៤៦៣. សុប្បារកជាតកំ (៩)

១០៨. ឧម្មុជ្ជន្តិ និមុជ្ជន្តិ, មនុស្សា ខុរនាសិកា;

សុប្បារកំ តំ បុច្ឆាម, សមុទ្ទោ កតមោ អយំ.

១០៩. កុរុកច្ឆា [ភរុកច្ឆា (សី. ស្យា. បី. អដ្ឋ.)] បយាតានំ, វាណិជានំ ធនេសិនំ;

នាវាយ វិប្បនដ្ឋាយ, ខុរមាលីតិ វុច្ចតិ.

១១០. យថា អគ្គីវ សុរិយោវ [អគ្គិ សុរិយោ ច (ស្យា.), អគ្គីវ សូរិយោ (ក.)], សមុទ្ទោ បដិទិស្សតិ;

សុប្បារកំ តំ បុច្ឆាម, សមុទ្ទោ កតមោ អយំ.

១១១. កុរុកច្ឆា បយាតានំ, វាណិជានំ ធនេសិនំ;

នាវាយ វិប្បនដ្ឋាយ, អគ្គិមាលីតិ វុច្ចតិ.

១១២. យថា ទធីវ ខីរំវ [ទធិ ច ខីរំ ច (ស្យា.), ឯវមុបរិបិ], សមុទ្ទោ បដិទិស្សតិ;

សុប្បារកំ តំ បុច្ឆាម, សមុទ្ទោ កតមោ អយំ.

១១៣. កុរុកច្ឆា បយាតានំ, វាណិជានំ ធនេសិនំ;

នាវាយ វិប្បនដ្ឋាយ, ទធិមាលីតិ [ខីរមាលីតិ (ក.)] វុច្ចតិ.

១១៤. យថា កុសោវ សស្សោវ, សមុទ្ទោ បដិទិស្សតិ;

សុប្បារកំ តំ បុច្ឆាម, សមុទ្ទោ កតមោ អយំ.

១១៥. កុរុកច្ឆា បយាតានំ, វាណិជានំ ធនេសិនំ;

នាវាយ វិប្បនដ្ឋាយ, កុសមាលីតិ វុច្ចតិ.

១១៦. យថា នឡោវ វេឡូវ, សមុទ្ទោ បដិទិស្សតិ;

សុប្បារកំ តំ បុច្ឆាម, សមុទ្ទោ កតមោ អយំ.

១១៧. កុរុកច្ឆា បយាតានំ, វាណិជានំ ធនេសិនំ;

នាវាយ វិប្បនដ្ឋាយ, នឡមាលីតិ វុច្ចតិ.

១១៨. មហព្ភយោ ភិំសនកោ, សទ្ទោ សុយ្យតិមានុសោ [សមុទ្ទោ សុយ្យត’មានុសោ (សី. បី. អដ្ឋ.)];

យថា សោព្ភោ បបាតោវ, សមុទ្ទោ បដិទិស្សតិ;

សុប្បារកំ តំ បុច្ឆាម, សមុទ្ទោ កតមោ អយំ.

១១៩. កុរុកច្ឆា បយាតានំ, វាណិជានំ ធនេសិនំ;

នាវាយ វិប្បនដ្ឋាយ, ពឡវាមុខីតិ [វឡភាមុខីតិ (សី. ស្យា.), ពលវាមុខីតិ (ស្យា. ក.)] វុច្ចតិ.

១២០. យតោ សរាមិ អត្តានំ, យតោ បត្តោស្មិ វិញ្ញុតំ;

នាភិជានាមិ សញ្ចិច្ច, ឯកបាណម្បិ ហិំសិតំ;

ឯតេន សច្ចវជ្ជេន, សោត្ថិំ នាវា និវត្តតូតិ.

សុប្បារកជាតកំ នវមំ.

ឯកាទសកនិបាតំ និដ្ឋិតំ.