៤៥៩. បានីយជាតកំ (៥)

៥៩. មិត្តោ មិត្តស្ស បានីយំ, អទិន្នំ បរិភុញ្ជិសំ;

តេន បច្ឆា វិជិគុច្ឆិំ, តំ បាបំ បកតំ មយា;

មា បុន អករំ បាបំ, តស្មា បព្ពជិតោ អហំ.

៦០. បរទារញ្ច ទិស្វាន, ឆន្ទោ មេ ឧទបជ្ជថ [ឧបបជ្ជថ (ស្យា. ក.)];

តេន បច្ឆា វិជិគុច្ឆិំ, តំ បាបំ បកតំ មយា;

មា បុន អករំ បាបំ, តស្មា បព្ពជិតោ អហំ.

៦១. បិតរំ មេ មហារាជ, ចោរា អគណ្ហុ [អគណ្ហុំ (សី. បី.), អគណ្ហិ (ក.)] កាននេ;

តេសាហំ បុច្ឆិតោ ជានំ, អញ្ញថា នំ វិយាករិំ.

៦២. តេន បច្ឆា វិជិគុច្ឆិំ, តំ បាបំ បកតំ មយា;

មា បុន អករំ បាបំ, តស្មា បព្ពជិតោ អហំ.

៦៣. បាណាតិបាតមករុំ, សោមយាគេ ឧបដ្ឋិតេ;

តេសាហំ សមនុញ្ញាសិំ, តេន បច្ឆា វិជិគុច្ឆិំ.

៦៤. តំ បាបំ បកតំ មយា, មា បុន អករំ បាបំ;

តស្មា បព្ពជិតោ អហំ.

៦៥. សុរាមេរយមាធុកា [មធុកា (សី. ស្យា. បី.)], យេ ជនា បឋមាសុ នោ;

ពហូនំ តេ អនត្ថាយ, មជ្ជបានមកប្បយុំ.

៦៦. តេសាហំ សមនុញ្ញាសិំ, តេន បច្ឆា វិជិគុច្ឆិំ;

តំ បាបំ បកតំ មយា, មា បុន អករំ បាបំ;

តស្មា បព្ពជិតោ អហំ.

៦៧. ធិរត្ថុ សុពហូ កាមេ, ទុគ្គន្ធេ ពហុកណ្ដកេ;

យេ អហំ បដិសេវន្តោ, នាលភិំ តាទិសំ សុខំ.

៦៨. មហស្សាទា សុខា កាមា, នត្ថិ កាមា បរំ [កាមបរំ (សី. បី.)] សុខំ;

យេ កាមេ បដិសេវន្តិ, សគ្គំ តេ ឧបបជ្ជរេ.

៦៩. អប្បស្សាទា ទុខា កាមា, នត្ថិ កាមា បរំ ទុខំ;

យេ កាមេ បដិសេវន្តិ, និរយំ តេ ឧបបជ្ជរេ.

៧០. អសី យថា សុនិសិតោ, នេត្តិំសោវ សុបាយិកោ [សុបាសិតោ (ក. សី. និយ្យ), សុបាយិតោ (ក. អដ្ឋ.)];

សត្តីវ ឧរសិ ខិត្តា, កាមា ទុក្ខតរា តតោ.

៧១. អង្គារានំវ ជលិតំ, កាសុំ សាធិកបោរិសំ;

ផាលំវ ទិវសំតត្តំ, កាមា ទុក្ខតរា តតោ.

៧២. វិសំ យថា ហលាហលំ, តេលំ បក្កុថិតំ [ឧក្កដ្ឋិតំ (សី. បី.), បក្កុដ្ឋិតំ (ស្យា.)] យថា;

តម្ពលោហ [តម្បលោហំ (ស្យា.)] វិលីនំវ, កាមា ទុក្ខតរា តតោតិ.

បានីយជាតកំ បញ្ចមំ.