៤៨៣. សរភមិគជាតកំ (១០)

១៣៤. អាសីសេថេវ [អាសិំសេថេវ (សី. ស្យា. បី.)] បុរិសោ, ន និព្ពិន្ទេយ្យ បណ្ឌិតោ;

បស្សាមិ វោហំ អត្តានំ, យថា ឥច្ឆិំ តថា អហុ.

១៣៥. អាសីសេថេវ បុរិសោ, ន និព្ពិន្ទេយ្យ បណ្ឌិតោ;

បស្សាមិ វោហំ អត្តានំ, ឧទកា ថលមុព្ភតំ.

១៣៦. វាយមេថេវ បុរិសោ, ន និព្ពិន្ទេយ្យ បណ្ឌិតោ;

បស្សាមិ វោហំ អត្តានំ, យថា ឥច្ឆិំ តថា អហុ.

១៣៧. វាយមេថេវ បុរិសោ, ន និព្ពិន្ទេយ្យ បណ្ឌិតោ;

បស្សាមិ វោហំ អត្តានំ, ឧទកា ថលមុព្ភតំ.

១៣៨. ទុក្ខូបនីតោបិ នរោ សបញ្ញោ, អាសំ ន ឆិន្ទេយ្យ សុខាគមាយ;

ពហូ ហិ ផស្សា អហិតា ហិតា ច, អវិតក្កិតា មច្ចមុបព្ពជន្តិ [មច្ចុមុបព្ពជន្តិ (ក. សី. បី.), មច្ចុមុបបជ្ជន្តិ (ស្យា. ក.) ឯត្ថ ‘‘អវិតក្កិតាបិ ផស្សោ មច្ចំ ជនំ ឧបគច្ឆន្តី’’តិ អត្ថោ].

១៣៩. អចិន្តិតម្បិ ភវតិ, ចិន្តិតម្បិ វិនស្សតិ;

ន ហិ ចិន្តាមយា ភោគា, ឥត្ថិយា បុរិសស្ស វា.

១៤០. សរភំ គិរិទុគ្គស្មិំ, យំ ត្វំ អនុសរី បុរេ;

អលីនចិត្តស្ស តុវំ, វិក្កន្តមនុជីវសិ [តវ, វិក្កន្តំ ជីវិតំ លភិ (ក.)].

១៤១. យោ តំ វិទុគ្គា នរកា សមុទ្ធរិ, សិលាយ យោគ្គំ សរភោ ករិត្វា;

ទុក្ខូបនីតំ មច្ចុមុខា បមោចយិ, អលីនចិត្តំ តំ មិគំ [តមេវ (ស្យា. ក.)] វទេសិ.

១៤២. កិំ ត្វំ នុ [តុវន្នុ (សី. បី.)] តត្ថេវ តទា អហោសិ, ឧទាហុ តេ កោចិ នំ [តំ (ក.)] ឯតទក្ខា;

វិវដ្ដច្ឆទ្ទោ នុសិ សព្ពទស្សី, ញាណំ នុ តេ ព្រាហ្មណ ភិំសរូបំ.

១៤៣. ន ចេវហំ តត្ថ តទា អហោសិំ, ន ចាបិ មេ កោចិ នំ [តំ (ក.)] ឯតទក្ខា;

គាថាបទានញ្ច សុភាសិតានំ, អត្ថំ តទានេន្តិ ជនិន្ទ ធីរា.

១៤៤. អាទាយ បត្តិំ [បត្តំ (ស្យា.), បដ្ដិំ (ក.)] បរវិរិយឃាតិំ, ចាបេ សរំ កិំ វិចិកិច្ឆសេ តុវំ;

នុន្នោ [នុណ្ណោ (ក. សី. ស្យា.), តុណ្ណោ (ក.)] សរោ សរភំ ហន្តុ ខិប្បំ, អន្នញ្ហិ ឯតំ វរបញ្ញ រញ្ញោ.

១៤៥. អទ្ធា បជានាមិ អហម្បិ ឯតំ, អន្នំ មិគោ ព្រាហ្មណ ខត្តិយស្ស;

បុព្ពេ កតញ្ច [បុព្ពេ ច កតំ (ក.)] អបចាយមានោ, តស្មា មិគំ សរភំ នោ ហនាមិ.

១៤៦. នេសោ មិគោ មហារាជ, អសុរេសោ ទិសម្បតិ;

ឯតំ ហន្ត្វា មនុស្សិន្ទ, ភវស្សុ អមរាធិបោ.

១៤៧. សចេ ច រាជា [រាជ (សី. ស្យា. បី.)] វិចិកិច្ឆសេ តុវំ, ហន្តុំ មិគំ សរភំ សហាយកំ [សហាយកំ មេ (សី. បី.)];

សបុត្តទារោ នរវីរសេដ្ឋ [នរវិរិយសេដ្ឋ (សី. បី.)], គន្ត្វា [គន្តា (សី. បី. អដ្ឋ.)] តុវំ វេតរណិំ យមស្ស.

១៤៨. កាមំ អហំ ជានបទា ច សព្ពេ, បុត្តា ច ទារា ច សហាយសង្ឃា;

គច្ឆេមុ តំ វេតរណិំ យមស្ស, ន ត្វេវ ហញ្ញោ មម បាណទោ យោ [បាណទ’ស្ស (សី. ស្យា. បី.)].

១៤៩. អយំ មិគោ កិច្ឆគតស្ស មយ្ហំ, ឯកស្ស កត្តា វិវនស្មិ ឃោរេ;

តំ តាទិសំ បុព្ពកិច្ចំ សរន្តោ, ជានំ មហាព្រហ្មេ កថំ ហនេយ្យំ.

១៥០. មិត្តាភិរាធី ចិរមេវ ជីវ, រជ្ជំ ឥមំ ធម្មគុណេ [រជ្ជម្បិមំ ចស្ស គណេ (ក.)] បសាស;

នារីគណេហិ បរិចារិយន្តោ, មោទស្សុ រដ្ឋេ តិទិវេវ វាសវោ.

១៥១. អក្កោធនោ និច្ចបសន្នចិត្តោ, សព្ពាតិថី យាចយោគោ ភវិត្វា [បាហុនកេ ករិត្វា (ស្យា.), យាចយោគោ វិទិត្វា (ក.)];

ទត្វា ច ភុត្វា ច យថានុភាវំ, អនិន្ទិតោ សគ្គមុបេហិ ឋានន្តិ.

សរភមិគជាតកំ ទសមំ.

តេរសកនិបាតំ និដ្ឋិតំ.