៤៦២. សំវរជាតកំ (៨)

៩៧. ជានន្តោ នោ មហារាជ, តវ សីលំ ជនាធិបោ;

ឥមេ កុមារេ បូជេន្តោ, ន តំ កេនចិ មញ្ញថ.

៩៨. តិដ្ឋន្តេ នោ មហារាជេ, អទុ [អាទុ (សី. បី.), អាទូ (ស្យា.)] ទេវេ ទិវង្គតេ;

ញាតី តំ សមនុញ្ញិំសុ, សម្បស្សំ អត្ថមត្តនោ.

៩៩. កេន សំវរវត្តេន, សញ្ជាតេ អភិតិដ្ឋសិ;

កេន តំ នាតិវត្តន្តិ, ញាតិសង្ឃា សមាគតា.

១០០. ន រាជបុត្ត ឧសូយាមិ [រាជបុត្ត នុស្សុយ្យាមិ (ក.)], សមណានំ មហេសិនំ;

សក្កច្ចំ តេ នមស្សាមិ, បាទេ វន្ទាមិ តាទិនំ.

១០១. តេ មំ ធម្មគុណេ យុត្តំ, សុស្សូសមនុសូយកំ;

សមណា មនុសាសន្តិ [សមនុសាសន្តិ (សី. ស្យា. បី.)], ឥសី ធម្មគុណេ រតា.

១០២. តេសាហំ វចនំ សុត្វា, សមណានំ មហេសិនំ;

ន កិញ្ចិ អតិមញ្ញាមិ, ធម្មេ មេ និរតោ មនោ.

១០៣. ហត្ថារោហា អនីកដ្ឋា, រថិកា បត្តិការកា;

តេសំ [តេសុ (បី.)] នប្បដិពន្ធាមិ, និវិដ្ឋំ [និពទ្ធំ (សី. បី.)] ភត្តវេតនំ.

១០៤. មហាមត្តា ច មេ អត្ថិ, មន្តិនោ បរិចារកា;

ពារាណសិំ វោហរន្តិ, ពហុមំសសុរោទកំ.

១០៥. អថោបិ វាណិជា ផីតា, នានារដ្ឋេហិ អាគតា;

តេសុ មេ វិហិតា រក្ខា, ឯវំ ជានាហុបោសថ.

១០៦. ធម្មេន កិរ ញាតីនំ, រជ្ជំ ការេហិ សំវរ;

មេធាវី បណ្ឌិតោ ចាសិ [ចាបិ (សី. បី.)], អថោបិ ញាតិនំ ហិតោ.

១០៧. តំ តំ ញាតិបរិព្យូឡ្ហំ, នានារតនមោចិតំ;

អមិត្តា នប្បសហន្តិ, ឥន្ទំវ អសុរាធិបោតិ.

សំវរជាតកំ អដ្ឋមំ.