៤៥៤. ឃដបណ្ឌិតជាតកំ (១៦)

១៦៥. ឧដ្ឋេហិ កណ្ហ កិំ សេសិ, កោ អត្ថោ សុបនេន តេ;

យោបិ តុយ្ហំ [តាយំ (បី.)] សកោ ភាតា, ហទយំ ចក្ខុ ច [ចក្ខុំវ (បី.)] ទក្ខិណំ;

តស្ស វាតា ពលីយន្តិ, ឃដោ ជប្បតិ [សសំ ជប្បតិ (?)] កេសវ.

១៦៦. តស្ស តំ វចនំ សុត្វា, រោហិណេយ្យស្ស កេសវោ;

តរមានរូបោ វុដ្ឋាសិ, ភាតុសោកេន អដ្ដិតោ.

១៦៧. កិំ នុ ឧម្មត្តរូបោវ, កេវលំ ទ្វារកំ ឥមំ;

សសោ សសោតិ លបសិ, កោ នុ តេ សសមាហរិ.

១៦៨. សោវណ្ណមយំ មណីមយំ, លោហមយំ អថ រូបិយាមយំ;

សង្ខសិលាបវាឡមយំ, ការយិស្សាមិ តេ សសំ.

១៦៩. សន្តិ អញ្ញេបិ សសកា, អរញ្ញេ វនគោចរា;

តេបិ តេ អានយិស្សាមិ, កីទិសំ សសមិច្ឆសិ.

១៧០. ន ចាហមេតេ [ន ចាហមេតំ (សី.), ន វាហមេតេ (ស្យា.), ន វាហមេតំ (បី.)] ឥច្ឆាមិ, យេ សសា បថវិស្សិតា [បឋវិំសិតា (សី. ស្យា. បី.)];

ចន្ទតោ សសមិច្ឆាមិ, តំ មេ ឱហរ កេសវ.

១៧១. សោ នូន មធុរំ ញាតិ, ជីវិតំ វិជហិស្សសិ;

អបត្ថិយំ យោ បត្ថយសិ, ចន្ទតោ សសមិច្ឆសិ.

១៧២. ឯវំ ចេ កណ្ហ ជានាសិ, យទញ្ញមនុសាសសិ;

កស្មា បុរេ មតំ បុត្តំ, អជ្ជាបិ មនុសោចសិ.

១៧៣. យំ ន លព្ភា មនុស្សេន, អមនុស្សេន វា បុន [បន (បេ. វ. ២១៥)];

ជាតោ មេ មា មរី បុត្តោ, កុតោ លព្ភា អលព្ភិយំ.

១៧៤. ន មន្តា មូលភេសជ្ជា, ឱសធេហិ ធនេន វា;

សក្កា អានយិតុំ កណ្ហ, យំ បេតមនុសោចសិ.

១៧៥. យស្ស ឯតាទិសា អស្សុ, អមច្ចា បុរិសបណ្ឌិតា;

យថា និជ្ឈាបយេ អជ្ជ, ឃដោ បុរិសបណ្ឌិតោ.

១៧៦. អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ, សព្ពំ និព្ពាបយេ ទរំ.

១៧៧. អព្ពហី វត មេ សល្លំ, យមាសិ ហទយស្សិតំ;

យោ មេ សោកបរេតស្ស, បុត្តសោកំ អបានុទិ.

១៧៨. សោហំ អព្ពូឡ្ហសល្លោស្មិ, វីតសោកោ អនាវិលោ;

ន សោចាមិ ន រោទាមិ, តវ សុត្វាន មាណវ [ភាតិក (បេ. វ. ២២៤)].

១៧៩. ឯវំ ករោន្តិ សប្បញ្ញា, យេ ហោន្តិ អនុកម្បកា;

និវត្តយន្តិ សោកម្ហា, ឃដោ ជេដ្ឋំវ ភាតរន្តិ.

ឃដបណ្ឌិតជាតកំ សោឡសមំ.

ទសកនិបាតំ និដ្ឋិតំ.