៥០៥. សោមនស្សជាតកំ (៩)

២១១. កោ តំ ហិំសតិ ហេឋេតិ, កិំ [កិន្នុ (បី. ក.)] ទុម្មនោ សោចសិ អប្បតីតោ;

កស្សជ្ជ មាតាបិតរោ រុទន្តុ, ក្វជ្ជ សេតុ [កោ ន្វេជ្ជ សេតិ (ក.), កោ អជ្ជ សេតុ (?)] និហតោ បថព្យា.

២១២. តុដ្ឋោស្មិ ទេវ តវ ទស្សនេន, ចិរស្សំ បស្សាមិ តំ ភូមិបាល;

អហិំសកោ រេណុមនុប្បវិស្ស, បុត្តេន តេ ហេឋយិតោស្មិ [បោថយិតោស្មិ (ក.)] ទេវ.

២១៣. អាយន្តុ ទោវារិកា ខគ្គពន្ធា [ខគ្គពទ្ធា (សី. បី.)], កាសាវិយា យន្តុ [ហន្តុ (ក.)] អន្តេបុរន្តំ;

ហន្ត្វាន តំ សោមនស្សំ កុមារំ, ឆេត្វាន សីសំ វរមាហរន្តុ.

២១៤. បេសិតា រាជិនោ ទូតា, កុមារំ ឯតទព្រវុំ;

ឥស្សរេន វិតិណ្ណោសិ, វធំ បត្តោសិ ខត្តិយ.

២១៥. ស រាជបុត្តោ បរិទេវយន្តោ, ទសង្គុលិំ អញ្ជលិំ បគ្គហេត្វា;

អហម្បិ ឥច្ឆាមិ ជនិន្ទ ទដ្ឋុំ, ជីវំ មំ នេត្វា [ជីវំ បនេត្វា (សី. បី.)] បដិទស្សយេថ.

២១៦. តស្ស តំ វចនំ សុត្វា, រញ្ញោ បុត្តំ អទស្សយុំ;

បុត្តោ ច បិតរំ ទិស្វា, ទូរតោវជ្ឈភាសថ.

២១៧. អាគច្ឆុំ [អាគញ្ឆុំ (សី.), អាគញ្ឆុ (បី.)] ទោវារិកា ខគ្គពន្ធា, កាសាវិយា ហន្តុ មមំ ជនិន្ទ;

អក្ខាហិ មេ បុច្ឆិតោ ឯតមត្ថំ, អបរាធោ កោ និធ មមជ្ជ អត្ថិ.

២១៨. សាយញ្ច បាតោ ឧទកំ សជាតិ, អគ្គិំ សទា បារិចរតប្បមត្តោ;

តំ តាទិសំ សំយតំ ព្រហ្មចារិំ, កស្មា តុវំ ព្រូសិ គហប្បតីតិ.

២១៩. តាលា ច មូលា ច ផលា ច ទេវ, បរិគ្គហា វិវិធា សន្តិមស្ស;

តេ រក្ខតិ គោបយតប្បមត្តោ, [ព្រាហ្មណោ គហបតិ តេន ហោតិ (សី. ស្យា. បី.)] តស្មា អហំ ព្រូមិ គហប្បតីតិ [ព្រាហ្មណោ គហបតិ តេន ហោតិ (សី. ស្យា. បី.)].

២២០. សច្ចំ ខោ ឯតំ វទសិ កុមារ, បរិគ្គហា វិវិធា សន្តិមស្ស;

តេ រក្ខតិ គោបយតប្បមត្តោ, ស [នត្ថិ ឥទំ សី. ស្យា. បី. បោត្ថកេសុ] ព្រាហ្មណោ គហបតិ តេន ហោតិ.

២២១. សុណន្តុ មយ្ហំ បរិសា សមាគតា, សនេគមា ជានបទា ច សព្ពេ;

ពាលាយំ ពាលស្ស វចោ និសម្ម, អហេតុនា ឃាតយតេ មំ [ឃាតយតេ (សី. បី.)] ជនិន្ទោ.

២២២. ទឡ្ហស្មិ មូលេ វិសដេ វិរូឡ្ហេ, ទុន្និក្កយោ វេឡុ បសាខជាតោ;

វន្ទាមិ បាទានិ តវ [តវំ (សី. បី.)] ជនិន្ទ, អនុជាន មំ បព្ពជិស្សាមិ ទេវ.

២២៣. ភុញ្ជស្សុ ភោគេ វិបុលេ កុមារ, សព្ពញ្ច តេ ឥស្សរិយំ ទទាមិ;

អជ្ជេវ ត្វំ កុរូនំ ហោហិ រាជា, មា បព្ពជី បព្ពជ្ជា ហិ ទុក្ខា.

២២៤. កិន្នូធ ទេវ តវមត្ថិ ភោគា, បុព្ពេវហំ [បុព្ពេ ចហំ (ក.)] ទេវលោកេ រមិស្សំ;

រូបេហិ សទ្ទេហិ អថោ រសេហិ, គន្ធេហិ ផស្សេហិ មនោរមេហិ.

២២៥. ភុត្តា ច មេ [ភុត្តា (សី. បី.)] ភោគា តិទិវស្មិំ ទេវ, បរិវារិតា [បរិចារិតា (ក.)] អច្ឆរានំ គណេន [អច្ឆរាសំគណេន (ស្យា. បី. ក.)];

តុវញ្ច [តវញ្ច (សី. បី.)] ពាលំ បរនេយ្យំ វិទិត្វា, ន តាទិសេ រាជកុលេ វសេយ្យំ.

២២៦. សចាហំ ពាលោ បរនេយ្យោ អស្មិ, ឯកាបរាធំ [ឯតាបរាធំ (ក.)] ខម បុត្ត មយ្ហំ;

បុនបិ ចេ ឯទិសកំ ភវេយ្យ, យថាមតិំ សោមនស្ស ករោហិ.

២២៧. អនិសម្ម កតំ កម្មំ, អនវត្ថាយ ចិន្តិតំ;

ភេសជ្ជស្សេវ វេភង្គោ, វិបាកោ ហោតិ បាបកោ.

២២៨. និសម្ម ច កតំ កម្មំ, សម្មាវត្ថាយ ចិន្តិតំ;

ភេសជ្ជស្សេវ សម្បត្តិ, វិបាកោ ហោតិ ភទ្រកោ.

២២៩. អលសោ គិហី កាមភោគី ន សាធុ, អសញ្ញតោ បព្ពជិតោ ន សាធុ;

រាជា ន សាធុ អនិសម្មការី, យោ បណ្ឌិតោ កោធនោ តំ ន សាធុ.

២៣០. និសម្ម ខត្តិយោ កយិរា, នានិសម្ម ទិសម្បតិ;

និសម្មការិនោ រាជ, យសោ កិត្តិ ច វឌ្ឍតិ.

២៣១. និសម្ម ទណ្ឌំ បណយេយ្យ ឥស្សរោ, វេគា កតំ តប្បតិ ភូមិបាល;

សម្មាបណីធី ច នរស្ស អត្ថា, អនានុតប្បា តេ ភវន្តិ បច្ឆា.

២៣២. អនានុតប្បានិ ហិ យេ ករោន្តិ, វិភជ្ជ កម្មាយតនានិ លោកេ;

វិញ្ញុប្បសត្ថានិ សុខុទ្រយានិ, ភវន្តិ ពុទ្ធានុមតានិ [វទ្ធានុមតានិ (សី. បី.)] តានិ.

២៣៣. អាគច្ឆុំ ទោវារិកា ខគ្គពន្ធា, កាសាវិយា ហន្តុ មមំ ជនិន្ទ;

មាតុញ្ច [មាតុច្ច (បី.)] អង្កស្មិមហំ និសិន្នោ, អាកឌ្ឍិតោ សហសា តេហិ ទេវ.

២៣៤. កដុកញ្ហិ សម្ពាធំ សុកិច្ឆំ [សុកិច្ឆ (សី. បី.)] បត្តោ, មធុរម្បិ យំ ជីវិតំ លទ្ធ រាជ;

កិច្ឆេនហំ អជ្ជ វធា បមុត្តោ, បព្ពជ្ជមេវាភិមនោហមស្មិ.

២៣៥. បុត្តោ តវាយំ តរុណោ សុធម្មេ, អនុកម្បកោ សោមនស្សោ កុមារោ;

តំ យាចមានោ ន លភាមិ ស្វជ្ជ [សជ្ជ (សី. បី.)], អរហសិ នំ យាចិតវេ [យាចិតុយេ (ក.)] តុវម្បិ.

២៣៦. រមស្សុ ភិក្ខាចរិយាយ បុត្ត, និសម្ម ធម្មេសុ បរិព្ពជស្សុ;

សព្ពេសុ ភូតេសុ និធាយ ទណ្ឌំ, អនិន្ទិតោ ព្រហ្មមុបេហិ ឋានំ.

២៣៧. អច្ឆេរ [អច្ឆរិយ (សី. ស្យា. បី.)] រូបំ វត យាទិសញ្ច, ទុក្ខិតំ មំ ទុក្ខាបយសេ សុធម្មេ;

យាចស្សុ បុត្តំ ឥតិ វុច្ចមានា, ភិយ្យោវ ឧស្សាហយសេ កុមារំ.

២៣៨. យេ វិប្បមុត្តា អនវជ្ជភោគិនោ [ភោជិនោ (សី. ស្យា. បី.)], បរិនិព្ពុតា លោកមិមំ ចរន្តិ;

តមរិយមគ្គំ បដិបជ្ជមានំ, ន ឧស្សហេ វារយិតុំ កុមារំ.

២៣៩. អទ្ធា ហវេ សេវិតព្ពា សបញ្ញា, ពហុស្សុតា យេ ពហុឋានចិន្តិនោ;

យេសាយំ សុត្វាន សុភាសិតានិ, អប្បោស្សុក្កា វីតសោកា សុធម្មាតិ.

សោមនស្សជាតកំ នវមំ.