៥០២. ចូឡហំសជាតកំ (៦)

១៣៣. ឯតេ ហំសា បក្កមន្តិ, វក្កង្គា ភយមេរិតា;

ហរិត្តច ហេមវណ្ណ, កាមំ សុមុខ បក្កម.

១៣៤. ឱហាយ មំ ញាតិគណា, ឯកំ បាសវសំ គតំ;

អនបេក្ខមានា [នាបេក្ខមានា (ក.)] គច្ឆន្តិ, កិំ ឯសោ អវហិយ្យសិ.

១៣៥. បតេវ បតតំ សេដ្ឋ, នត្ថិ ពទ្ធេ សហាយតា [សហាយកា (ស្យា.)];

មា អនីឃាយ ហាបេសិ, កាមំ សុមុខ បក្កម.

១៣៦. នាហំ ‘‘ទុក្ខបរេតោ’’តិ [ទុក្ខបរេតោបិ (ក.)], ធតរដ្ឋ តុវំ [តវំ (សី. បី.)] ជហេ;

ជីវិតំ មរណំ វា មេ, តយា សទ្ធិំ ភវិស្សតិ.

១៣៧. ឯតទរិយស្ស កល្យាណំ, យំ ត្វំ សុមុខ ភាសសិ;

តញ្ច វីមំសមានោហំ, ‘‘បតតេតំ’’ អវស្សជិំ.

១៣៨. អបទេន បទំ យាតិ, អន្តលិក្ខចរោ [អន្តលិក្ខេ ចរោ (សី. បី.)] ទិជោ;

អារា បាសំ ន ពុជ្ឈិ ត្វំ, ហំសានំ បវរុត្តម [បវរុត្តមោ (ក. សី. បី.)].

១៣៩. យទា បរាភវោ ហោតិ, បោសោ ជីវិតសង្ខយេ;

អថ ជាលញ្ច បាសញ្ច, អាសជ្ជាបិ ន ពុជ្ឈតិ.

១៤០. ឯតេ ហំសា បក្កមន្តិ, វក្កង្គា ភយមេរិតា;

ហរិត្តច ហេមវណ្ណ, ត្វញ្ញេវ [ត្វញ្ច តំ (សី.), ត្វញ្ច (បី.)] អវហិយ្យសិ.

១៤១. ឯតេ ភុត្វា ច បិត្វា ច, បក្កមន្តិ វិហង្គមា;

អនបេក្ខមានា វក្កង្គា, ត្វញ្ញេវេកោ ឧបាសសិ.

១៤២. កិន្នុ ត្យាយំ [តាយំ (សី. ស្យា. បី.)] ទិជោ ហោតិ, មុត្តោ ពទ្ធំ ឧបាសសិ;

ឱហាយ សកុណា យន្តិ, កិំ ឯកោ អវហិយ្យសិ.

១៤៣. រាជា មេ សោ ទិជោ មិត្តោ, សខា បាណសមោ ច មេ;

នេវ នំ វិជហិស្សាមិ, យាវ កាលស្ស បរិយាយំ.

១៤៤. យោ ច ត្វំ សខិនោ ហេតុ, បាណំ ចជិតុមិច្ឆសិ;

សោ តេ សហាយំ មុញ្ចាមិ, ហោតុ រាជា តវានុគោ.

១៤៥. ឯវំ លុទ្ទក នន្ទស្សុ, សហ សព្ពេហិ ញាតិភិ;

យថាហមជ្ជ នន្ទាមិ, ទិស្វា មុត្តំ ទិជាធិបំ.

១៤៦. កច្ចិន្នុ ភោតោ កុសលំ, កច្ចិ ភោតោ អនាមយំ;

កច្ចិ រដ្ឋមិទំ ផីតំ, ធម្មេន មនុសាសសិ.

១៤៧. កុសលញ្ចេវ មេ ហំស, អថោ ហំស អនាមយំ;

អថោ រដ្ឋមិទំ ផីតំ, ធម្មេន មនុសាសហំ.

១៤៨. កច្ចិ ភោតោ អមច្ចេសុ, ទោសោ កោចិ ន វិជ្ជតិ;

កច្ចិ អារា អមិត្តា តេ, ឆាយា ទក្ខិណតោរិវ.

១៤៩. អថោបិ មេ អមច្ចេសុ, ទោសោ កោចិ ន វិជ្ជតិ;

អថោ អារា អមិត្តា មេ, ឆាយា ទក្ខិណតោរិវ.

១៥០. កច្ចិ តេ សាទិសី ភរិយា, អស្សវា បិយភាណិនី;

បុត្តរូបយសូបេតា, តវ ឆន្ទវសានុគា.

១៥១. អថោ មេ សាទិសី ភរិយា, អស្សវា បិយភាណិនី;

បុត្តរូបយសូបេតា, មម ឆន្ទវសានុគា.

១៥២. កច្ចិ តេ ពហវោ បុត្តា, សុជាតា រដ្ឋវឌ្ឍន;

បញ្ញាជវេន សម្បន្នា, សម្មោទន្តិ តតោ តតោ.

១៥៣. សតមេកោ ច មេ បុត្តា, ធតរដ្ឋ មយា សុតា;

តេសំ ត្វំ កិច្ចមក្ខាហិ, នាវរុជ្ឈន្តិ [នាវរជ្ឈន្តិ (ក. សី. បី.)] តេ វចោ.

១៥៤. ឧបបន្នោបិ ចេ ហោតិ, ជាតិយា វិនយេន វា;

អថ បច្ឆា កុរុតេ យោគំ, កិច្ឆេ [កិច្ចេ (សី. ស្យា. បី.)] អាបាសុ [អាវាសុ (ស្យា.), អាបទាសុ (ក.)] សីទតិ.

១៥៥. តស្ស សំហីរបញ្ញស្ស, វិវរោ ជាយតេ មហា;

រត្តិមន្ធោវ [នត្តមន្ធោវ (សី. បី.)] រូបានិ, ថូលានិ មនុបស្សតិ.

១៥៦. អសារេ សារយោគញ្ញូ, មតិំ ន ត្វេវ វិន្ទតិ;

សរភោវ គិរិទុគ្គស្មិំ, អន្តរាយេវ សីទតិ.

១៥៧. ហីនជច្ចោបិ ចេ ហោតិ, ឧដ្ឋាតា ធិតិមា នរោ;

អាចារសីលសម្បន្នោ, និសេ អគ្គីវ ភាសតិ.

១៥៨. ឯតំ មេ ឧបមំ កត្វា, បុត្តេ វិជ្ជាសុ វាចយ [ឋាបស (ស្យា. ក.)];

សំវិរូឡ្ហេថ មេធាវី, ខេត្តេ ពីជំវ [ខេត្តពីជំវ (សី. បី.)] វុដ្ឋិយាតិ.

ចូឡហំសជាតកំ ឆដ្ឋំ.