៤៩៨. ចិត្តសម្ភូតជាតកំ (២)

២៤. សព្ពំ នរានំ សផលំ សុចិណ្ណំ, ន កម្មុនា កិញ្ចន មោឃមត្ថិ;

បស្សាមិ សម្ភូតំ មហានុភាវំ, សកម្មុនា បុញ្ញផលូបបន្នំ.

២៥. សព្ពំ នរានំ សផលំ សុចិណ្ណំ, ន កម្មុនា កិញ្ចន មោឃមត្ថិ;

កច្ចិន្នុ ចិត្តស្សបិ ឯវមេវំ, ឥទ្ធោ មនោ តស្ស យថាបិ មយ្ហំ.

២៦. សព្ពំ នរានំ សផលំ សុចិណ្ណំ, ន កម្មុនា កិញ្ចន មោឃមត្ថិ;

ចិត្តម្បិ ជានាហិ [ចិត្តំ វិជានាហិ (សី. បី.)] តថេវ ទេវ, ឥទ្ធោ មនោ តស្ស យថាបិ តុយ្ហំ.

២៧. ភវំ នុ ចិត្តោ សុតមញ្ញតោ តេ, ឧទាហុ តេ កោចិ នំ ឯតទក្ខា;

គាថា សុគីតា ន មមត្ថិ កង្ខា, ទទាមិ តេ គាមវរំ សតញ្ច.

២៨. ន ចាហំ ចិត្តោ សុតមញ្ញតោ មេ, ឥសី ច មេ ឯតមត្ថំ អសំសិ;

‘‘គន្ត្វាន រញ្ញោ បដិគាហិ [បដិគាយិ (ស្យា. ក.), បដិគាយ (?)] គាថំ, អបិ តេ វរំ អត្តមនោ ទទេយ្យ’’ [អបិ នុ តេ វរំ អត្តមនោ ទទេយ្យ (ស្យា.), អបិ នុ តេ អត្តមនោ វរំ ទទេ (ក.)].

២៩. យោជេន្តុ វេ រាជរថេ, សុកតេ ចិត្តសិព្ពនេ;

កច្ឆំ នាគានំ ពន្ធថ, គីវេយ្យំ បដិមុញ្ចថ.

៣០. អាហញ្ញន្តុ [អាហញ្ញរេ (ស្យា.)] ភេរិមុទិង្គសង្ខេ [សង្ខា (ស្យា.)], សីឃានិ យានានិ ច យោជយន្តុ;

អជ្ជេវហំ អស្សមំ តំ គមិស្សំ, យត្ថេវ ទក្ខិស្សមិសិំ និសិន្នំ.

៣១. សុលទ្ធលាភោ វត មេ អហោសិ, គាថា សុគីតា បរិសាយ មជ្ឈេ;

ស្វាហំ ឥសិំ សីលវតូបបន្នំ, ទិស្វា បតីតោ សុមនោហមស្មិ.

៣២. អាសនំ ឧទកំ បជ្ជំ, បដិគ្គណ្ហាតុ នោ ភវំ;

អគ្ឃេ ភវន្តំ បុច្ឆាម, អគ្ឃំ កុរុតុ នោ ភវំ.

៣៣. រម្មញ្ច តេ អាវសថំ ករោន្តុ, នារីគណេហិ បរិចារយស្សុ;

ករោហិ ឱកាសមនុគ្គហាយ, ឧភោបិ មំ ឥស្សរិយំ ករោម.

៣៤. ទិស្វា ផលំ ទុច្ចរិតស្ស រាជ, អថោ សុចិណ្ណស្ស មហាវិបាកំ;

អត្តានមេវ បដិសំយមិស្សំ, ន បត្ថយេ បុត្ត [បុត្តំ (សី. បី.)] បសុំ ធនំ វា.

៣៥. ទសេវិមា វស្សទសា, មច្ចានំ ឥធ ជីវិតំ;

អបត្តញ្ញេវ តំ ឱធិំ, នឡោ ឆិន្នោវ សុស្សតិ.

៣៦. តត្ថ កា នន្ទិ កា ខិឌ្ឌា, កា រតី កា ធនេសនា;

កិំ មេ បុត្តេហិ ទារេហិ, រាជ មុត្តោស្មិ ពន្ធនា.

៣៧. សោហំ ឯវំ បជានាមិ [សោ អហំ សុប្បជានាមិ (សី. បី.)], មច្ចុ មេ នប្បមជ្ជតិ;

អន្តកេនាធិបន្នស្ស, កា រតី កា ធនេសនា.

៣៨. ជាតិ នរានំ អធមា ជនិន្ទ, ចណ្ឌាលយោនិ ទ្វិបទាកនិដ្ឋា [ទិបទាកនិដ្ឋា (សី. បី.)];

សកេហិ កម្មេហិ សុបាបកេហិ, ចណ្ឌាលគព្ភេ [ចណ្ឌាលិគព្ភេ (ស្យា.)] អវសិម្ហ បុព្ពេ.

៣៩. ចណ្ឌាលាហុម្ហ អវន្តីសុ, មិគា នេរញ្ជរំ បតិ;

ឧក្កុសា នម្មទាតីរេ [រម្មទាតីរេ (ស្យា. ក.)], ត្យជ្ជ ព្រាហ្មណខត្តិយា.

៤០. ឧបនីយតិ ជីវិតមប្បមាយុ, ជរូបនីតស្ស ន សន្តិ តាណា;

ករោហិ បញ្ចាល មមេត [មមេវ (ស្យា. ក.)] វាក្យំ, មាកាសិ កម្មានិ ទុក្ខុទ្រយានិ.

៤១. ឧបនីយតិ ជីវិតមប្បមាយុ, ជរូបនីតស្ស ន សន្តិ តាណា;

ករោហិ បញ្ចាល មមេត វាក្យំ, មាកាសិ កម្មានិ ទុក្ខប្ផលានិ.

៤២. ឧបនីយតិ ជីវិតមប្បមាយុ, ជរូបនីតស្ស ន សន្តិ តាណា;

ករោហិ បញ្ចាល មមេត វាក្យំ, មាកាសិ កម្មានិ រជស្សិរានិ.

៤៣. ឧបនីយតិ ជីវិតមប្បមាយុ, វណ្ណំ ជរា ហន្តិ នរស្ស ជិយ្យតោ;

ករោហិ បញ្ចាល មមេត វាក្យំ, មាកាសិ កម្មំ និរយូបបត្តិយា.

៤៤. អទ្ធា ហិ សច្ចំ វចនំ តវេតំ, យថា ឥសី ភាសសិ ឯវមេតំ;

កាមា ច មេ សន្តិ អនប្បរូបា, តេ ទុច្ចជា មាទិសកេន ភិក្ខុ.

៤៥. នាគោ យថា បង្កមជ្ឈេ ព្យសន្នោ, បស្សំ ថលំ នាភិសម្ភោតិ គន្តុំ;

ឯវម្បហំ [ឯវមហំ (ស្យា.)] កាមបង្កេ ព្យសន្នោ, ន ភិក្ខុនោ មគ្គមនុព្ពជាមិ.

៤៦. យថាបិ មាតា ច បិតា ច បុត្តំ, អនុសាសរេ កិន្តិ សុខី ភវេយ្យ;

ឯវម្បិ មំ ត្វំ អនុសាស ភន្តេ, យថា ចិរំ [យមាចរំ (សី. បី. ក. អដ្ឋ.)] បេច្ច សុខី ភវេយ្យំ.

៤៧. នោ ចេ តុវំ ឧស្សហសេ ជនិន្ទ, កាមេ ឥមេ មានុសកេ បហាតុំ;

ធម្មិំ [ធម្មំ (សី. បី.)] ពលិំ បដ្ឋបយស្សុ រាជ, អធម្មការោ តវ [អធម្មការោ ច តេ (សី. ស្យា. បី.)] មាហុ រដ្ឋេ.

៤៨. ទូតា វិធាវន្តុ ទិសា ចតស្សោ, និមន្តកា សមណព្រាហ្មណានំ;

តេ អន្នបានេន ឧបដ្ឋហស្សុ, វត្ថេន សេនាសនបច្ចយេន ច.

៤៩. អន្នេន បានេន បសន្នចិត្តោ, សន្តប្បយ សមណព្រាហ្មណេ ច;

ទត្វា ច ភុត្វា ច យថានុភាវំ, អនិន្ទិតោ សគ្គមុបេហិ [មុបេតិ (បី. ក.)] ឋានំ.

៥០. សចេ ច តំ រាជ មទោ សហេយ្យ, នារីគណេហិ បរិចារយន្តំ;

ឥមមេវ គាថំ មនសី ករោហិ, ភាសេសិ [ភាសេហិ (ស្យា. បី. ក.)] ចេនំ បរិសាយ មជ្ឈេ.

៥១. អព្ភោកាសសយោ ជន្តុ, វជន្ត្យា ខីរបាយិតោ;

បរិកិណ្ណោ សុវានេហិ [សុបិនេហិ (សី. បី.)], ស្វាជ្ជ រាជាតិ វុច្ចតីតិ.

ចិត្តសម្ភូតជាតកំ ទុតិយំ.