៤៦០. យុធញ្ចយជាតកំ (៦)

៧៣. មិត្តាមច្ចបរិព្យូឡ្ហំ [បរិព្ពូឡ្ហំ (សី. បី.)], អហំ វន្ទេ រថេសភំ;

បព្ពជិស្សាមហំ រាជ [បព្ពជិស្សំ មហារាជ (សី. បី.)], តំ ទេវោ អនុមញ្ញតុ.

៧៤. សចេ តេ ឩនំ កាមេហិ, អហំ បរិបូរយាមិ [អហំវ បូរយាមិ (ក.)] តេ;

យោ តំ ហិំសតិ វារេមិ, មា បព្ពជ [បព្ពជិ (បី.)] យុធញ្ចយ [យុធញ្ជយ (សី. ស្យា.), យុវញ្ជយ (បី.)].

៧៥. ន មត្ថិ ឩនំ កាមេហិ, ហិំសិតា មេ ន វិជ្ជតិ;

ទីបញ្ច កាតុមិច្ឆាមិ, យំ ជរា នាភិកីរតិ.

៧៦. បុត្តោ វា បិតរំ យាចេ, បិតា វា បុត្តមោរសំ;

នេគមោ តំ យាចេ [នេគមោ យាចតេ (សី. ស្យា. បី.)] តាត, មា បព្ពជ យុធញ្ចយ.

៧៧. មា មំ ទេវ និវារេហិ, បព្ពជន្តំ រថេសភ;

មាហំ កាមេហិ សម្មត្តោ, ជរាយ វសមន្វគូ.

៧៨. អហំ តំ តាត យាចាមិ, អហំ បុត្ត និវារយេ;

ចិរំ តំ ទដ្ឋុមិច្ឆាមិ, មា បព្ពជ យុធញ្ចយ.

៧៩. ឧស្សាវោវ តិណគ្គម្ហិ, សូរិយុគ្គមនំ បតិ;

ឯវមាយុ មនុស្សានំ, មា មំ អម្ម និវារយ.

៨០. តរមានោ ឥមំ យានំ, អារោបេតុ [តរមានា ឥមំ យានំ, អារោបេន្តុ (សី. បី.)] រថេសភ;

មា មេ មាតា តរន្តស្ស, អន្តរាយករា អហុ.

៨១. អភិធាវថ ភទ្ទន្តេ, សុញ្ញំ ហេស្សតិ រម្មកំ;

យុធញ្ចយោ អនុញ្ញាតោ, សព្ពទត្តេន រាជិនា.

៨២. យោហុ សេដ្ឋោ សហស្សស្ស [មនុស្សានំ (ស្យា.), សហស្សានំ (ក.)], យុវា កញ្ចនសន្និភោ;

សោយំ កុមារោ បព្ពជិតោ, កាសាយវសនោ ពលី.

៨៣. ឧភោ កុមារា បព្ពជិតា, យុធញ្ចយោ យុធិដ្ឋិលោ;

បហាយ មាតាបិតរោ, សង្គំ ឆេត្វាន មច្ចុនោតិ.

យុធញ្ចយជាតកំ ឆដ្ឋំ.