៤៦១. ទសរថជាតកំ (៧)

៨៤. ឯថ លក្ខណ សីតា ច, ឧភោ ឱតរថោទកំ;

ឯវាយំ ភរតោ អាហ, ‘‘រាជា ទសរថោ មតោ’’.

៨៥. កេន រាមប្បភាវេន, សោចិតព្ពំ ន សោចសិ;

បិតរំ កាលកតំ [កាលង្កតំ (ក.)] សុត្វា, ន តំ បសហតេ ទុខំ.

៨៦. យំ ន សក្កា និបាលេតុំ, បោសេន លបតំ ពហុំ;

ស កិស្ស វិញ្ញូ មេធាវី, អត្តានមុបតាបយេ.

៨៧. ទហរា ច ហិ វុទ្ធា ច [យេ វុទ្ធា (សី. អដ្ឋ.), យេ វុឌ្ឍា (ស្យា.)], យេ ពាលា យេ ច បណ្ឌិតា;

អឌ្ឍា ចេវ ទលិទ្ទា ច, សព្ពេ មច្ចុបរាយណា.

៨៨. ផលានមិវ បក្កានំ, និច្ចំ បតនតោ ភយំ;

ឯវំ ជាតាន មច្ចានំ, និច្ច មរណតោ ភយំ.

៨៩. សាយមេកេ ន ទិស្សន្តិ, បាតោ ទិដ្ឋា ពហុជ្ជនា;

បាតោ ឯកេ ន ទិស្សន្តិ, សាយំ ទិដ្ឋា ពហុជ្ជនា.

៩០. បរិទេវយមានោ ចេ, កិញ្ចិទត្ថំ ឧទព្ពហេ;

សម្មូឡ្ហោ ហិំសមត្តានំ, កយិរា តំ វិចក្ខណោ.

៩១. កិសោ វិវណ្ណោ ភវតិ, ហិំសមត្តានមត្តនោ [មត្តនា (សី. អដ្ឋ. សុ. និ. ៥៩០)];

ន តេន បេតា បាលេន្តិ, និរត្ថា បរិទេវនា.

៩២. យថា សរណមាទិត្តំ, វារិនា បរិនិព្ពយេ [វារិនាវនិព្ពាបយេ (ស្យា. ក.)];

ឯវម្បិ ធីរោ សុតវា, មេធាវី បណ្ឌិតោ នរោ;

ខិប្បមុប្បតិតំ សោកំ, វាតោ តូលំវ ធំសយេ.

៩៣. មច្ចោ ឯកោវ [ឯកោវ មច្ចោ (សី. ស្យា. បី.)] អច្ចេតិ, ឯកោវ ជាយតេ កុលេ;

សំយោគបរមាត្វេវ, សម្ភោគា សព្ពបាណិនំ.

៩៤. តស្មា ហិ ធីរស្ស ពហុស្សុតស្ស, សម្បស្សតោ លោកមិមំ បរញ្ច;

អញ្ញាយ ធម្មំ ហទយំ មនញ្ច, សោកា មហន្តាបិ ន តាបយន្តិ.

៩៥. សោហំ ទស្សញ្ច ភោក្ខញ្ច, ភរិស្សាមិ ច [សោហំ យសញ្ច ភោគញ្ច, ភរិយាបិ ច (ស្យា. ក.)] ញាតកេ;

សេសញ្ច បាលយិស្សាមិ, កិច្ចមេតំ [កិច្ចមេវំ (បី.)] វិជានតោ.

៩៦. ទស វស្សសហស្សានិ, សដ្ឋិ វស្សសតានិ ច;

កម្ពុគីវោ មហាពាហុ, រាមោ រជ្ជមការយីតិ.

ទសរថជាតកំ សត្តមំ.