៤៧៣. មិត្តាមិត្តជាតកំ (១០)

១២១. កានិ កម្មានិ កុព្ពានំ, កថំ វិញ្ញូ បរក្កមេ;

អមិត្តំ ជានេយ្យ មេធាវី, ទិស្វា សុត្វា ច បណ្ឌិតោ.

១២២. ន នំ ឧម្ហយតេ ទិស្វា, ន ច នំ បដិនន្ទតិ;

ចក្ខូនិ ចស្ស [ចក្ខូនិស្ស (ស្យា. ក.)] ន ទទាតិ, បដិលោមញ្ច វត្តតិ.

១២៣. អមិត្តេ តស្ស ភជតិ, មិត្តេ តស្ស ន សេវតិ;

វណ្ណកាមេ និវារេតិ, អក្កោសន្តេ បសំសតិ.

១២៤. គុយ្ហញ្ច តស្ស នក្ខាតិ, តស្ស គុយ្ហំ ន គូហតិ;

កម្មំ តស្ស ន វណ្ណេតិ, បញ្ញស្ស នប្បសំសតិ.

១២៥. អភវេ នន្ទតិ តស្ស, ភវេ តស្ស ន នន្ទតិ;

អច្ឆេរំ [អច្ឆរិយំ (សី. ស្យា. បី.)] ភោជនំ លទ្ធា, តស្ស នុប្បជ្ជតេ សតិ;

តតោ នំ នានុកម្បតិ, អហោ សោបិ [អហាសោបិ (ក. សី. ស្យា. ក.)] លភេយ្យិតោ.

១២៦. ឥច្ចេតេ សោឡសាការា, អមិត្តស្មិំ បតិដ្ឋិតា;

យេហិ អមិត្តំ ជានេយ្យ, ទិស្វា សុត្វា ច បណ្ឌិតោ.

១២៧. កានិ កម្មានិ កុព្ពានំ, កថំ វិញ្ញូ បរក្កមេ;

មិត្តំ ជានេយ្យ មេធាវី, ទិស្វា សុត្វា ច បណ្ឌិតោ.

១២៨. បវុត្ថំ តស្ស សរតិ, អាគតំ អភិនន្ទតិ;

តតោ កេលាយិតោ ហោតិ, វាចាយ បដិនន្ទតិ.

១២៩. មិត្តេ តស្សេវ ភជតិ, អមិត្តេ តស្ស ន សេវតិ;

អក្កោសន្តេ និវារេតិ, វណ្ណកាមេ បសំសតិ.

១៣០. គុយ្ហញ្ច តស្ស អក្ខាតិ, តស្ស គុយ្ហញ្ច គូហតិ;

កម្មញ្ច តស្ស វណ្ណេតិ, បញ្ញំ តស្ស [បញ្ញមស្ស (ស្យា. ក.)] បសំសតិ.

១៣១. ភវេ ច នន្ទតិ តស្ស [ភវេ នន្ទតិ តស្ស ច (ក.)], អភវេ តស្ស ន នន្ទតិ;

អច្ឆេរំ [អច្ឆរិយំ (សី. ស្យា. បី.)] ភោជនំ លទ្ធា, តស្ស ឧប្បជ្ជតេ សតិ;

តតោ នំ អនុកម្បតិ, អហោ សោបិ [បហាសោបិ (ក. សី. ស្យា. ក.)] លភេយ្យិតោ.

១៣២. ឥច្ចេតេ សោឡសាការា, មិត្តស្មិំ សុប្បតិដ្ឋិតា;

យេហិ មិត្តញ្ច ជានេយ្យ [មិត្តំ សុជានេយ្យ (បី. ក.)], ទិស្វា សុត្វា ច បណ្ឌិតោតិ.

មិត្តាមិត្តជាតកំ ទសមំ.

ទ្វាទសកនិបាតំ និដ្ឋិតំ.