៤៥៣. មហាមង្គលជាតកំ (១៥)

១៥៥. កិំសុ នរោ ជប្បមធិច្ចកាលេ, កំ វា វិជ្ជំ កតមំ វា សុតានំ;

សោ មច្ចោ អស្មិញ្ច [អស្មិំវ (បី.)] បរម្ហិ លោកេ, កថំ ករោ សោត្ថានេន គុត្តោ.

១៥៦. យស្ស ទេវា បិតរោ ច សព្ពេ, សរីសបា [សិរិំសបា (សី. ស្យា. បី.)] សព្ពភូតានិ ចាបិ;

មេត្តាយ និច្ចំ អបចិតានិ ហោន្តិ, ភូតេសុ វេ សោត្ថានំ តទាហុ.

១៥៧. យោ សព្ពលោកស្ស និវាតវុត្តិ, ឥត្ថីបុមានំ សហទារកានំ;

ខន្តា ទុរុត្តានមប្បដិកូលវាទី, អធិវាសនំ សោត្ថានំ តទាហុ.

១៥៨. យោ នាវជានាតិ សហាយមិត្តេ [សហាយមត្តេ (សី. បី.)], សិប្បេន កុល្យាហិ ធនេន ជច្ចា;

រុចិបញ្ញោ អត្ថកាលេ មតីមា [មុតីមា (សី. បី.)], សហាយេសុ វេ សោត្ថានំ តទាហុ.

១៥៩. មិត្តានិ វេ យស្ស ភវន្តិ សន្តោ, សំវិស្សត្ថា អវិសំវាទកស្ស;

ន មិត្តទុព្ភី សំវិភាគី ធនេន, មិត្តេសុ វេ សោត្ថានំ តទាហុ.

១៦០. យស្ស ភរិយា តុល្យវយា សមគ្គា, អនុព្ពតា ធម្មកាមា បជាតា [សជាតា (ក.)];

កោលិនិយា សីលវតី បតិព្ពតា, ទារេសុ វេ សោត្ថានំ តទាហុ.

១៦១. យស្ស រាជា ភូតបតិ [ភូតបតី (សី. ស្យា. បី.)] យសស្សី, ជានាតិ សោចេយ្យំ បរក្កមញ្ច;

អទ្វេជ្ឈតា សុហទយំ មមន្តិ, រាជូសុ វេ សោត្ថានំ តទាហុ.

១៦២. អន្នញ្ច បានញ្ច ទទាតិ សទ្ធោ, មាលញ្ច គន្ធញ្ច វិលេបនញ្ច;

បសន្នចិត្តោ អនុមោទមានោ, សគ្គេសុ វេ សោត្ថានំ តទាហុ.

១៦៣. យមរិយធម្មេន បុនន្តិ វុទ្ធា, អារាធិតា សមចរិយាយ សន្តោ;

ពហុស្សុតា ឥសយោ សីលវន្តោ, អរហន្តមជ្ឈេ សោត្ថានំ តទាហុ.

១៦៤. ឯតានិ ខោ សោត្ថានានិ លោកេ, វិញ្ញុប្បសត្ថានិ សុខុទ្រយានិ [សុខិន្ទ្រិយានិ (បី.)];

តានីធ សេវេថ នរោ សបញ្ញោ, ន ហិ មង្គលេ កិញ្ចនមត្ថិ សច្ចន្តិ.

មហាមង្គលជាតកំ បន្នរសមំ.