៥០៣. សត្តិគុម្ពជាតកំ (៧)

១៥៩. មិគលុទ្ទោ មហារាជា, បញ្ចាលានំ រថេសភោ;

និក្ខន្តោ សហ សេនាយ, ឱគណោ វនមាគមា.

១៦០. តត្ថទ្ទសា អរញ្ញស្មិំ, តក្ករានំ កុដិំ កតំ;

តស្សា [តស្មា (ស្យា. បី. ក.)] កុដិយា និក្ខម្ម, សុវោ លុទ្ទានិ ភាសតិ.

១៦១. សម្បន្នវាហនោ បោសោ, យុវា សម្មដ្ឋកុណ្ឌលោ [កុណ្ឌលី (ស្យា. ក.)];

សោភតិ លោហិតុណ្ហីសោ, ទិវា សូរិយោវ ភាសតិ.

១៦២. មជ្ឈន្ហិកេ [មជ្ឈន្តិកេ (សព្ពត្ថ)] សម្បតិកេ, សុត្តោ រាជា សសារថិ;

ហន្ទស្សាភរណំ សព្ពំ, គណ្ហាម សាហសា [សហសា (សី. ស្យា. បី.)] មយំ.

១៦៣. និសីថេបិ រហោ ទានិ, សុត្តោ រាជា សសារថិ;

អាទាយ វត្ថំ មណិកុណ្ឌលញ្ច, ហន្ត្វាន សាខាហិ អវត្ថរាម.

១៦៤. កិន្នុ ឧម្មត្តរូបោវ, សត្តិគុម្ព បភាសសិ;

ទុរាសទា ហិ រាជានោ, អគ្គិ បជ្ជលិតោ យថា.

១៦៥. អថ ត្វំ បតិកោលម្ព, មត្តោ ថុល្លានិ គជ្ជសិ;

មាតរិ មយ្ហំ នគ្គាយ, កិន្នុ ត្វំ វិជិគុច្ឆសេ.

១៦៦. ឧដ្ឋេហិ សម្ម តរមានោ, រថំ យោជេហិ សារថិ;

សកុណោ មេ ន រុច្ចតិ, អញ្ញំ គច្ឆាម អស្សមំ.

១៦៧. យុត្តោ រថោ មហារាជ, យុត្តោ ច ពលវាហនោ;

អធិតិដ្ឋ មហារាជ, អញ្ញំ គច្ឆាម អស្សមំ.

១៦៨. កោ នុមេវ គតា [ក្វ នុ’មេ’បគតា (?)] សព្ពេ, យេ អស្មិំ បរិចារកា;

ឯស គច្ឆតិ បញ្ចាលោ, មុត្តោ តេសំ អទស្សនា.

១៦៩. កោទណ្ឌកានិ គណ្ហថ, សត្តិយោ តោមរានិ ច;

ឯស គច្ឆតិ បញ្ចាលោ, មា វោ មុញ្ចិត្ថ ជីវតំ [ជីវិតំ (ពហូសុ)].

១៧០. អថាបរោ បដិនន្ទិត្ថ, សុវោ លោហិតតុណ្ឌកោ;

ស្វាគតំ តេ មហារាជ, អថោ តេ អទុរាគតំ;

ឥស្សរោសិ អនុប្បត្តោ, យំ ឥធត្ថិ បវេទយ.

១៧១. តិន្ទុកានិ បិយាលានិ, មធុកេ កាសុមារិយោ;

ផលានិ ខុទ្ទកប្បានិ, ភុញ្ជ រាជ វរំ វរំ.

១៧២. ឥទម្បិ បានីយំ សីតំ, អាភតំ គិរិគព្ភរា;

តតោ បិវ មហារាជ, សចេ ត្វំ អភិកង្ខសិ.

១៧៣. អរញ្ញំ ឧញ្ឆាយ គតា, យេ អស្មិំ បរិចារកា;

សយំ ឧដ្ឋាយ គណ្ហវ្ហោ, ហត្ថា មេ នត្ថិ ទាតវេ.

១៧៤. ភទ្ទកោ វតយំ បក្ខី, ទិជោ បរមធម្មិកោ;

អថេសោ ឥតរោ បក្ខី, សុវោ លុទ្ទានិ ភាសតិ.

១៧៥. ‘‘ឯតំ ហនថ ពន្ធថ, មា វោ មុញ្ចិត្ថ ជីវតំ’’;

ឥច្ចេវំ វិលបន្តស្ស, សោត្ថិំ [សោត្ថី (ស្យា.)] បត្តោស្មិ អស្សមំ.

១៧៦. ភាតរោស្ម មហារាជ, សោទរិយា ឯកមាតុកា;

ឯករុក្ខស្មិំ សំវឌ្ឍា, នានាខេត្តគតា ឧភោ.

១៧៧. សត្តិគុម្ពោ ច ចោរានំ, អហញ្ច ឥសីនំ ឥធ;

អសតំ សោ, សតំ អហំ, តេន ធម្មេន នោ វិនា.

១៧៨. តត្ថ វធោ ច ពន្ធោ ច, និកតី វញ្ចនានិ ច;

អាលោបា សាហសាការា, តានិ សោ តត្ថ សិក្ខតិ.

១៧៩. ឥធ សច្ចញ្ច ធម្មោ ច, អហិំសា សំយមោ ទមោ;

អាសនូទកទាយីនំ, អង្កេ វទ្ធោស្មិ ភារធ [ភារត (សី. ស្យា. បី.)].

១៨០. យំ យញ្ហិ រាជ ភជតិ, សន្តំ វា យទិ វា អសំ;

សីលវន្តំ វិសីលំ វា, វសំ តស្សេវ គច្ឆតិ.

១៨១. យាទិសំ កុរុតេ មិត្តំ, យាទិសំ ចូបសេវតិ;

សោបិ តាទិសកោ ហោតិ, សហវាសោ ហិ [សហវាសោបិ (ស្យា. ក.)] តាទិសោ.

១៨២. សេវមានោ សេវមានំ, សម្ផុដ្ឋោ សម្ផុសំ បរំ;

សរោ ទិទ្ធោ កលាបំវ, អលិត្តមុបលិម្បតិ;

ឧបលេបភយា [ឧបលិម្បភយា (ស្យា. ក.)] ធីរោ, នេវ បាបសខា សិយា.

១៨៣. បូតិមច្ឆំ កុសគ្គេន, យោ នរោ ឧបនយ្ហតិ;

កុសាបិ បូតិ [បូតី (សី. បី.)] វាយន្តិ, ឯវំ ពាលូបសេវនា.

១៨៤. តគរញ្ច បលាសេន, យោ នរោ ឧបនយ្ហតិ;

បត្តាបិ សុរភិ [សុរភី (សី. ស្យា. បី.)] វាយន្តិ, ឯវំ ធីរូបសេវនា.

១៨៥. តស្មា បត្តបុដស្សេវ [ផលបុដស្សេវ (សី. បី.), បលបុដស្សេវ (ក. អដ្ឋ.), បលាសបុដស្សេវ (ស្យា. ក.)], ញត្វា សម្បាកមត្តនោ;

អសន្តេ នោបសេវេយ្យ, សន្តេ សេវេយ្យ បណ្ឌិតោ;

អសន្តោ និរយំ នេន្តិ, សន្តោ បាបេន្តិ សុគ្គតិន្តិ.

សត្តិគុម្ពជាតកំ សត្តមំ.