៥០៤. ភល្លាតិយជាតកំ (៨)

១៨៦. ភល្លាតិយោ [ភល្លាដិយោ (សី. បី.)] នាម អហោសិ រាជា, រដ្ឋំ បហាយ មិគវំ អចារិ សោ;

អគមា គិរិវរំ គន្ធមាទនំ, សុបុប្ផិតំ [សម្បុប្ផិតំ (សី. បី.)] កិម្បុរិសានុចិណ្ណំ.

១៨៧. សាឡូរសង្ឃញ្ច និសេធយិត្វា, ធនុំ [ធនុ (សី. ស្យា. បី.)] កលាបញ្ច សោ និក្ខិបិត្វា;

ឧបាគមិ វចនំ វត្តុកាមោ, យត្ថដ្ឋិតា កិម្បុរិសា អហេសុំ.

១៨៨. ហិមច្ចយេ ហេមវតាយ តីរេ, កិមិធដ្ឋិតា មន្តយវ្ហោ អភិណ្ហំ;

បុច្ឆាមិ វោ មានុសទេហវណ្ណេ, កថំ នុ [កថំ វោ (សី. ស្យា. បី.)] ជានន្តិ មនុស្សលោកេ.

១៨៩. មល្លំ គិរិំ បណ្ឌរកំ តិកូដំ, សីតោទកា [សីតោទិយា (សី. បី.), សីតោទិកា (?)] អនុវិចរាម នជ្ជោ;

មិគា មនុស្សាវ និភាសវណ្ណា, ជានន្តិ នោ កិម្បុរិសាតិ លុទ្ទ.

១៩០. សុកិច្ឆរូបំ បរិទេវយវ្ហោ [បរិទេវថវ្ហោ (?) មោគ្គល្លានព្យាករណេ ៦.៣៨ សុត្តំ], អាលិង្គិតោ ចាសិ បិយោ បិយាយ;

បុច្ឆាមិ វោ មានុសទេហវណ្ណេ, កិមិធ វនេ រោទថ អប្បតីតា.

១៩១. សុកិច្ឆរូបំ បរិទេវយវ្ហោ, អាលិង្គិតោ ចាសិ បិយោ បិយាយ;

បុច្ឆាមិ វោ មានុសទេហវណ្ណេ, កិមិធ វនេ វិលបថ អប្បតីតា.

១៩២. សុកិច្ឆរូបំ បរិទេវយវ្ហោ, អាលិង្គិតោ ចាសិ បិយោ បិយាយ;

បុច្ឆាមិ វោ មានុសទេហវណ្ណេ, កិមិធ វនេ សោចថ អប្បតីតា.

១៩៣. មយេករត្តំ [រត្តិំ (បី.)] វិប្បវសិម្ហ លុទ្ទ, អកាមកា អញ្ញមញ្ញំ សរន្តា;

តមេករត្តំ អនុតប្បមានា, សោចាម ‘‘សា រត្តិ បុនំ ន ហេស្សតិ’’.

១៩៤. យមេករត្តំ អនុតប្បថេតំ, ធនំ វ នដ្ឋំ បិតរំ វ បេតំ;

បុច្ឆាមិ វោ មានុសទេហវណ្ណេ, កថំ វិនា វាសមកប្បយិត្ថ.

១៩៥. យមិមំ [យយិមំ (ក. សី.)] នទិំ បស្សសិ សីឃសោតំ, នានាទុមច្ឆាទនំ សេលកូលំ [ទុមច្ឆទនំ សេលកូដំ (សី. បី.), ទុមសញ្ឆន្នំ សេលកូលំ (ក.)];

តំ មេ បិយោ ឧត្តរិ វស្សកាលេ, មមញ្ច មញ្ញំ អនុពន្ធតីតិ.

១៩៦. អហញ្ច អង្កោលកមោចិនាមិ, អតិមុត្តកំ សត្តលិយោថិកញ្ច;

‘‘បិយោ ច មេ ហេហិតិ មាលភារី, អហញ្ច នំ មាលិនី អជ្ឈុបេស្សំ’’.

១៩៧. អហញ្ចិទំ កុរវកមោចិនាមិ, ឧទ្ទាលកា បាដលិសិន្ធុវារកា [សិន្ធុវារិតា (ស្យា. បី. ក.)];

‘‘បិយោ ច មេ ហេហិតិ មាលភារី, អហញ្ច នំ មាលិនី អជ្ឈុបេស្សំ’’.

១៩៨. អហញ្ច សាលស្ស សុបុប្ផិតស្ស, ឱចេយ្យ បុប្ផានិ ករោមិ មាលំ;

‘‘បិយោ ច មេ ហេហិតិ មាលភារី, អហញ្ច នំ មាលិនី អជ្ឈុបេស្សំ’’.

១៩៩. អហញ្ច សាលស្ស សុបុប្ផិតស្ស, ឱចេយ្យ បុប្ផានិ ករោមិ ភារំ;

ឥទញ្ច នោ ហេហិតិ សន្ថរត្ថំ, យត្ថជ្ជិមំ [យត្ថជ្ជមំ (សី. បី.)] វិហរិស្សាម [វិហរិស្សាមុ (បី.)] រត្តិំ.

២០០. អហញ្ច ខោ អគឡុំ [អគ្គលុ (ស្យា. ក.), អកលុំ (បី.)] ចន្ទនញ្ច, សិលាយ បិំសាមិ បមត្តរូបា;

‘‘បិយោ ច មេ ហេហិតិ រោសិតង្គោ, អហញ្ច នំ រោសិតា អជ្ឈុបេស្សំ’’.

២០១. អថាគមា សលិលំ សីឃសោតំ, នុទំ សាលេ សលឡេ កណ្ណិការេ;

អាបូរថ [អបូរថ (សី. បី.), អាបូរថេ (ស្យា.)] តេន មុហុត្តកេន, សាយំ នទី អាសិ មយា សុទុត្តរា.

២០២. ឧភោសុ តីរេសុ មយំ តទា ឋិតា, សម្បស្សន្តា ឧភយោ អញ្ញមញ្ញំ;

សកិម្បិ រោទាម សកិំ ហសាម, កិច្ឆេន នោ អាគមា [អគមា (សី. ស្យា. បី.)] សំវរី សា.

២០៣. បាតោវ [បាតោ ច (សី. ស្យា. បី.)] ខោ ឧគ្គតេ សូរិយម្ហិ, ចតុក្កំ នទិំ ឧត្តរិយាន លុទ្ទ;

អាលិង្គិយា អញ្ញមញ្ញំ មយំ ឧភោ, សកិម្បិ រោទាម សកិំ ហសាម.

២០៤. តីហូនកំ សត្តសតានិ លុទ្ទ, យមិធ មយំ វិប្បវសិម្ហ បុព្ពេ;

វស្សេកិមំ [វាសេកិមំ (សី. បី.)] ជីវិតំ ភូមិបាល, កោ នីធ កន្តាយ វិនា វសេយ្យ.

២០៥. អាយុញ្ច វោ កីវតកោ នុ សម្ម, សចេបិ ជានាថ វទេថ អាយុំ;

អនុស្សវា វុឌ្ឍតោ អាគមា វា, អក្ខាថ មេ តំ អវិកម្បមានា.

២០៦. អាយុញ្ច នោ វស្សសហស្សំ លុទ្ទ, ន ចន្តរា បាបកោ អត្ថិ រោគោ;

អប្បញ្ច [អប្បំវ (ស្យា. ក.)] ទុក្ខំ សុខមេវ ភិយ្យោ, អវីតរាគា វិជហាម ជីវិតំ.

២០៧. ឥទញ្ច សុត្វាន អមានុសានំ, ភល្លាតិយោ ឥត្តរ ជីវិតន្តិ;

និវត្តថ ន មិគវំ អចរិ, អទាសិ ទានានិ អភុញ្ជិ ភោគេ.

២០៨. ឥទញ្ច សុត្វាន អមានុសានំ, សម្មោទថ មា កលហំ អកត្ថ;

មា វោ តបី អត្តកម្មាបរាធោ, យថាបិ តេ កិម្បុរិសេករត្តំ.

២០៩. ឥទញ្ច សុត្វាន អមានុសានំ, សម្មោទថ មា វិវាទំ អកត្ថ;

មា វោ តបី អត្តកម្មាបរាធោ, យថាបិ តេ កិម្បុរិសេករត្តំ.

២១០. វិវិធំ [វិវិធ (សី. ស្យា.)] អធិមនា សុណោមហំ, វចនបថំ តវ អត្ថសំហិតំ;

មុញ្ចំ [មុញ្ច (សី. បី.)] គិរំ នុទសេវ មេ ទរំ, សមណ សុខាវហ ជីវ មេ ចិរន្តិ.

ភល្លាតិយជាតកំ អដ្ឋមំ.