៤៨១. តក្ការិយជាតកំ (៨)

១០៤. អហមេវ ទុព្ភាសិតំ ភាសិ ពាលោ, ភេកោវរញ្ញេ អហិមវ្ហាយមានោ [មវ្ហយានោ (សី. បី.)];

តក្ការិយេ សោព្ភមិមំ [សោព្ភម្ហិ អហំ (ក.)] បតាមិ, ន កិរេវ សាធុ អតិវេលភាណី [សាធូត្យតិវេលភាណី (ក.)].

១០៥. បប្បោតិ មច្ចោ អតិវេលភាណី, ពន្ធំ វធំ សោកបរិទ្ទវញ្ច;

អត្តានមេវ គរហាសិ ឯត្ថ, អាចេរ យំ តំ និខណន្តិ សោព្ភេ.

១០៦. កិមេវហំ តុណ្ឌិលមនុបុច្ឆិំ, ករេយ្យ សំ [ករេយ្យាសំ (ស្យា.), ករេយ្យ ស (ក.), ភរេយ្យ សំ (?)] ភាតរំ កាឡិកាយំ [កាឡិកាយ (ស្យា. ក.)];

នគ្គោវហំ [នគ្គោច’ហំ (?)] វត្ថយុគញ្ច ជីនោ, អយម្បិ អត្ថោ ពហុតាទិសោវ.

១០៧. យោ យុជ្ឈមានានមយុជ្ឈមានោ [យុជ្ឈមានេន អយុជ្ឈមានោ (ក.)], មេណ្ឌន្តរំ អច្ចុបតី កុលិង្គោ;

សោ បិំសិតោ មេណ្ឌសិរេហិ តត្ថ, អយម្បិ អត្ថោ ពហុតាទិសោវ.

១០៨. ចតុរោ ជនា បោត្ថកមគ្គហេសុំ, ឯកញ្ច បោសំ អនុរក្ខមានា;

សព្ពេវ តេ ភិន្នសិរា សយិំសុ, អយម្បិ អត្ថោ ពហុតាទិសោវ.

១០៩. អជា យថា វេឡុគុម្ពស្មិំ ពទ្ធា [ពន្ធំ (ស្យា. ក.)], អវក្ខិបន្តី អសិមជ្ឈគច្ឆិ;

តេនេវ តស្សា គលកាវកន្តំ [គលយា វិកន្តុំ (ក.), គលកំ វិកន្តា (ស្យា.)], អយម្បិ អត្ថោ ពហុតាទិសោវ.

១១០. ឥមេ ន ទេវា ន គន្ធព្ពបុត្តា, មិគា ឥមេ អត្ថវសំ គតា មេ [អត្ថវសាភតា ឥមេ (សី. ស្យា. បី.)];

ឯកញ្ច នំ សាយមាសេ បចន្តុ, ឯកំ បុនប្បាតរាសេ [ឯកញ្ច នំ បាតរាសេ (ក. សី. បី.)] បចន្តុ.

១១១. សតំ សហស្សានិ ទុភាសិតានិ, កលម្បិ នាគ្ឃន្តិ សុភាសិតស្ស;

ទុព្ភាសិតំ សង្កមានោ កិលេសោ [កិលិស្សតិ (?)], តស្មា តុណ្ហី កិម្បុរិសា [កិំបុរិសោ (សី. ស្យា.)] ន ពាល្យា.

១១២. យា មេសា ព្យាហាសិ [ព្យាកាសិ (សី. ស្យា. បី.)] បមុញ្ចថេតំ, គិរិញ្ច នំ [គិរិំ វរំ (ក.)] ហិមវន្តំ នយន្តុ;

ឥមញ្ច ខោ ទេន្តុ មហានសាយ, បាតោវ នំ បាតរាសេ បចន្តុ.

១១៣. បជ្ជុន្ននាថា បសវោ, បសុនាថា អយំ បជា;

ត្វំ នាថោសិ [ត្វំ-នាថោ’ស្មិ (សី. ស្យា. បី.)] មហារាជ, នាថោហំ ភរិយាយ មេ [អម្ហ-នាថា មម ភរិយា (ក. សី. ស្យា.)];

ទ្វិន្នមញ្ញតរំ ញត្វា, មុត្តោ គច្ឆេយ្យ បព្ពតំ.

១១៤. ន វេ និន្ទា សុបរិវជ្ជយេថ [សុបរិវជ្ជយាថ (ស្យា.)], នានា ជនា សេវិតព្ពា ជនិន្ទ;

យេនេវ ឯកោ លភតេ បសំសំ, តេនេវ អញ្ញោ លភតេ និន្ទិតារំ.

១១៥. សព្ពោ លោកោ បរិចិត្តោ អតិចិត្តោ [បរចិត្តេន អតិចិត្តោ (សី. ស្យា.), បរចិត្តេន អចិត្តោ (សី. អដ្ឋ.)], សព្ពោ លោកោ ចិត្តវា សម្ហិ ចិត្តេ;

បច្ចេកចិត្តា បុថុ សព្ពសត្តា, កស្សីធ ចិត្តស្ស វសេ ន វត្តេ.

១១៦. តុណ្ហី អហូ កិម្បុរិសោ សភរិយោ [អភាណី (ក.)], យោ ទានិ ព្យាហាសិ ភយស្ស ភីតោ;

សោ ទានិ មុត្តោ សុខិតោ អរោគោ, វាចាកិរេវត្តវតី នរានន្តិ.

តក្ការិយជាតកំ អដ្ឋមំ.