៥០៦. ចម្បេយ្យជាតកំ (១០)

២៤០. កា នុ វិជ្ជុរិវាភាសិ, ឱសធី វិយ តារកា;

ទេវតា នុសិ គន្ធព្ពី, ន តំ មញ្ញាមិ មានុសិំ [មានុសី (ស្យា. ក.)].

២៤១. នម្ហិ ទេវី ន គន្ធព្ពី, ន មហារាជ មានុសី;

នាគកញ្ញាស្មិ ភទ្ទន្តេ, អត្ថេនម្ហិ ឥធាគតា.

២៤២. វិព្ភន្តចិត្តា កុបិតិន្ទ្រិយាសិ, នេត្តេហិ តេ វារិគណា សវន្តិ;

កិំ តេ នដ្ឋំ កិំ បន បត្ថយានា, ឥធាគតា នារិ តទិង្ឃ ព្រូហិ.

២៤៣. យមុគ្គតេជោ ឧរគោតិ ចាហុ, នាគោតិ នំ អាហុ ជនា ជនិន្ទ;

តមគ្គហី បុរិសោ ជីវិកត្ថោ, តំ ពន្ធនា មុញ្ច បតី មមេសោ.

២៤៤. កថំ ន្វយំ ពលវិរិយូបបន្នោ, ហត្ថត្ត [ហត្ថត្ថ (សី. ស្យា. បី.)] មាគច្ឆិ វនិព្ពកស្ស;

អក្ខាហិ មេ នាគកញ្ញេ តមត្ថំ, កថំ វិជានេមុ គហីតនាគំ.

២៤៥. នគរម្បិ នាគោ ភស្មំ ករេយ្យ, តថា ហិ សោ ពលវិរិយូបបន្នោ;

ធម្មញ្ច នាគោ អបចាយមានោ, តស្មា បរក្កម្ម តបោ ករោតិ.

២៤៦. ចាតុទ្ទសិំ បញ្ចទសិំ [បន្នរសិំ (សី. ស្យា. បី.)] ច រាជ, ចតុប្បថេ សម្មតិ នាគរាជា;

តមគ្គហី បុរិសោ ជីវិកត្ថោ, តំ ពន្ធនា មុញ្ច បតី មមេសោ.

២៤៧. សោឡសិត្ថិសហស្សានិ, អាមុត្តមណិកុណ្ឌលា;

វារិគេហសយា នារី [នារិយោ (បី.)], តាបិ តំ សរណំ គតា.

២៤៨. ធម្មេន មោចេហិ អសាហសេន, គាមេន និក្ខេន គវំ សតេន;

ឱស្សដ្ឋកាយោ ឧរគោ ចរាតុ, បុញ្ញត្ថិកោ មុញ្ចតុ ពន្ធនស្មា.

២៤៩. ធម្មេន មោចេមិ អសាហសេន, គាមេន និក្ខេន គវំ សតេន;

ឱស្សដ្ឋកាយោ ឧរគោ ចរាតុ, បុញ្ញត្ថិកោ មុញ្ចតុ ពន្ធនស្មា.

២៥០. ទម្មិ និក្ខសតំ លុទ្ទ, ថូលញ្ច មណិកុណ្ឌលំ;

ចតុស្សទញ្ច បល្លង្កំ, ឧមាបុប្ផសរិន្និភំ.

២៥១. ទ្វេ ច សាទិសិយោ ភរិយា, ឧសភញ្ច គវំ សតំ;

ឱស្សដ្ឋកាយោ ឧរគោ ចរាតុ, បុញ្ញត្ថិកោ មុញ្ចតុ ពន្ធនស្មា.

២៥២. វិនាបិ ទានា តវ វចនំ ជនិន្ទ, មុញ្ចេមុ នំ ឧរគំ ពន្ធនស្មា;

ឱស្សដ្ឋកាយោ ឧរគោ ចរាតុ, បុញ្ញត្ថិកោ មុញ្ចតុ ពន្ធនស្មា.

២៥៣. មុត្តោ ចម្បេយ្យកោ នាគោ, រាជានំ ឯតទព្រវិ;

នមោ តេ កាសិរាជត្ថុ, នមោ តេ កាសិវឌ្ឍន;

អញ្ជលិំ តេ បគ្គណ្ហាមិ, បស្សេយ្យំ មេ និវេសនំ.

២៥៤. អទ្ធា ហិ ទុព្ពិស្សសមេតមាហុ, យំ មានុសោ វិស្សសេ អមានុសម្ហិ;

សចេ ច មំ យាចសិ ឯតមត្ថំ, ទក្ខេមុ តេ នាគ និវេសនានិ.

២៥៥. សចេបិ [សចេ ហិ (សី. បី. អដ្ឋ.)] វាតោ គិរិមាវហេយ្យ, ចន្ទោ ច សុរិយោ ច ឆមា បតេយ្យុំ;

សព្ពា ច នជ្ជោ បដិសោតំ វជេយ្យុំ, ន ត្វេវហំ រាជ មុសា ភណេយ្យំ.

២៥៦. នភំ ផលេយ្យ ឧទធីបិ សុស្សេ, សំវដ្ដយេ [សំវដ្ដេយំ (សី. បី.), សំវដ្ដេយ្យ (ស្យា. ក.)] ភូតធរា វសុន្ធរា;

សិលុច្ចយោ មេរុ សមូលមុប្បតេ [មុព្ពហេ (សី. ស្យា. បី. ក. អដ្ឋ.), មុដ្ឋហេ (ក.)], ន ត្វេវហំ រាជ មុសា ភណេយ្យំ.

២៥៧. អទ្ធា ហិ ទុព្ពិស្សសមេតមាហុ, យំ មានុសោ វិស្សសេ អមានុសម្ហិ;

សចេ ច មំ យាចសិ ឯតមត្ថំ, ទក្ខេមុ តេ នាគ និវេសនានិ.

២៥៨. តុម្ហេ ខោត្ថ ឃោរវិសា ឧឡារា, មហាតេជា ខិប្បកោបី ច ហោថ;

មំការណា [មម ការណា (សី. ស្យា. បី.)] ពន្ធនស្មា បមុត្តោ, អរហសិ នោ ជានិតុយេ [ជានិតាយេ (សី.), ជានិតវេ (ស្យា.), ជានិតយេ (បី.)] កតានិ.

២៥៩. សោ បច្ចតំ និរយេ ឃោររូបេ, មា កាយិកំ សាតមលត្ថ កិញ្ចិ;

បេឡាយ ពទ្ធោ មរណំ ឧបេតុ, យោ តាទិសំ កម្មកតំ ន ជានេ.

២៦០. សច្ចប្បដិញ្ញា តវមេស ហោតុ, អក្កោធនោ ហោហិ អនុបនាហី;

សព្ពញ្ច តេ នាគកុលំ សុបណ្ណា, អគ្គិំវ គិម្ហេសុ [គិម្ហាសុ (សី. ស្យា. បី.)] វិវជ្ជយន្តុ.

២៦១. អនុកម្បសី នាគកុលំ ជនិន្ទ, មាតា យថា សុប្បិយំ ឯកបុត្តំ;

អហញ្ច តេ នាគកុលេន សទ្ធិំ, កាហាមិ វេយ្យាវដិកំ ឧឡារំ.

២៦២. យោជេន្តុ វេ រាជរថេ សុចិត្តេ, កម្ពោជកេ អស្សតរេ សុទន្តេ;

នាគេ ច យោជេន្តុ សុវណ្ណកប្បនេ, ទក្ខេមុ នាគស្ស និវេសនានិ.

២៦៣. ភេរី មុទិង្គា [មុតិង្គា (សី. បី.)] បណវា ច សង្ខា, អវជ្ជយិំសុ ឧគ្គសេនស្ស រញ្ញោ;

បាយាសិ រាជា ពហុសោភមានោ, បុរក្ខតោ នារិគណស្ស មជ្ឈេ.

២៦៤. សុវណ្ណចិតកំ ភូមិំ, អទ្ទក្ខិ កាសិវឌ្ឍនោ;

សោវណ្ណមយបាសាទេ, វេឡុរិយផលកត្ថតេ.

២៦៥. ស រាជា បាវិសិ ព្យម្ហំ, ចម្បេយ្យស្ស និវេសនំ;

អាទិច្ចវណ្ណសន្និភំ, កំសវិជ្ជុ បភស្សរំ.

២៦៦. នានារុក្ខេហិ សញ្ឆន្នំ, នានាគន្ធសមីរិតំ;

សោ បាវេក្ខិ កាសិរាជា, ចម្បេយ្យស្ស និវេសនំ.

២៦៧. បវិដ្ឋស្មិំ កាសិរញ្ញេ, ចម្បេយ្យស្ស និវេសនំ;

ទិព្ពា តូរិយា បវជ្ជិំសុ, នាគកញ្ញា ច នច្ចិសុំ [នច្ចយុំ (សី. បី. ក.)].

២៦៨. តំ នាគកញ្ញា ចរិតំ គណេន, អន្វារុហី កាសិរាជា បសន្នោ;

និសីទិ សោវណ្ណមយម្ហិ បីឋេ, សាបស្សយេ [សោបស្សយេ (ក.)] ចន្ទនសារលិត្តេ.

២៦៩. សោ តត្ថ ភុត្វា ច អថោ រមិត្វា, ចម្បេយ្យកំ កាសិរាជា អវោច;

វិមានសេដ្ឋានិ ឥមានិ តុយ្ហំ, អាទិច្ចវណ្ណានិ បភស្សរានិ;

នេតាទិសំ អត្ថិ មនុស្សលោកេ, កិំ បត្ថយំ [កិមត្ថិយំ (សី. ស្យា. បី.)] នាគ តបោ ករោសិ.

២៧០. តា កម្ពុកាយូរធរា សុវត្ថា, វដ្ដង្គុលី តម្ពតលូបបន្នា;

បគ្គយ្ហ បាយេន្តិ អនោមវណ្ណា, នេតាទិសំ អត្ថិ មនុស្សលោកេ;

កិំ បត្ថយំ នាគ តបោ ករោសិ.

២៧១. នជ្ជោ ច តេមា បុថុលោមមច្ឆា, អាដា [អាទា (ស្យា.), អទា (បី.)] សកុន្តាភិរុទា សុតិត្ថា;

នេតាទិសំ អត្ថិ មនុស្សលោកេ, កិំ បត្ថយំ នាគ តបោ ករោសិ.

២៧២. កោញ្ចា មយូរា ទិវិយា ច ហំសា, វគ្គុស្សរា កោកិលា សម្បតន្តិ;

នេតាទិសំ អត្ថិ មនុស្សលោកេ, កិំ បត្ថយំ នាគ តបោ ករោសិ.

២៧៣. អម្ពា ច សាលា តិលកា ច ជម្ពុយោ, ឧទ្ទាលកា បាដលិយោ ច ផុល្លា;

នេតាទិសំ អត្ថិ មនុស្សលោកេ, កិំ បត្ថយំ នាគ តបោ ករោសិ.

២៧៤. ឥមា ច តេ បោក្ខរញ្ញោ សមន្តតោ, ទិព្ពា [ទិព្យា (ស្យា.), ទិវិយា (បី.)] ច គន្ធា សតតំ បវាយន្តិ;

នេតាទិសំ អត្ថិ មនុស្សលោកេ, កិំ បត្ថយំ នាគ តបោ ករោសិ.

២៧៥. ន បុត្តហេតុ ន ធនស្ស ហេតុ, ន អាយុនោ ចាបិ [វាបិ (សី. បី.)] ជនិន្ទ ហេតុ;

មនុស្សយោនិំ អភិបត្ថយានោ, តស្មា បរក្កម្ម តបោ ករោមិ.

២៧៦. ត្វំ លោហិតក្ខោ វិហតន្តរំសោ, អលង្កតោ កប្បិតកេសមស្សុ;

សុរោសិតោ លោហិតចន្ទនេន, គន្ធព្ពរាជាវ ទិសា បភាសសិ.

២៧៧. ទេវិទ្ធិបត្តោសិ មហានុភាវោ, សព្ពេហិ កាមេហិ សមង្គិភូតោ;

បុច្ឆាមិ តំ នាគរាជេតមត្ថំ, សេយ្យោ ឥតោ កេន មនុស្សលោកោ.

២៧៨. ជនិន្ទ នាញ្ញត្រ មនុស្សលោកា, សុទ្ធី វ សំវិជ្ជតិ សំយមោ វា;

អហញ្ច លទ្ធាន មនុស្សយោនិំ, កាហាមិ ជាតិមរណស្ស អន្តំ.

២៧៩. អទ្ធា ហវេ សេវិតព្ពា សបញ្ញា, ពហុស្សុតា យេ ពហុឋានចិន្តិនោ;

នារិយោ ច ទិស្វាន តុវញ្ច នាគ, កាហាមិ បុញ្ញានិ អនប្បកានិ.

២៨០. អទ្ធា ហវេ សេវិតព្ពា សបញ្ញា, ពហុស្សុតា យេ ពហុឋានចិន្តិនោ;

នារិយោ ច ទិស្វាន មមញ្ច រាជ, ករោហិ បុញ្ញានិ អនប្បកានិ.

២៨១. ឥទញ្ច មេ ជាតរូបំ បហូតំ, រាសី សុវណ្ណស្ស ច តាលមត្តា;

[ឥតោ ហរិត្វា សោវណ្ណឃរានិ ការយ, រូបិយស្ស ច បាការំ ករោន្តុ (សី. ស្យា.) ឥតោ ហរិត្វា សោវណ្ណឃរានិ, [ការយ] រូបិយស្ស ច បាការំ ករោន្តុ (បី.)] ឥតោ ហរិត្វាន សុវណ្ណឃរានិ, ករស្សុ រូបិយបាការំ ករោន្តុ [ឥតោ ហរិត្វា សោវណ្ណឃរានិ ការយ, រូបិយស្ស ច បាការំ ករោន្តុ (សី. ស្យា.) ឥតោ ហរិត្វា សោវណ្ណឃរានិ, [ការយ] រូបិយស្ស ច បាការំ ករោន្តុ (បី.)].

២៨២. មុត្តា ច [មុត្តានញ្ច (សី. ស្យា.)] វាហសហស្សានិ បញ្ច, វេឡុរិយមិស្សានិ ឥតោ ហរិត្វា;

អន្តេបុរេ ភូមិយំ សន្ថរន្តុ, និក្កទ្ទមា ហេហិតិ នីរជា ច.

២៨៣. ឯតាទិសំ អាវស រាជសេដ្ឋ, វិមានសេដ្ឋំ ពហុ សោភមានំ;

ពារាណសិំ នគរំ ឥទ្ធំ ផីតំ, រជ្ជញ្ច ការេហិ អនោមបញ្ញាតិ.

ចម្បេយ្យជាតកំ ទសមំ.