៤៧២. មហាបទុមជាតកំ (៩)

១០៦. នាទដ្ឋា [នាទិដ្ឋា (ក. សី. ស្យា. ក.)] បរតោ ទោសំ, អណុំ ថូលានិ សព្ពសោ;

ឥស្សរោ បណយេ ទណ្ឌំ, សាមំ អប្បដិវេក្ខិយ.

១០៧. យោ ច អប្បដិវេក្ខិត្វា, ទណ្ឌំ កុព្ពតិ ខត្តិយោ;

សកណ្ដកំ សោ គិលតិ, ជច្ចន្ធោវ សមក្ខិកំ.

១០៨. អទណ្ឌិយំ ទណ្ឌយតិ [ទណ្ឌិយតិ (ស្យា. បី.)], ទណ្ឌិយញ្ច អទណ្ឌិយំ [អទណ្ឌិយ (និយ្យ), ន ទណ្ឌយេ (?)];

អន្ធោវ វិសមំ មគ្គំ, ន ជានាតិ សមាសមំ.

១០៩. យោ ច ឯតានិ ឋានានិ, អណុំ ថូលានិ សព្ពសោ;

សុទិដ្ឋមនុសាសេយ្យ, ស វេ វោហរិតុ [វោហាតុ (បី.)] មរហតិ.

១១០. នេកន្តមុទុនា សក្កា, ឯកន្តតិខិណេន វា;

អត្តំ មហន្តេ [មហត្តេ (ស្យា. ក.)] ឋបេតុំ [ឋាបេតុំ (សី. ស្យា. បី.)], តស្មា ឧភយមាចរេ.

១១១. បរិភូតោ មុទុ ហោតិ, អតិតិក្ខោ ច វេរវា;

ឯតញ្ច ឧភយំ ញត្វា, អនុមជ្ឈំ សមាចរេ.

១១២. ពហុម្បិ រត្តោ ភាសេយ្យ, ទុដ្ឋោបិ ពហុ ភាសតិ;

ន ឥត្ថិការណា រាជ, បុត្តំ ឃាតេតុមរហសិ.

១១៣. សព្ពោវ [សព្ពោ ច (ក. សី. បី.)] លោកោ ឯកតោ [ឯកន្តោ (សី. បី.)], ឥត្ថី ច អយមេកិកា;

តេនាហំ បដិបជ្ជិស្សំ, គច្ឆថ បក្ខិបថេវ [បក្ខិបេថ (ស្យា. អដ្ឋ.)] តំ.

១១៤. អនេកតាលេ នរកេ, គម្ភីរេ ច សុទុត្តរេ [គម្ភីរេ សុទុរុត្តរេ (បី. ក.)];

បាតិតោ គិរិទុគ្គស្មិំ, កេន ត្វំ តត្ថ នាមរិ.

១១៥. នាគោ ជាតផណោ តត្ថ, ថាមវា គិរិសានុជោ;

បច្ចគ្គហិ មំ ភោគេហិ, តេនាហំ តត្ថ នាមរិំ.

១១៦. ឯហិ តំ បដិនេស្សាមិ, រាជបុត្ត សកំ ឃរំ;

រជ្ជំ ការេហិ [ការេសិ (សី.)] ភទ្ទន្តេ, កិំ អរញ្ញេ ករិស្សសិ.

១១៧. យថា គិលិត្វា ពឡិសំ, ឧទ្ធរេយ្យ សលោហិតំ;

ឧទ្ធរិត្វា សុខី អស្ស, ឯវំ [សុខំ (បី. ក.)] បស្សាមិ អត្តនំ [អត្តនិ (បី. ក.), អត្តនា (ស្យា.), ឯវំ អហម្បិ បុន សោត្ថិភាវប្បត្តំ គិលិតពឡិសំ បុរិសមិវ អត្តានំ បស្សាមីតិ (អដ្ឋ. សំវណ្ណនា)].

១១៨. កិំ នុ ត្វំ ពឡិសំ ព្រូសិ, កិំ ត្វំ ព្រូសិ សលោហិតំ;

កិំ នុ ត្វំ ឧព្ភតំ ព្រូសិ, តំ មេ អក្ខាហិ បុច្ឆិតោ.

១១៩. កាមាហំ ពឡិសំ ព្រូមិ, ហត្ថិអស្សំ សលោហិតំ;

ចត្តាហំ ឧព្ភតំ ព្រូមិ, ឯវំ ជានាហិ ខត្តិយ.

១២០. ចិញ្ចាមាណវិកា មាតា, ទេវទត្តោ ច មេ បិតា;

អានន្ទោ បណ្ឌិតោ នាគោ, សារិបុត្តោ ច ទេវតា;

រាជបុត្តោ អហំ អាសិំ [អហំ តទា រាជបុត្តោ (សី. ស្យា. បី.)], ឯវំ ធារេថ ជាតកន្តិ.

មហាបទុមជាតកំ នវមំ.