៥០១. រោហណមិគជាតកំ (៥)

១០៤. ឯតេ យូថា បតិយន្តិ, ភីតា មរណស្ស [មរណា (ស្យា. បី.), មរណ (ក.)] ចិត្តក;

គច្ឆ តុវម្បិ មាកង្ខិ, ជីវិស្សន្តិ តយា សហ.

១០៥. នាហំ រោហណ [រោហន្ត (សី. បី.), រោហន (ស្យា.)] គច្ឆាមិ, ហទយំ មេ អវកស្សតិ;

ន តំ អហំ ជហិស្សាមិ, ឥធ ហិស្សាមិ ជីវិតំ.

១០៦. តេ ហិ នូន មរិស្សន្តិ, អន្ធា អបរិណាយកា;

គច្ឆ តុវម្បិ មាកង្ខិ, ជីវិស្សន្តិ តយា សហ.

១០៧. នាហំ រោហណ គច្ឆាមិ, ហទយំ មេ អវកស្សតិ;

ន តំ ពទ្ធំ [ពន្ធំ (ក.)] ជហិស្សាមិ, ឥធ ហិស្សាមិ ជីវិតំ.

១០៨. គច្ឆ ភីរុ បលាយស្សុ, កូដេ ពទ្ធោស្មិ អាយសេ;

គច្ឆ តុវម្បិ មាកង្ខិ, ជីវិស្សន្តិ តយា សហ.

១០៩. នាហំ រោហណ គច្ឆាមិ, ហទយំ មេ អវកស្សតិ;

ន តំ អហំ ជហិស្សាមិ, ឥធ ហិស្សាមិ ជីវិតំ.

១១០. តេ ហិ នូន មរិស្សន្តិ, អន្ធា អបរិណាយកា;

គច្ឆ តុវម្បិ មាកង្ខិ, ជីវិស្សន្តិ តយា សហ.

១១១. នាហំ រោហណ គច្ឆាមិ, ហទយំ មេ អវកស្សតិ;

ន តំ ពទ្ធំ ជហិស្សាមិ, ឥធ ហិស្សាមិ ជីវិតំ.

១១២. អយំ សោ លុទ្ទកោ ឯតិ, លុទ្ទរូបោ [រុទ្ទរូបោ (សី. បី.)] សហាវុធោ;

យោ នោ វធិស្សតិ អជ្ជ, ឧសុនា សត្តិយា អបិ [មបិ (សី. ស្យា. បី.)].

១១៣. សា មុហុត្តំ បលាយិត្វា, ភយដ្ដា [ភយដ្ឋា (បី.)] ភយតជ្ជិតា;

សុទុក្ករំ អករា ភីរុ, មរណាយូបនិវត្តថ.

១១៤. កិន្នុ តេមេ មិគា ហោន្តិ, មុត្តា ពទ្ធំ ឧបាសរេ;

ន តំ ចជិតុមិច្ឆន្តិ, ជីវិតស្សបិ ការណា.

១១៥. ភាតរោ ហោន្តិ មេ លុទ្ទ, សោទរិយា ឯកមាតុកា;

ន មំ ចជិតុមិច្ឆន្តិ, ជីវិតស្សបិ ការណា.

១១៦. តេ ហិ នូន មរិស្សន្តិ, អន្ធា អបរិណាយកា;

បញ្ចន្នំ ជីវិតំ ទេហិ, ភាតរំ មុញ្ច លុទ្ទក.

១១៧. សោ វោ អហំ បមោក្ខាមិ, មាតាបេត្តិភរំ មិគំ;

នន្ទន្តុ មាតាបិតរោ, មុត្តំ ទិស្វា មហាមិគំ.

១១៨. ឯវំ លុទ្ទក នន្ទស្សុ, សហ សព្ពេហិ ញាតិភិ;

យថាហមជ្ជ នន្ទាមិ, មុត្តំ ទិស្វា មហាមិគំ.

១១៩. កថំ ត្វំ បមោក្ខោ [កថំ បមោក្ខោ (សី. បី.), កថំ តេ បរោក្ខោ (?)] អាសិ, ឧបនីតស្មិ ជីវិតេ;

កថំ បុត្ត អមោចេសិ, កូដបាសម្ហ លុទ្ទកោ.

១២០. ភណំ កណ្ណសុខំ វាចំ, ហទយង្គំ ហទយស្សិតំ;

សុភាសិតាហិ វាចាហិ, ចិត្តកោ មំ អមោចយិ.

១២១. ភណំ កណ្ណសុខំ វាចំ, ហទយង្គំ ហទយស្សិតំ;

សុភាសិតាហិ វាចាហិ, សុតនា មំ អមោចយិ.

១២២. សុត្វា កណ្ណសុខំ វាចំ, ហទយង្គំ ហទយស្សិតំ;

សុភាសិតានិ សុត្វាន, លុទ្ទកោ មំ អមោចយិ.

១២៣. ឯវំ អានន្ទិតោ ហោតុ, សហ ទារេហិ លុទ្ទកោ;

យថា មយជ្ជ នន្ទាម, ទិស្វា រោហណមាគតំ.

១២៤. ននុ ត្វំ អវច [អវចា (សី. បី.)] លុទ្ទ, ‘‘មិគចម្មានិ អាហរិំ’’;

អថ កេន នុ វណ្ណេន, មិគចម្មានិ នាហរិ.

១២៥. អាគមា ចេវ ហត្ថត្ថំ, កូដបាសញ្ច សោ មិគោ;

អពជ្ឈិ តំ [អពជ្ឈិ តញ្ច (បី.)] មិគរាជំ, តញ្ច មុត្តា ឧបាសរេ.

១២៦. តស្ស មេ អហុ សំវេគោ, អព្ភុតោ លោមហំសនោ;

ឥមញ្ចាហំ មិគំ ហញ្ញេ, អជ្ជ ហិស្សាមិ ជីវិតំ.

១២៧. កីទិសា តេ មិគា លុទ្ទ, កីទិសា ធម្មិកា មិគា;

កថំវណ្ណា កថំសីលា, ពាឡ្ហំ ខោ នេ បសំសសិ.

១២៨. ឱទាតសិង្គា សុចិវាឡា, ជាតរូបតចូបមា;

បាទា លោហិតកា តេសំ, អញ្ជិតក្ខា មនោរមា.

១២៩. ឯទិសា តេ មិគា ទេវ, ឯទិសា ធម្មិកា មិគា;

មាតាបេត្តិភរា ទេវ, ន តេ សោ អភិហារិតុំ [អភិហារយុំ (ក. សី.), អភិហារយិំ (ស្យា.), អភិហារយំ (បី.)].

១៣០. ទម្មិ និក្ខសតំ លុទ្ទ, ថូលញ្ច មណិកុណ្ឌលំ;

ចតុស្សទញ្ច [ចតុរស្សញ្ច (ស្យា. ក.)] បល្លង្កំ, ឧមាបុប្ផសរិន្និភំ [ឧម្មាបុប្ផសិរិន្និភំ (សី. ស្យា. បី. ក.)].

១៣១. ទ្វេ ច សាទិសិយោ ភរិយា, ឧសភញ្ច គវំ សតំ;

ធម្មេន រជ្ជំ ការេស្សំ, ពហុការោ មេសិ លុទ្ទក.

១៣២. កសិវាណិជ្ជា [កសី វណិជ្ជា (សី. ស្យា. បី.)] ឥណទានំ, ឧញ្ឆាចរិយា ច លុទ្ទក;

ឯតេន ទារំ បោសេហិ, មា បាបំ អករី បុនាតិ [អករា បុនន្តិ (ក. សី. បី.)].

រោហណមិគជាតកំ [រោហន្តមិគជាតកំ (សី. បី.)] បញ្ចមំ.