, គច្ឆតេ សោ វិហាយសំ.

៣១៣. ខត្តិយោ ច ឥសិំ ទិស្វា, គច្ឆមានំ វិហាយសំ;

សំវេគំ អលភី ធីរោ, បព្ពជ្ជំ សមរោចយិ.

៣១៤. តតោ សោ បព្ពជិត្វាន, កាមរាគំ វិរាជយិ;

កាមរាគំ វិរាជេត្វា, ព្រហ្មលោកូបគោ អហូតិ.

មហាបលោភនជាតកំ ឯកាទសមំ.