៤៧១. មេណ្ឌកបញ្ហជាតកំ (៨)

៩៤. យេសំ ន កទាចិ ភូតបុព្ពំ, សខ្យំ [សក្ខិំ (សី. បី.), សខិ (ស្យា.)] សត្តបទម្បិមស្មិ លោកេ;

ជាតា អមិត្តា ទុវេ សហាយា, បដិសន្ធាយ ចរន្តិ កិស្ស ហេតុ.

៩៥. យទិ មេ អជ្ជ បាតរាសកាលេ, បញ្ហំ ន សក្កុណេយ្យាថ វត្តុមេតំ;

រដ្ឋា បព្ពាជយិស្សាមិ វោ សព្ពេ, ន ហិ មត្ថោ ទុប្បញ្ញជាតិកេហិ.

៩៦. មហាជនសមាគមម្ហិ ឃោរេ, ជនកោលាហលសង្គមម្ហិ ជាតេ;

វិក្ខិត្តមនា អនេកចិត្តា, បញ្ហំ ន សក្កុណោម វត្តុមេតំ.

៩៧. ឯកគ្គចិត្តាវ ឯកមេកា, រហសិ គតា អត្ថំ និចិន្តយិត្វា [អត្ថានិ ចិន្តយិត្វា (ស្យា. ក.)];

បវិវេកេ សម្មសិត្វាន ធីរា, អថ វក្ខន្តិ ជនិន្ទ ឯតមត្ថំ.

៩៨. ឧគ្គបុត្ត-រាជបុត្តិយានំ, ឧរព្ភស្ស មំសំ បិយំ មនាបំ;

ន សុនខស្ស តេ អទេន្តិ មំសំ, អថ មេណ្ឌស្ស សុណេន សខ្យមស្ស.

៩៩. ចម្មំ វិហនន្តិ ឯឡកស្ស, អស្សបិដ្ឋត្ថរស្សុខស្ស [អស្សបិដ្ឋត្ថរណសុខស្ស (សី.)] ហេតុ;

ន ច តេ សុនខស្ស អត្ថរន្តិ, អថ មេណ្ឌស្ស សុណេន សខ្យមស្ស.

១០០. អាវេល្លិតសិង្គិកោ ហិ មេណ្ឌោ, ន ច សុនខស្ស វិសាណកានិ អត្ថិ;

តិណភក្ខោ មំសភោជនោ ច, អថ មេណ្ឌស្ស សុណេន សខ្យមស្ស.

១០១. តិណមាសិ បលាសមាសិ មេណ្ឌោ, ន ច សុនខោ តិណមាសិ នោ បលាសំ;

គណ្ហេយ្យ សុណោ សសំ ពិឡារំ, អថ មេណ្ឌស្ស សុណេន សខ្យមស្ស.

១០២. អដ្ឋឌ្ឍបទោ ចតុប្បទស្ស, មេណ្ឌោ អដ្ឋនខោ អទិស្សមានោ;

ឆាទិយមាហរតី អយំ ឥមស្ស, មំសំ អាហរតី អយំ អមុស្ស.

១០៣. បាសាទវរគតោ វិទេហសេដ្ឋោ, វិតិហារំ អញ្ញមញ្ញភោជនានំ;

អទ្ទក្ខិ [អទ្ទស (ស្យា. ក.)] កិរ សក្ខិកំ ជនិន្ទោ, ពុភុក្កស្ស បុណ្ណំ មុខស្ស [ភោភុក្ខស្ស ច បុណ្ណមុខស្ស (សី.)] ចេតំ.

១០៤. លាភា វត មេ អនប្បរូបា, យស្ស មេទិសា បណ្ឌិតា កុលម្ហិ;

បញ្ហស្ស គម្ភីរគតំ និបុណមត្ថំ, បដិវិជ្ឈន្តិ សុភាសិតេន ធីរា.

១០៥. អស្សតរិរថញ្ច ឯកមេកំ, ផីតំ គាមវរញ្ច ឯកមេកំ;

សព្ពេសំ វោ ទម្មិ បណ្ឌិតានំ, បរមប្បតីតមនោ សុភាសិតេនាតិ.

មេណ្ឌកបញ្ហជាតកំ អដ្ឋមំ.