៤៩៩. សិវិជាតកំ (៣)

៥២. ទូរេ អបស្សំ ថេរោវ, ចក្ខុំ យាចិតុមាគតោ;

ឯកនេត្តា ភវិស្សាម, ចក្ខុំ មេ ទេហិ យាចិតោ.

៥៣. កេនានុសិដ្ឋោ ឥធ មាគតោសិ, វនិព្ពក [វណិព្ពក (សី.)] ចក្ខុបថានិ យាចិតុំ;

សុទុច្ចជំ យាចសិ ឧត្តមង្គំ, យមាហុ នេត្តំ បុរិសេន ទុច្ចជំ.

៥៤. យមាហុ ទេវេសុ សុជម្បតីតិ, មឃវាតិ នំ អាហុ មនុស្សលោកេ;

តេនានុសិដ្ឋោ ឥធ មាគតោស្មិ, វនិព្ពកោ ចក្ខុបថានិ យាចិតុំ.

៥៥. វនិព្ពតោ [វនិព្ពកោ (ស្យា. បី.)] មយ្ហ វនិំ [វនំ (ក.), វណិំ (សី. ស្យា. បី.)] អនុត្តរំ, ទទាហិ តេ ចក្ខុបថានិ យាចិតោ;

ទទាហិ មេ ចក្ខុបថំ អនុត្តរំ, យមាហុ នេត្តំ បុរិសេន ទុច្ចជំ.

៥៦. យេន អត្ថេន អាគច្ឆិ [អាគញ្ឆិ (សី. បី.)], យមត្ថមភិបត្ថយំ;

តេ តេ ឥជ្ឈន្តុ សង្កប្បា, លភ ចក្ខូនិ ព្រាហ្មណ.

៥៧. ឯកំ តេ យាចមានស្ស, ឧភយានិ ទទាមហំ;

ស ចក្ខុមា គច្ឆ ជនស្ស បេក្ខតោ, យទិច្ឆសេ ត្វំ តទតេ សមិជ្ឈតុ.

៥៨. មា នោ ទេវ អទា ចក្ខុំ, មា នោ សព្ពេ បរាករិ [បរក្ករិ (ស្យា. ក. អដ្ឋ.), បរិក្ករិ (ក.) បរិ + អា + ករិ = បរាករិ];

ធនំ ទេហិ មហារាជ, មុត្តា វេឡុរិយា ពហូ.

៥៩. យុត្តេ ទេវ រថេ ទេហិ, អាជានីយេ ចលង្កតេ;

នាគេ ទេហិ មហារាជ, ហេមកប្បនវាសសេ.

៦០. យថា តំ សិវយោ [សីវិយោ (ស្យា.)] សព្ពេ, សយោគ្គា សរថា សទា;

សមន្តា បរិកិរេយ្យុំ [បរិករេយ្យុំ (ស្យា. បី.)], ឯវំ ទេហិ រថេសភ.

៦១. យោ វេ ទស្សន្តិ វត្វាន, អទានេ កុរុតេ មនោ;

ភូម្យំ [ភូម្យា (សី. បី.)] សោ បតិតំ បាសំ, គីវាយំ បដិមុញ្ចតិ.

៦២. យោ វេ ទស្សន្តិ វត្វាន, អទានេ កុរុតេ មនោ;

បាបា បាបតរោ ហោតិ, សម្បត្តោ យមសាធនំ.

៦៣. យញ្ហិ យាចេ តញ្ហិ ទទេ, យំ ន យាចេ ន តំ ទទេ;

ស្វាហំ តមេវ ទស្សាមិ, យំ មំ យាចតិ ព្រាហ្មណោ.

៦៤. អាយុំ នុ វណ្ណំ នុ សុខំ ពលំ នុ, កិំ បត្ថយានោ នុ ជនិន្ទ ទេសិ;

កថញ្ហិ រាជា សិវិនំ អនុត្តរោ, ចក្ខូនិ ទជ្ជា បរលោកហេតុ.

៦៥. ន វាហមេតំ យសសា ទទាមិ, ន បុត្តមិច្ឆេ ន ធនំ ន រដ្ឋំ;

សតញ្ច ធម្មោ ចរិតោ បុរាណោ, ឥច្ចេវ ទានេ រមតេ មនោ មម [មមំ (សី. បី.)].

៦៦. សខា ច មិត្តោ ច មមាសិ សីវិក [សីវក (សី. បី.)], សុសិក្ខិតោ សាធុ ករោហិ មេ វចោ;

ឧទ្ធរិត្វា [ឧទ្ធត្វ (សី.), លទ្ធ ត្វំ (បី.)] ចក្ខូនិ មមំ ជិគីសតោ, ហត្ថេសុ ឋបេហិ [អាវេសិ (សី.)] វនិព្ពកស្ស.

៦៧. ចោទិតោ សិវិរាជេន, សិវិកោ វចនង្ករោ;

រញ្ញោ ចក្ខូនុទ្ធរិត្វា [ចក្ខូនិ ឧទ្ធត្វា (សី. បី.)], ព្រាហ្មណស្សូបនាមយិ;

សចក្ខុ ព្រាហ្មណោ អាសិ, អន្ធោ រាជា ឧបាវិសិ.

៦៨. តតោ សោ កតិបាហស្ស, ឧបរូឡ្ហេសុ ចក្ខុសុ;

សូតំ អាមន្តយី រាជា, សិវីនំ រដ្ឋវឌ្ឍនោ.

៦៩. យោជេហិ សារថិ យានំ, យុត្តញ្ច បដិវេទយ;

ឧយ្យានភូមិំ គច្ឆាម, បោក្ខរញ្ញោ វនានិ ច.

៧០. សោ ច បោក្ខរណីតីរេ [បោក្ខរណិយា តីរេ (សី. បី.)], បល្លង្កេន ឧបាវិសិ;

តស្ស សក្កោ បាតុរហុ, ទេវរាជា សុជម្បតិ.

៧១. សក្កោហមស្មិ ទេវិន្ទោ, អាគតោស្មិ តវន្តិកេ;

វរំ វរស្សុ រាជីសិ, យំ កិញ្ចិ មនសិច្ឆសិ.

៧២. បហូតំ មេ ធនំ សក្ក, ពលំ កោសោ ចនប្បកោ;

អន្ធស្ស មេ សតោ ទានិ, មរណញ្ញេវ រុច្ចតិ.

៧៣. យានិ សច្ចានិ ទ្វិបទិន្ទ, តានិ ភាសស្សុ ខត្តិយ;

សច្ចំ តេ ភណមានស្ស, បុន ចក្ខុ ភវិស្សតិ.

៧៤. យេ មំ យាចិតុមាយន្តិ, នានាគោត្តា វនិព្ពកា;

យោបិ មំ យាចតេ តត្ថ, សោបិ មេ មនសោ បិយោ;

ឯតេន សច្ចវជ្ជេន, ចក្ខុ មេ ឧបបជ្ជថ.

៧៥. យំ មំ សោ យាចិតុំ អាគា, ទេហិ ចក្ខុន្តិ ព្រាហ្មណោ;

តស្ស ចក្ខូនិ បាទាសិំ, ព្រាហ្មណស្ស វនិព្ពតោ [វណិព្ពិនោ (សី.), វនិព្ពិនោ (បី.)].

៧៦. ភិយ្យោ មំ អាវិសី បីតិ, សោមនស្សញ្ចនប្បកំ;

ឯតេន សច្ចវជ្ជេន, ទុតិយំ មេ ឧបបជ្ជថ.

៧៧. ធម្មេន ភាសិតា គាថា, សិវីនំ រដ្ឋវឌ្ឍន;

ឯតានិ តវ នេត្តានិ, ទិព្ពានិ បដិទិស្សរេ.

៧៨. តិរោកុដ្ដំ តិរោសេលំ, សមតិគ្គយ្ហ បព្ពតំ;

សមន្តា យោជនសតំ, ទស្សនំ អនុភោន្តុ តេ.

៧៩. កោ នីធ វិត្តំ ន ទទេយ្យ យាចិតោ, អបិ វិសិដ្ឋំ សុបិយម្បិ អត្តនោ;

តទិង្ឃ សព្ពេ សិវយោ សមាគតា, ទិព្ពានិ នេត្តានិ មមជ្ជ បស្សថ.

៨០. តិរោកុដ្ដំ តិរោសេលំ, សមតិគ្គយ្ហ បព្ពតំ;

សមន្តា យោជនសតំ, ទស្សនំ អនុភោន្តិ មេ.

៨១. ន ចាគមត្តា បរមត្ថិ កិញ្ចិ, មច្ចានំ ឥធ ជីវិតេ;

ទត្វាន មានុសំ [ទត្វា មានុសកំ (សី.)] ចក្ខុំ, លទ្ធំ មេ [មេ ឥតិ បទំ នត្ថិ សី. បោត្ថកេ] ចក្ខុំ អមានុសំ.

៨២. ឯតម្បិ ទិស្វា សិវយោ, ទេថ ទានានិ ភុញ្ជថ;

ទត្វា ច ភុត្វា ច យថានុភាវំ, អនិន្ទិតា សគ្គមុបេថ ឋានន្តិ.

សិវិជាតកំ តតិយំ.