៤៨២. រុរុមិគរាជជាតកំ (៩)

១១៧. តស្ស [កស្ស (សី. បី.)] គាមវរំ ទម្មិ, នារិយោ ច អលង្កតា;

យោ [កោ (សី. ស្យា. បី.)] មេតំ មិគមក្ខាតិ [មក្ខាសិ (ស្យា. ក.)], មិគានំ មិគមុត្តមំ.

១១៨. មយ្ហំ គាមវរំ ទេហិ, នារិយោ ច អលង្កតា;

អហំ តេ មិគមក្ខិស្សំ, មិគានំ មិគមុត្តមំ.

១១៩. ឯតស្មិំ វនសណ្ឌស្មិំ, អម្ពា សាលា ច បុប្ផិតា;

ឥន្ទគោបកសញ្ឆន្នា, ឯត្ថេសោ តិដ្ឋតេ មិគោ.

១២០. ធនុំ អទ្វេជ្ឈំ [អទេជ្ឈំ (សី. បី.), សរជ្ជំ (ក.)] កត្វាន, ឧសុំ សន្នយ្ហុបាគមិ [សន្ធាយុបាគមិ (សី. បី.)];

មិគោ ច ទិស្វា រាជានំ, ទូរតោ អជ្ឈភាសថ.

១២១. អាគមេហិ មហារាជ, មា មំ វិជ្ឈិ រថេសភ;

កោ នុ តេ ឥទមក្ខាសិ, ឯត្ថេសោ តិដ្ឋតេ មិគោ.

១២២. ឯស បាបចរោ បោសោ, សម្ម តិដ្ឋតិ អារកា;

សោយំ [សោ ហិ (សី. ស្យា. បី.)] មេ ឥទមក្ខាសិ, ឯត្ថេសោ តិដ្ឋតេ មិគោ.

១២៣. សច្ចំ កិរេវ មាហំសុ, នរា ឯកច្ចិយា ឥធ;

កដ្ឋំ និប្លវិតំ សេយ្យោ, ន ត្វេវេកច្ចិ យោ នរោ.

១២៤. កិំ នុ រុរុ គរហសិ មិគានំ, កិំ បក្ខីនំ កិំ បន មានុសានំ;

ភយញ្ហិ មំ វិន្ទតិនប្បរូបំ, សុត្វាន តំ មានុសិំ ភាសមានំ.

១២៥. យមុទ្ធរិំ វាហនេ វុយ្ហមានំ, មហោទកេ សលិលេ សីឃសោតេ;

តតោនិទានំ ភយមាគតំ មម, ទុក្ខោ ហវេ រាជ អសព្ភិ សង្គមោ.

១២៦. សោហំ ចតុប្បត្តមិមំ វិហង្គមំ, តនុច្ឆិទំ ហទយេ ឱស្សជាមិ;

ហនាមិ តំ មិត្តទុព្ភិំ អកិច្ចការិំ [ហនាមិ មិត្តទ្ទុ’មកិច្ចការិំ (សី. បី.)], យោ តាទិសំ កម្មកតំ ន ជានេ.

១២៧. ធីរស្ស ពាលស្ស ហវេ ជនិន្ទ, សន្តោ វធំ នប្បសំសន្តិ ជាតុ;

កាមំ ឃរំ គច្ឆតុ បាបធម្មោ, យញ្ចស្ស ភដ្ឋំ តទេតស្ស ទេហិ;

អហញ្ច តេ កាមករោ ភវាមិ.

១២៨. អទ្ធា រុរុ អញ្ញតរោ សតំ សោ [សតំ’សេ (សី.)], យោ ទុព្ភតោ [ទុព្ភិនោ (ស្យា.), ទូភតោ (បី.)] មានុសស្ស ន ទុព្ភិ;

កាមំ ឃរំ គច្ឆតុ បាបធម្មោ, យញ្ចស្ស ភដ្ឋំ តទេតស្ស ទម្មិ;

អហញ្ច តេ កាមចារំ ទទាមិ.

១២៩. សុវិជានំ សិង្គាលានំ, សកុណានញ្ចវស្សិតំ;

មនុស្សវស្សិតំ រាជ, ទុព្ពិជានតរំ តតោ.

១៣០. អបិ ចេ មញ្ញតី បោសោ, ញាតិ មិត្តោ សខាតិ វា;

យោ បុព្ពេ សុមនោ ហុត្វា, បច្ឆា សម្បជ្ជតេ ទិសោ.

១៣១. សមាគតា ជានបទា, នេគមា ច សមាគតា;

មិគា សស្សានិ ខាទន្តិ, តំ ទេវោ បដិសេធតុ.

១៣២. កាមំ ជនបទោ មាសិ, រដ្ឋញ្ចាបិ វិនស្សតុ;

ន ត្វេវាហំ រុរុំ ទុព្ភេ, ទត្វា អភយទក្ខិណំ.

១៣៣. មា មេ ជនបទោ អាសិ [មា មំ ជនបទោ អហុ (ស្យា.)], រដ្ឋញ្ចាបិ វិនស្សតុ;

ន ត្វេវាហំ [ន ត្វេវ (ក. សី. ក.)] មិគរាជស្ស, វរំ ទត្វា មុសា ភណេតិ.

រុរុមិគរាជជាតកំ នវមំ.